![](/upload/iblock/e1d/1nb6h9tjdtc8h1ryuszblujti1kzcsqz.jpg)
Июлиин 29, гарагай 2, буряад-монгол литээр 24
Нүхэсэхэдэ, аян замда гарахада, арьбажуулгын хэрэгүүдтэ һайн. Амгалан тайбанай, баялигай: малгайн, гуталай, хубсаһанай хэшэг даллага абахада; гахай, хонин, туулай жэлтэй хүнүүдтэ хии мориёо хиидхэхэдэ һайн үдэр.
“Сэрэгэй” үүдэн нээгдэнэ: сэрэг хүдэлгэхэгүй, заргалдахагүй.
Энэ үдэр харгыда гарахада, зүүн зүг руу муу, бусад зүг руу һайн.
Нохой жэлтэндэ һанаһанаа бүтээхэдэ урагшатай, хонин жэлтэнэй буянай гараг.
Үһэеэ абхуулхада – үбшэндэ.
Июлиин 30, гарагай 3, буряад-монгол литээр 25
Хандамаанарай дүйсэн үдэр.
Аянда мордоходо, аралжаа наймаанда, үрэһэ тарихада һайн. Ажалда орохогүй.
Амгалан тайбанай, баялигай хэшэг даллага абахада; хулгана, луу, бишэн жэлтэй хүнүүдтэ хии мориёо хиидхэхэдэ һайн үдэр.
“Түрэлнүүдэй” үүдэн нээгдэнэ: түрэл гаралнуудтаяа найрлахагүй.
Энэ үдэр харгыда гарахада, зүүн зүг руу муу, бэшэ зүг руу һайн.
Морин, могой жэлтэнэй урагшатай үдэр; хулгана, гахай жэлтэнэй буян үйлэдэхэ гараг. Тахяа, бишэн жэлтэндэ муу үдэр, һэргэг ябаха хэрэгтэй.
Үһэеэ абхуулхада – нюдэн бүрэлзэхэ.
Июлиин 31, гарагай 4, буряад-монгол литээр 26
Айраг тараг бэрихэдэ, газар малтахада һайн. Аянда мордохогүй, адуу мал худалдахагүй.
Амгалан тайбанай, мориной хэшэг даллага абахада; бар, морин, нохой жэлтэй хүнүүдтэ хии мориёо хиидхэхэдэ һайн.
“Хэрэмэй” үүдэн нээгдэнэ: гэрэй һуури татахагүй, гэр байра заһабарилхагүй, зөөлгэхэгүй.
Энэ үдэр «морин үхэхэ, эмээл хухарха” ушарһаа харгыда гарахада муу, илангаяа зүүн зүг руу.
Хулгана, гахай жэлтэнэй һайн гараг; үхэр, луу, нохой жэлтэнэй буян үйлэдэхэ үдэр. Морин, могой жэлтэн һэргэг байхые оролдог.
Үһэеэ абхуулхада – жаргалда.
Августын 1, гарагай 5, буряад-монгол литээр 27
Аянда гарахада, айраг бэрихэдэ, наһа барагшые хүдөөлхэдэ һайн. Бэри буулгахагүй, нүхэсэхэгүй, хэлсээ баталхагүй.
Амгалан тайбанай, хүүгэдэй хэшэг даллага абахада; тахяа, үхэр, могой жэлтэй хүнүүдтэ хии мориёо хиидхэхэдэ һайн.
“Бэриин” үүдэн нээгдэнэ: бэриин хэрэгүүдые бүтээхэгүй.
Энэ үдэр харгыда гарахада, урда зүг руу муу, бэшэ тээшэ һайн.
Бар, туулай жэлтэнэй урагшатай үдэр, харин тахяа, бишэн жэлтэнэй буян үйлэдэхэдэ һайн. Үхэр, луу, хонин, нохой жэлтэн һэргэг ябахые оролдохо.
Үһэеэ абхуулхада – үлзытэй һайн.
Августын 2, гарагай 6, буряад-монгол литээр 28
Буян үйлэдэхэдэ һайн. Хүүр залахагүй, бэри буулгахагүй.
Амгалан тайбанай, хониной хэшэг даллага абахада һайн.
“Үхээриин” үүдэн нээгдэнэ: наһа барагшын хэрэг бүтээхэгүй.
Энэ үдэр харгыда гарахада, баруун зүг руу муу, бэшэ тээшэ зүглэхэдэ һайн.
Хонин, тахяа, бишэн жэлтэнэй урагшатай һайн үдэр; морин, бишэн жэлтэнэй буянай үдэр. Бар, туулай жэлтэнэй чисаа гараг – һэргэг ябаха хэрэгтэй.
Үһэеэ абхуулхада – хэрүүл тэмсэлдэ.
Августын 3, гарагай 7, буряад-монгол литээр 29
Бальжинима (Согто) үдэр амиды ба нүгшэһэнэй ямаршье үйлэдэ һайн. Синпүн гэхэ мэтэ газарай бусадшье эзэдэй байбалшье, али үгышье һаа, согто хутаг, буян болохо.
Нирманарати замби түбиһөө бурхад буужа, хүн зоной нүгэл гү, али буян үйлэдэжэ байһаниие шалган хинадаг. Бэри буулгахагүй, хүүр залахагүй, адуу мал худалдахагүй, аралжаа наймаа ябуулхагүй.
Амгалан тайбанай, таряа талханай хэшэг даллага абахада һайн. Бар, морин, нохой жэлтэй хүнүүдтэ хии мориёо хиидхэхэдэ һайн.
“Наймаанай” үүдэн нээгдэнэ: олзын хэрэг эрхилхэгүй.
Энэ үдэр харгыда гарахада, баруун зүг руу муу, бэшэ зүгүүд руу гэмгүй.
Үхэр жэлтэнэй урагшатай гараг; бар, туулай жэлтэнэй буян үйлэдэхэ үдэр. Хулгана, гахай жэлтэндэ урагшагүй үдэр, һэргэг байха.
Үһэеэ абхуулхада – һүнэһэн зайлаха.
Августын 4, гарагай 1, буряад-монгол литээр 30
Бурхан багшын дүйсэн үдэр.
Айраг тараг бэрихэдэ һайн. Бэри буулгахагүй.
Энэ үдэр амгалан тайбанай, эдеэ унданай, баялигай, адуу малай хэшэг даллага абахада һайн.
“Ниитын” үүдэн нээгдэнэ: суглаа зарлахагүй, шухала уулзалга эмхидхэхэгүй.
Энэ үдэр харгыда гарахада, зүүн зүг руу муу, бэшэ тээшэ һайн.
Луу жэлтэнэй урагшатай һайн гараг.
Үһэеэ абхуулхада – хэлэ аманда, хэрүүл тэмсэлдэ.
Зурхай Жаргал лама ДУГДАНОВ бэлдэбэ
Фото: Анна Огородник