1158
Ородой Буддын шажантанай заншалта Сангхын дид-хамба лама Дагба Очировай хүтэлбэри доро арамнай үргэхэ уншалга хэгдэһэнэйнь һүүлээр албан ёһоной найр, тоглолто ба эрын гурбан наадан эмхидхэгдэхэ.
Майдари – Ерээдүй сагай Будда. Һүзэгшэд тэрээндэ мүргэхэдөө, Сансарын хүрдэһөө мултаран гараха тухай зальбардаг юм. Ерээдүйдэ Майдари бурханай газар дэлхэй дээрэ заларжа, һайн һайхан һургаалаа түхөөжэ байхынь тула буян арьбанаар үйлэдэхэ хэрэгтэй.
- Гурбан үдэрэй туршада дасан дугангуудта тусхай хурал хурагдажа, Майдари бурханай Түшэдэй дагшан оронһоо замби түбидэ түргэн заларжа буухын тула уншалга хэгдэнэ, - гэжэ Буддын шажантанай заншалта Сангхын хэблэлэй албан мэдээсэнэ.
Майдари бурхан сэнхии дээрээ заларан һуухадаа, бусад бурхадта орходоо, ондоогоор зураглагдадаг юм – хүлынь доошоо һанжан, газар тулаһан байдаг. Энэнь газар дэлхэй дээрэ мүн бэе бэелэн мүндэлхэеэ бэлдэжэ байһан удхатай.
Бурханай номуудта хэлэгдэһэнэй ёһоор, мүнөө Майдари бурхан Түшэдэй дагшан орондо гэхэ гү, али тэнгэриин Галдан можодо олон бурхадые толгойлон һуудаг гэхэ. Майдари бурхан хүн зоной угаа ехээр нүгэл хэдэг боложо, хүнэй наһанай тон богони, бэень жаахан болоһон үедэ газар дэлхэй дээрэ мүндэлхэ юм гэдэг. Тэрэ үедэнь хүнэй наһан 10-20 жэл болоод, бэень жаа хүүгэдэй шэнээн болохо юм ха. Харин Майдари бурханай манай газар дээрэ буужа ерэхэдэ, хүнэй наһан 84 мянган жэлдэ үргэлжэлдэг болохо, үндэрынь 14-15 метртэ хүрэхэ гэдэг.
Майдари бурханай мүндэлхын урда газар дэлхэй дээрэ үзэсхэлэн һайхан удамбараа сэсэг урган һалбарха. Удамбараа сэсэг Сүмбэр уулын орьёл дээрэ ургадаг юм.
Майдари бурхан эхэ болоһон зургаан зүйл, хамаг амитанай туһын тулада Түшэдэй дагшан орониие орхижо, газар дэлхэй дээрэ мүн бэе бэелэн мүндэлхэ.
Фото: Буддын шажантанай заншалта Сангха
