​Буряад нюуртай түбэй телевидени

Буряад Уласһаа гарбалтайшуул октябрь һарада түбэй телевидениин элдэб түсэлнүүдтэ эдэбхитэйгээр хабаадана. 

“Мүнөөдэр үдэшэ” гэһэн 1-дэхи теле-субагай дамжуулгада Бандида хамба лама Даша-Доржо Этигэлов тухай һонирхолтой зугаа дэлгээгдээ. Бүхы Ород гүрэнэй арад зон Этигэл хамба ламын мүнхэ бэе тухай шэнэ гайхамшагта мэдээнүүдые абаа гэхэдэ, алдуу болохогүй. Тамчын дасанай шэрээтэ лама Солбон Аюшеев болон Янжима Васильева гэгшэд харагшадта дэлгэрэнгыгээр хөөрэжэ үгөө. Бүхы харилсаан нэгэ дамжуулгада багтаагүй. Үргэлжэлэлынь октябриин 30-да гараха юм. 

Буряадаймнай үшөө нэгэ гайхамшагта эрхэтэн Михаил Асташов “Вечерний Ургант” дамжуулгада хабаадаа гээд хэлэлтэй. Хүл гаргүй түрөөд, яагаад Олимпиин орьёлдо хүрөөб гэһэн хөөрөөн олониие бархируулаадшье абаа. 

«Урилдаанай талмай дээрэ иитэрээ һанаагаа зобоогүйб, үбдэгни һалганажа байгаа. Иван Ургант энээниие ойлгоод, намайе һаатуулаа, сай уулгаа», - гэжэ Михаил Асташов һүүлдэнь хөөрэбэ. 

27 жэлэй хугасаада агаарай долгиндо гаража байдаг олоной дура буляаһан “Поле чудес” дамжуулгада Буряадаймнай хоёр хүн мүн лэ хабаадаба. 2019 ондо Буряад Улас дотор эрхим багша болоһон Дмитрий Павлов бусад түрүү багшанарай тоодо бэлиг шадабарияа харуулаа. Александр хүбүүниинь уранаар шүлэг уншаа. Пётр Чайковскиин нэрэмжэтэ хүгжэмэй колледжын “Алан Гоа” ансамбль харагшадые баясуулаа. 

Хүгжэмэй колледжын багша Виктория Ринчинова үнгэрһэн долоон хоногто “Поле чудес” баһа ошоһон байна. 73 наһатай Михаил Жагбаев абаяа тэрэ дамжуулгын үедэ дэмжээ, Нарантуяа басагатаяа хүгжэмэй бэлэг харагшадта дамжуулаа. Энээндэ баярлаһан үбгэн абань финалда орожо шадаа. “Поле чудес” дамжуулгада хабаадаһан Буряад ороной түлөөлэгшэд сооһоо тэрэ эгээл һайн дүн харуулба гээшэ. 

«Үшөө жэлэй эхиндэ “Поле чудес” дамжуулгада мэдүүлгэ эльгээһэн байгааб. Сентябрь һарада тэндэһээ хонходожо, маанадые баярлуулаа. Иимэ бэлэг абадаа барюулаабди», - гэжэ хүүгэдэй урлалай 7-дохи һургуулиин таһагые даагша Виктория Ринчинова хэлэнэ. 

Һая “Поле чудес” дамжуулгада буряад угсаатан тухай асуудалнуудта хабаадагшад харюу үгэһэн байна. Түбэй телевиденидэ буряад нюурнууд хэзээдээшье иимэ олон байгаагүй бшуу.