Оролдосотой ажалыень олондо дуулгана

Байгша оной дүнгөөр Буряадтаа мэдээжэ сэдхүүлшэн Борис Владимирович Балданов эгээл һайнаар ажаллажа, түрүү һуурида гараба. Суг хүдэлдэг нүхэрнай 20 гаран жэлдэ «Буряад үнэн» со­ниндо хүдэлхэ зуураа тамирай талаар болоһон мүрысөөнүүдые тон һонирхолтойгоор бэшэдэг сэдхүүлшэн юм. Гансашье тамирай сэдэбүүдээр материал бэлдэдэг бэшэ, харин ажабайдалай алишье талаар хүнэй һонирхол, дура буляадаг зураглалнуудые бэлдэжэ, нара харуулдаг юм.

- Энэ жэлдэ Буряадайнгаа дэбис­хэр дээрэ ажаллажа байгаа 20 гаран ТОС-ой хэһэн хэрэгүүд тухай түрэл сониндоо бэшээб. Аяар холын Аха һайхан нютагай ТОС-уудһаа эхилээд, Сэлэнгын, Ивалгын болон Улаан-Үдын хамтын нэгэдэлнүүд тухай бэшэг­дээ. Хүн зоной эблэржэ, нютаг оро­ноо һэргээхэ зорилготойгоор үнэн зүрхэнһөө оролдон ажаллажа байһан тухай арад зондоо дуулгажа байхада, урматай даа. Амжалтада хүртэһэндөө баяртайб. Суг хүдэлжэ байһан нүхэдтөө мүн лэ баярые хүргэнэб, - гэжэ мэдээжэ сэдхүүлшэн Борис Бал­данов хэлэнэ.

Суг хүдэлжэ байһан нүхэрэйнгөө иимэ амжалтаарнь бидэ хани халуу- наар амаршалнабди!