Айлшад хооһоор ерэдэггүй

Февраль һарада эхилхэдээ, Россиин элдэб хотонуудһаа манай нютаг руу хабаадагшад тэгүүлдэг байна. Энэ удаа Байгалай мүльһэн дээрэ шэнэ рекорднууд сохигдоо, дүн хамтадаа 70 техникэ, 94 команда, 500 хабаадагшад байгаа.

-Энэ жэл хабаадагшад олон. Онсо тэмдэглэхэ зүйл гэхэдэ, фестиваль уласхоорондын зиндаатай болобо. Казахстан болон Белоруссиһаа хабаадагшад ерээ. Манай уласта ехэ хэрэгтэй хэмжээ ябуулга, - гэжэ Буряад Уласай Засагай газарай Түрүүлэгшын орлогшо Иван Альхеев хэлээ.

Энэ хэмжээ ябуулга ганса хүхихэ, сэнгэхэ гэжэ эмхидхэгдэнэгүй. Социальна, экологическа сэдэбүүдээр зорилгонуудые урдаа табина. Нёдондо жэлэй “Байкальская миля” фестивальда хабаадагшад Баргажан нютагта оршодог “Звёздный” түбтэ хүүгэдэй наадаха, амарха 1,3 сая түхэригэй талмай бариһан байгаа. “Звёздный” түбтэ хүндэ байдалда ороһон, үншэрһэн үхибүүд байдаг юм. Мүн хабаадагшад хүүгэдые оньһон техникэтэй танилсуулаа.

 -Айлшад хооһон гартай ерэдэггүй гэжэ мэдээжэ. Ямар бэлэг хэрэгтэйб гэжэ асуухада, урилдаанай техникэ хараа һаа, дуратайбди, мүн наадаха талмайтай болоо һаа, жаргаха һэмди гэжэ хэлэһэн байгаа, – гээд, фестиваль эмхидхэгшэдэй нэгэн Елена Кузнецова тэмдэглээ.

Хабаадагшад элдэбын хотонуудһаа Буряад орон морилон буугаа. Алина Чижова аяар Москва хотоһоо ерээ. Тэрэ нэгэ часай туршада 132 километр хурдаар гүйлгэжэ шадаа.

 -Мүльһэн дээрэ түмэр морииемни иишэ тиишэнь шэдэхэеэ һанаа, тиигэбэшье тэрэнээ сэхэлжэ шадааб. Энэ хэмжээ ябуулга ехэ хэрэгтэй. Һайхан байгаалитай газар байна, сагаан сэдьхэлтэй зон суглараа, - гэжэ Алина Чижова хубаалдаба.

Татьяна Зиганшина баһал Москваһаа ерээ. Мүльһэн дээрэ машинаараа 180 километр нэгэ час соо гаталжа шадаа. Тиигэжэ эхэнэрнүүд эрэшүүлһээ дутуугүй түмэр мори жолоодожо шадаха байһанаа гэршэлээ. Тиигэнгүй яахаб даа, һүүлэй арбаад жэлэй хугасаа соо эхэнэр жолоошод аргагүй ехээр ургаа.

 -Экологиин талаар харабал, Байгал далайда нэгэшье хохидол үзүүлэгдэнэгүй. Мотоорһоо нэгэшье дуһал тоһон гоожодоггүй - булта уридшалһан шалгалта гарана. 4-дэхиеэ фестиваль эмхидхэгдэжэ байхадаа, дүй дүршэлнай ургана. Ехэ харюусалгатайгаар энэ хэрэгтэ ханданабди,- гээд, «Байкальская миля - 2022» фестиваль эмхидхэгшэдэй нэгэн Дмитрий Хитров хэлээ.

Жолоошодһоо гадна блогернууд эндэ олоор суглараа. Росси дотор авто- унаануудаараа эгээ суутай блогер Дмитрий Гордей морилон ерээ. Фестивальда хабаадагшадай энэ жэлэй бэлэг гэхэдэ, ой тайгада модо тариха хэрэгтэ тэдэ хам оролсохоёо мэдүүлээ. Тиин Баргажанай аймагай дэбисхэртэ нарһан модонуудые тариха болоо. Энэ ехэ һайн хэрэг ха юм даа. Хэдэн арбаад жэл соо Баргажанай модо зарим зон хайра гамгүй отолжо хаяа. Мүнөө болоходо, модо тариха асуудал хурсаар гаража ерэнэ. Һонирхол татадаг «Байкальская миля» фестивальда юрыншье харагшад олон байгаа.