Хүмүүжүүлгын хэрэг

Энхэ-Лугта  Байгалай эрьеэр нобшо суглуулха хэмжээ ябуулга эмхидхэгдээ. Тэндэ уласай дээдэ болон дунда мэргэжэлэй һургуулинуудай  оюутад хабаадалсаа. Сэбэрлэлгын ажалай хажуугаар  «Бурприрода» эмхиин инспекторнүүдэй ажалтай танилсаа, спортын мастер Доржо Дахаевтай бэе тамирай дүрэнүүдтэ һураа.

- Экологиин талаар хүмүүжүүлгэ ямаршье сагта ехэ хэрэгтэй. Залуу халаанда хара багаһаань энээн тухай хөөрэжэ, өөрын жэшээ дээрэ  харуулжа байбал, үрэ дүн удаан хүлеэлгэхэгүй.  Энэ хэмжээ ябуулгада олон залуушуулые хабаадуулхань шухала, - гэжэ Байгаали хамгаалгын болон аяншалга хүгжөөлгын уласай түбэй хүтэлбэрилэгшэ  Баир Буянтуев хэлэнэ һэн.

- Нёдондо мэдээжэ ниитын ажал ябуулагша Чингис Болотовой эмхидхэһэн “Нобшо толгой соо” гэһэн хэмжээ ябуулгада анха түрүүшынхиеэ оролсоо һэм. Тиихэдэ 120 мэшээг нобшо суглуулаа бэлэйбди. Энэ жэл ганса нобшо суглуулха бэшэ,  харин хабаадагшадые спортоор һонирхуулха зорилготойгоор,  “нэгэ үйлөөр хоёр шандага сохихо” гэһэн удхатайгаар хэбэбди, -  гэжэ «Плоггинг на Байкале» түсэл зохёогшо Марина Раднаева хубаалдаа.

-Үрэ дүнтэйгөөр сагаа үнгэргөөбди, байгаалияа, Байгал далайгаа сэбэрлэжэ байха гээшэ ехэ буян, - гэжэ оюутад баярлан хэлэнэ һэн.

Акцида хабаадагшад 40 мэшээг нобшо суглуулаа. Энэ зунай сагта үшөө хэдэн иимэ түхэлэй акцинууд үнгэрхөөр түсэблэгдэнэ. Хабаадахаяа һанабал, энэ электронно хаягаар мэдүүлгэеэ ябуулаарайгты: [email protected].