859
Жэлэй дүнгөөр эрхимүүдые элирүүлдэг заншал хаанашье байдаг гээшэ аабза. Буряад Уласай Соёлой яаман «Жэлэй эрхим соёлой эмхи» мүрысөө үнгэргэдэг юм. 2021 оной ажалай иимэ харалгаар Гааргын хүдөөгэй номой сан эрхимлэһэн юм.
«Мүнөө ямаршье хүдөө нютагта Интернет ажаллана, тиимэһээ номой санда хүн зон ерэдэг гү?» - гэжэ асуухадамни, иимэ харюутай:
- Нютагаархиднай номой санда ерэхэдээ, урданайхидаа адли гансашье ном абажа уншана бэшэ ха юм. Мүнөөнэй номой сан бултадаа шахуу һайн Интернедтэй болонхой. Тиимэһээ гэртээ дэлхэйн холбоондо оролсожо шадахагүй зон номой санда ерэжэ, wi-fi хэрэглэжэ, Интернет баридаг. Уншагшадтайгаа элдэб уулзалгануудые үнгэргэдэгбди. Һургуулиин багшанартай болон эдир уншагша хүбүүд басагадаар хамта ажалаа ябуулха гэжэ оролдодог гээшэбди.
Хэнэйшье мэдэһээр, ном иража уншаха зон жэлһээ жэлдэ үсөөн болоно. Минии һая ерээд ажаллажа байхадамни, ном абадаг зомнай нилээд олон байгаа. Мүнөө болоходо, хурга дарама үсөөн. Залуушуул булта гар утаһаараа хэрэгтэй юумэеэ оложо абана. Уран зохёолшодой болон ирагуу найрагшадай «Боолон-Түмэр» нэгэдэлэй тэбхэр ойн баярта дашарамдуулагдаһан суглуулбарида манай нютагһаа аяар 6 залуу бэшээшэдэй шүлэгүүд оролсоо. Һургуулиин багшанартай нягта ажаллаһанайнгаа ашаар уран үгэдэ дуратайшуул багаһаа элирүүлэгдэдэг. Олон зон өөрынгөө бодолдо ерэһэн мүрнүүдээ шүлэглөөд, нюугаад байдагынь мэдээжэ.
Минии хэжэ байһан ажал уласай хэмжээндэ шалгаржа, иимэ үндэр нэрэ зэргэдэ хүртэһэндөө маша ехэ баяртайб. Суг хүдэлдэг нүхэдтөө мүн лэ баяраа мэдүүлхэ байнаб, - гэжэ олон жэлэй туршада Гааргын хүдөөгэй номой сан ударидажа ябаһан Ирина Цыбанова хөөрэнэ.
Хүдөө нютагта номой сан гээшэ арад зоной суглардаг газарнуудай нэгэн гээшэ. Энэ номой сан үшөө олон жэлдэ ажаллажа, үндэр ехэ амжалтануудта хүртэжэл байг лэ даа.
Автор: Булат БАДМАЕВ
