​Жэмэстэй эдеэн

Улаан-Үдэ хотын түб талмайда үнгэргэгдэһэн “Своё” гэжэ хүдөө ажахынуудай эдеэ хоолой яармагта гансал Хэжэнгын хурууд олониие гайхуулаа бэшэ, мүн яблокаар хэгдэһэн пастила һонирхол татаа. Иимэ амтатай эдеэнэй зүйл Загарайн аймагай Доодо Тайлса һууринда үйлэдбэрилнэ.

ИП “Кононов Евгений Петрович” оройдоол хоёрдохи жэлээ ажалаа ябуулна. Хэды тиигэбэшье олон амтатай зүйл бүтээжэ эхилэнхэй. Тэдэнэй пастила эгээл амтатай хоол гэжэ тэрэниие эдижэ туршаһан хүнүүд нэгэ дуугаар тэмдэглэнэ.

“Эхилэгшэ фермер» гэһэн шэглэлээр Буряад Уласай Хүдөө ажахын яаманай тусхай грантда бага ажахы хүртэһэн байна. Газар абажа, тэдэ модонуудые ургуулдаг болонхой. Саад соонь мүнөө зэдэгэнэ, үхэр нюдэн, шасаргана тоологдоно. Ходо яблока худалдан абахагүйн түлөө ажахынхид үлир модо тариһан байна.

Пастила яблокаар хэгдэдэг гээшэ. Ажахын хүдэлмэрилэгшэд тэрээндээ жэмэс нэмэжэ, бүри амтатай болгоно. Пастилаһаа гадна джем, варени гэхэ мэтэ эдеэ хоолой зүйлнүүд наймаалагдана.

- Яблокаар пастила хэхэ гээшэ хүндэхэн хэрэг болоно. Яблока бусалгагдаад, табан һара соо хадагалаатай байдаг. Тиигээд лэ эдихэ хэрэгтэй. Хэршэхэдэ, нээрээл хуруудтай адли, - гэжэ Евгений Кононовой наһанай нүхэр хөөрэнэ.

Өөһэдын худалдаа наймаанай газартай болохо гэжэ ажал ябуулагдажа эхилэнхэй. Удангүй тусхай оньһон техникэ абтаха гэжэ ажахынхид түсэбөөрөө хубаалдана.