Гэр бүлэнүүдые хүндэлөө

 Баяр ёһололдо хабаадагшадта Буряадай Толгойлогшо Алексей Цыденов наһанайнгаа нүхэр Ирина Цыденоватаяа иигэжэ хандаа:

- Хүндэтэ нютагаархид! Мүнөөдэр би таанадта ехэ гэгшын хүндэлэлэй үгэнүүдые зорюулха гэнэб. Манай орондо эгээл сэнтэймнай – эхэ эсэгын байгуулһан заншалта гэр бүлэ. Энээниие бидэ Үндэһэн хуулидаашье баталжа бэшээбди: бидэ Европын ба бэшэшье гүрэнүүдэй ёһото хүн шэнжэеэ, ажабайдалай үнэн сэнтэйе алдажа байһан замаар ябанагүйбди. Таанад – үни удаан жэлнүүдтэ гэр бүлэеэ, инаг дураяа үнэн сэхээр сахижа ябаһан хүнүүд, өөһэдынгөө ажабайдалаар залуушуулда жэшээ болонот. Ажабайдалай ямаршье гуниг гашуудал үнгэрхэ, хамтадаал байбал гэһэн жэшээ залуу гэр бүлэнүүдтэ хэрэгтэйл даа. Россиин Юрэнхылэгшын тусхай зэргэ, нэрэ хүндэ олгоһон гүрэн түрымнай энэ һайндэр ехэ хэрэгтэй. Ажабайдалай харгы ута, юуншье болодог, элдэбын дабаанууд ушардаг, гэр бүлөөрөөл эб хамта дабагдадаг ха юм, - гэжэ Буряадай Толгойлогшо тэмдэглээ.

- Гэр бүлэ – энэ ехэл гайхамшаг баялигнай, өөрыншье ехэ харюусалгата ажал, юрэн бүхыдөөл ехэ хүдэлмэри гээшэл даа. Гэр бүлэеэ сахиха гээшэ юун байхаб, тон хүнгэн гэжэ хэн нэгэн һанадаг ааб даа, хэн нэгэнэйдэ тиимэ байгаашье бэзэ даа – теэд лэ дээдэ бурхан өөрынгөө заһалнуудые оруулдаг, эб хамтал дабажа гарахыетнай элдэбын туршалгануудые буулгадаг ха юм. Би нэн түрүүн бултанда элүүр энхые, тиигээд ажабайдалайнгаа шата бүхэндэ бэе бэеэ хайрлан дэмжэжэ, үри үхибүүдээ гамнан хайрлажа байхые, хайшаа байнаб, тиимээрнь дурлан энхэржэ ябахыетнай хүсэнэб. Тиигээд лэ энэ дэмжэлгымнай мэдэрһэн тэдэмнай хододоо тантаяа байха, таанадаа хүндэлжэ ябаха, тиигээд саашадаа гайхамшаг баялиг – таанадай аша зээнэрые бэлэглэхэ. Бултаниие найраар! - гэжэ Ирина Цыденова тэмдэглээ.

Найрта ерэһэн наһанай инаг нүхэд өөһэдынгөө ажабайдалай ушарнуудаар болон ажалайнгаа габьяануудаар хубаалдаа, мүн лэ өөһэдынгөө үргэлжэлэл: үхибүүд, аша зээнэр, гушанар тухайгаа хөөрөө.

Буряад орондо ажаһуудаг гэр бүлэнүүдые 2022 ондо шагнахые «Инаг дуранай ба үнэн сэхын түлөө» гэһэн 75 медаль федеральна эмхидхэлэй хороонһоо үгтөө юм. Тэдэ 75 гэр бүлын 31-иинь 50 болон үлүүшье жэлнүүдтэ эб хамта ажаһууна. Шагнагдаһан гэр бүлэнүүдэй 37-иинь олон үхибүүдтэй, тэдэнэй 14-иинь табан болон үшөөшье олон үхибүүдые хүмүүжүүлээ.

Ородой үнэн алдарта шажанда энэ һайндэрые гэгээн Пётрой ба Феврониин дурасхаалай үдэр гэдэг. Тэдэ хоёр гэр бүлын һахюуһад гэжэ тоологдодог. Энэ үдэрые 2008 ондо Россида Гэр бүлын, инаг дуранай ба үнэн сэхын үдэр гэжэ соносхоо. Һайндэрые тэмдэглэдэгшье һаа, тэрэ хуулиин баталамжа үгы байгаа.

Байгша ондо Гэр бүлын, инаг дуранай ба үнэн сэхын үдэр Россида хуулита һайндэр гэжэ зэргэтэй болоо. Зохилдохо хуули ороной Юрэнхылэгшэ Владимир Путин 2022 оной июниин 28-да баталаа.

2014 онһоо Буряад орондо 400 шахуу гэр бүлэ бүхэроссиин хүндэлэлэй шагналнуудаар тэмдэглэгдээ. Жэл бүхэндэ 70-аад гэр бүлэ шагнагдана.