816
Бүхэроссиин сэрэгэй-патриотическа «Юнармия» гэһэн олониитын нэгэдэл «Сэрэгшэдэ - бэшэг» гэһэн патриотическа хэмжээ ябуулга эмхидхээ. 2500 гаран бэшэгүүд 36-дахи Армиин политотделдэ дамжуулагдаа, тэдэ бүгэдэ сэрэгэй алба хаагшадай байлдажа байһан газарнуудта хүргэгдэхэ юм. Энэ хэмжээ ябуулга апрелиин 15 болотор үнгэргэгдэхэ. Бэшэгүүдээ сахим хаягаар: [email protected] эльгээжэ болохо.
- Өөрын онсо бэлиг харуулха шэнэ аргануудые хэмжээ ябуулга нээжэ үгэнэ. Хүн бүхэн өөртөө таараха янза шэлэн абаха аргатай – бэшэг, зураг гү, али видео-буулгабари. Эгээл сэнтэйнь гэхэдэ, гэртэһээ холо үдэр һүнигүй хүнгэн бэшэ албаяа дүүргэжэ ябаһан хүндэ дэмжэлгэ гээшэ ямар шухала гээшэб гэжэ үхибүүд ойлгожо абана. Тиимэһээ бидэ бүхы бэшэгүүдэй сэрэгшэдтэ хүрэхын тула оролдохобди, - гэжэ Юнармиин сайт дээрэ тэмдэглэгдэнэ.
Хэмжээ ябуулгада Буряадай реабилитационно түбүүдэй шабинар мүн хабаадаа.
- Эсэгэ ороноо хамгаалгын Агууехэ дайнай үеын болон Советскэ Союзай залуушуулай бэшэгүүдые үхибүүднай ехэтэ һонирхожо уншаа. Тэрэ үеын гурбалжан бэшэгүүд ямар ехэ удха шанартай байгааб, дайлалдажа ябаһан сэрэгшэд байлдаануудай хоорондуур түрэл гаралнуудһаа, дүтынгөө зонһоо мэндын тэмдэг абахадаа, ямараар хүхин баярладаг байгаа гээшэб, – гэжэ Захааминай аймагай түбэй захирал Гунсэма Базарова хөөрэнэ.
Бэшэгүүд соогоо үхибүүд өөр тухайгаа бэшэжэ, өөһэдынгөө түсэбүүдээр болон ерээдүйнгөө бодолнуудаар хубаалдана. Тэдэ Эхэ оронойнгоо хамгаалагшадта дуратайгаа мэдүүлээд, энхэ элүүрые, гэртээ түргэн бусахыень хүсэнэ. Үшөө бэшэг бэшэжэ һураагүйшүүл зурагуудаа эльгээгээ.
Бэшэгүүд бүхы орон дотор суглуулагдаһан эгээл хэрэгтэй гуманитарна туһаламжатай хамта Россиин армиин сэрэгшэдэй байлдажа байһан газарнуудта хүргэгдэхэ юм.
Автор: Сэнгэ РИНЧИНОВ буряадшалаа
