Харон Амерханов амаршалгын үгэ хэлэнэ
Үүлтэртэ хони ямаадай Сибириин болон Алас Дурнын можо нютагуудай үзэсхэлэн 15 дахин Үбэр Байгалай хизаарта эмхидхэгдэһэн байна. Харин мүнөө жэл Улаан-Үдэдэ үнгэргэгдөө. Тиин энэ томо хэмжээ ябуулга Буряад орондомнай хони үсхэбэрилгэ хэр хүгжэжэ байнаб гэжэ элеэр харуулба.
Үзэсхэлэндэ 26 ажахы хабаадаа. Алтай, Хакас ба Тыва Уласуудай, Алтайн ба Үбэр Байгалай хизаарнуудай түлөөлэгшэдэй олоор ерэһэниинь һайшаалтай. Буряадһаа Сэлэнгэ, Хяагта, Бэшүүр, Ярууна, Хори аймагууд хони, хусануудаа харуулаа.
Үзэсхэлэндэ хабаадаһан ажахынуудай дунда хэнэй хонин үлүү һайн бэ гэжэ урилдаан болоо. Дүй дүршэл ехэтэй мэргэжэлтэд хони ямаадые хоёр үдэрэй туршада бүхы талаһаань сэгнэжэ гараа. Тиигэжэ “Шевроле Нива” гэһэн гол шанда Үбэр Байгалай хизаарай Приаргунска аймагай “Дружба” болон Сэлэнгэ аймагай Юрөөгэй ажахынууд хүртөө.
Нарин нооһотой хонидто харууһан хэрэгтэй
Юрөөгэй ажахыда нарин нооһотой забайкалиин хониной буряадай үүлтэр үсхэбэрилэгдэнэ. Уласаймнай ажахынуудта нарин нооһотой хонид тон үсөөн юм. Тиимэһээ энэ шэглэлээр урагшаа дабшаха гэжэ үзэсхэлэн харуулба гээшэ. Юуб гэхэдэ, һэргээгдэжэ байһан нарин сэмбын, оёдолой үйлэдбэринүүдтэ имагтал нарин нооһон хэрэгтэй бшуу. Энээн тухай һүүлэй 5-6 жэл соо “Ажур Текс” үйлэдбэриин хүтэлбэрилэгшэд һануулжал байдаг. Тэдэ ондоо можо нютагуудһаа, хари гүрэнһөөшье нооһо асаржа хэрэглэнэ. Иимэ байдал хубилгаха хэрэгтэй.
Юрөөгэй ажахын хүтэлбэрилэгшэ Тумэн Аюшеевэй хэлэһээр, нарин нооһотой хони тэжээхэнь хүнгэн бэшэ. Бусад хонидто, илангаяа буряад үүлтэртэ “Бүүбэйдэ” орходоо, нарин нооһотой хонидой хойноһоо наринаар хараха хэрэгтэй. Үбэлдөө тэдэмнай өөһэдөө саһан дороһоо тэжээлээ оложо шадахагүй, тиимэһээ үбһэ ногоо ехээр бэлдэжэ нөөсэлхэ хэрэгтэй. Мүн бүхэли үбэлөө хашаада, хүйтэндэ хотондо хаадаг юм. Нэгэ үгөөр хэлээ һаа, нилээд хүлһэ адхуулдаг.
Эзэдтээ авто-унаа шан асарһан хуса
Али үүлтэрынь үлүү ашагтайб?
Манай уласта хонидой зургаан үүлтэр үсхэбэрилэгдэнэ гээшэ. 2017-2018 онуудта Буряадай гүрэнэй хүдөө ажахын академиин эрдэмтэд бултыень бүхы талаһаань шэнжэлжэ гараа. Мүнөө болотор ямар үүлтэрэй хонин эндэмнай тон таарахаб, мүнгэнэй талаар ашагтайб гэжэ тэдэ дэлгэрэнгыгээр үшөө дуулгаадүй байна. Һүүлэй 20 гаран жэлдэ иимэ ехэ шэнжэлгэ хэгдээгүй гээд хэлэхэ шухала. Энээнһээ боложошье, хүдөө ажахынууд элдэб янзын үүлтэрнүүдые тэжээхэеэ оролдоно.
Һүүлэй байдалаар уластамнай эгээл олоор “Бүүбэй” хонид үсхэбэрилэгдэнэ. 20-дохи зуун жэлэй эхиндэ Буряадай тала дайдаар “Бүүбэй” хонид бэлшэхэеэ болишоһон юм. Юуб гэхэдэ, буряад угсаатан энэ хони Үбэр Монгол, Шэнэхээн абаад ябашаһан. 1990-ээд онуудта үндэһэн энэ үүлтэрые нютагтань бусааха гэһэн ехэ ажал ябуулагдаа. Эрдэмтэдэй тэмдэглэһээр, энэ үүлтэрэй хонид анханайнгаа шанар шэнжэ нэгэшье алдаагүй байгаа бшуу. Түрүүшын хонид Бэшүүр болон Хори аймагуудта асарагдаа. Харин мүнөө Буряадай бүхы аймагуудта тараагданхай. “Бүүбэй” хадаа буряад хүнэй тэжээхэ ёһотойл хонин болоно ха юм.
“Шэбэртэ” ажахыда эдэ хонидой шанар шэнжые һайжаруулхын тула эрдэмтэд горитой ажал ябуулна. Мүн тиихэдэ тоо толгойень олошоруулхаяа оролдоно.
- “Бүүбэй” хадаа манай байгаалида тон таарама үүлтэр болоно гээд һанагдана. Юуб гэхэдэ, тэрэ бэлшэжэ, өөрөө хоолоо олодог һайтай. Эдэ хониднай ехэ нооһотой, хажуугаарнь һайн шанартай мяха үгэдэг. Тиихэдэ түргөөр бэеэ абадаг гээшэ, - гэжэ “Шэбэртэ” ажахын хүтэлбэрилэгшэ Жаргал Цыренов хөөрэнэ.
Жаргал Цыренов “Бүүбэй” хонидые магтана
Хони үсхэбэрилгэдэ - гүрэнэй тэдхэмжэ
“Шэбэртэ” ажахыда һүүлэй байдалаар 1200 толгой хонин тоологдоно. “Бүүбэй” Хори аймагта олоор үсхэбэрилэгдэнэ. Бүхы дээрээ Хориин тала дайдаар 34 мянга гаран толгой хонид бэлшэнэ. “Баянгол” ажахы эдэ хонидые олоор үсхэбэрилнэ. Аймагай хүдөө ажахын таһагые даагша Виктор Хабитуевай тэмдэглэһээр, һүүлэй үедэ гүрэнэй талаһаа ехэ туһаламжа үзүүлэгдэнэ.
- Хэдэн жэлэй саана Хоридо 20 мянга гаран толгой хонид тоологдодог байгаа. Оройдоол 2-3 жэлэй хугасаа соо тоониинь эрид дээшэлээ. Бүхы ажахынууднай, мүн өөрын хэрэг эрхилэгшэд баһал гүрэнэй тэдхэмжэ абаһандаа баяртайнууд, - гэжэ Виктор Хабитуев хөөрэнэ.
Һүүлэй мэдээгээр, Буряадта 280 мянга гаран толгой хонид тоологдоно. Уласаймнай Засагай газар тооень хоёр дахин олошоруулха түсэб табина. Хүдөө ажахын болон эдеэ хоолой сайд Даба-Жалсан Чириповэй мэдээсэһээр, һүүлэй табан жэлдэ ганса хони үсхэбэрилгэдэ 280 сая түхэриг шэглүүлэгдээ. Энээнһээ гадна элдэб янзын грантын ашаар туһаламжа үзүүлэгдэнэ.
Үзэсхэлэндэ олон хүндэтэ айлшад ерээ. Ородой Хүдөө ажахын яаманай департаментые даагша Харон Амерхановай хэлэһээр, манай гүрэн хони үсхэбэрилгөөр түрүү хари гүрэнүүдтэй адли хүгжэжэ байнхай. Энээндэ Буряадай ажахынууд ехэ нэмэри оруулна гээд тэрэ тэмдэглээ.
«Хэды тиигэбэшье, урагшаа дабшаха хэрэгтэй. Мяханай, нооһоной шанар шэнжые дээшэлүүлхэ гэһэн түсэб бидэ урдаа табинхайбди», - гэжэ Харон Амерханов мэдүүлбэ.
Ямаад баһа харалганда хабаадаа
Урдаа табиһан зорилгонуудаа бэелүүлхын тула хони үсхэбэрилгын үйлэдбэри олон бэрхэшээлнүүдтэй дайралдана. Даба-Жалсан Чириповэй хэлэһээр, тэдэниие дабажа гарахаар. Тус үзэсхэлэнэй удаа Буряад Уласта 2025 он болотор хонин ажахы хүгжөөлгын түсэл зохёогдохо юм.
Борис БАЛДАНОВАЙ гэрэл зурагууд