Хүн зоной ой тайга орохонь хоригдобо

-Апрелиин 3-да Солонцы һуурин шадар хагдан дүрэжэ байна гэһэн мэдээсэл түймэр саралгын албанда дуулгагдаһан юм. Түймэр сарагшадай хүрэжэ ерэхэдэнь, айлай хорёо дотор баригдаһан сарай, 3 бани, харша хорёонь дүрэжэ байба. 10 гектар газарай талмайда соробхилжо байһан хагда хүн зониие хүлгүүлээ. Ажаһуугшадай болон түймэр саралгын албанай мэргэжэлтэдэй хамтын хүсөөр түймэр унтараагдаба, - гэжэ гал дүлэ саралгын албанай мэргэжэлтэд дуулгана.

Апрелиин 4-һөө хүн зоной ой тайга руу орохонь хоригдобо. Буряадай Хойто-Байгалай болон Муяын аймагуудай ажаһуугшадта мүнөөдөө иимэ хорилто табигданагүй.

- Хуурай ногоо хагдаяа ажаһуугшад өөһэдөө тармажа абагты. Гал табижа, хагда галдахань огто хоригдоно. Анхаралтай байгты! – гэжэ Засагай газарай Түрүүлэгшын орлогшо Пётр Мордовской хэлэнэ.

Үнэхөөрөөшье, түймэрэй хойшолон аймшагтай гэжэ арад зомнай ойлгожо, һэргылэмжэн ажал ябуулха бэзэ гэжэ найдагдана. Хуули буруушааһан хүндэ амаргүй ехэ яла тохогдохо даа.