​Ой модоор олзо хэгдэнэ гү?

Хүбшэ ой соо нэмжыдэг Хүрбын голой Хасуурта, Тээгдэ, Тохорюугта, Могой болон бусад һууринуудта түлеэ залһан гэжэ балай һанаата болодоггүй. Зүблэлтэ засагай үедэ Хүрбын Леспромхоз эндэ ажалаа ябуулхадаа, жэлэй туршада 370-400 мянган кубометр модо узууртайгаарнь отолоод, Онохойн ой модо болбосоруулгын комбинат руу оруулдаг байhан. Харин мүнөө иимэ үргэн хэмжээнэй үйлэдбэри үгышье һаа, хубиин хэрэг эрхилэгшэд ажалаа ябуулһаар. 2013 онһоо ой модоной хэрэг эрхилһэн Цырен Чимитовтэй хөөрэлдөө дурадхахамнай.

• -Цырен Бальжинимаевич, ойн ажахытай хабаатай мэргэжэл шудалһан гүт?
• -Үгы. БГУ-гай түүхын факультет түгэсхэһэмби. Политолог мэргэжэлтэйб. Дээдэ һургуулиин һүүлээр Улаан-Үдэдэ хэлхеэ холбоондо хүдэлөөд туршааб. Салиниинь бага байгаа. Тиимэһээ нютагаа бусажа, эсэгэтэеэ хамта ой модоной ажахы эрхилээбди.
• -Бэрхэшээлнүүд бии гү?
• -Зүндөө. Илангаяа харюусалгатай хүдэлмэрилэгшэд дуталдана. Салингаа абаад, сэнгээд ябашаха ушарнууд олон даа. Тиимэһээ хариһаа ажалшадые асарнаб.
• Хубиин ажахы һаял эрхилжэ байхадамни, олон тоото саарһа суурһан хэрэгтэй болодоггүй һэн. Хиналтын албануудшье үсөөнөөр ябадаг бэлэй. Мүнөө тоосоо эрихэнь олон болоо. Хиналтын албанууд үргэлжэ ерэнэ.
• -Хиналтын албанууд алдуу эндүү олоно гү?
• -Бэдэрхэ болоо һаа, олдоод лэ байгаа гүб даа.
• - Олзотойл хадань, модо отолоо аабзат. Тиимэ гү?
• -Тиимэ. Олзо бии. Ой модо ашаглахыемнай хориногүй. Зүбшөөл үгэнэ.
• -Тээгдэдэ 8 пилорама, тэдэнэй тоодо танайхи ажалаа ябуулна гэжэ мэдэнэб. Хэн эгээл ехэ пилораматайб?
• - Владимир Борисович Рябов мүн. Тэрэ “Древо” гэжэ томо ажахытай. 3 форвардертай. Нэгэ тиимэ комплекс жэлэй туршада 15 мянган кубометр модо ашаха аргатай. Тиимэhээ жэлэй туршада 45 мянган кубометр модо унагаана аабза.
• - Танай хэмжээн Рябовайхида хүрэхэ гү?
• -Үгы ааб даа. 5-6 кубометр модо бэлдэнэбди. Теэдшье ой модомнай үсөөрһөөр. Үшөө гурбан жэл хүдэлөөд, саашадаа юу хэхэ тухай бодохоб. Саг зуурын хэрэг ябуулнаб гэжэ ойлгоноб.
•