​Буряад Уласта Ажаһуугшадай бүхэроссиин тоо бүридхэлгэ үргэлжэлһөөр

Октябриин 15-һа ноябриин 15 болотор гүрэн доторнай удха шанартай үйлэ хэрэг боложо байна. Хүн зоной тоо бүридхэлгын ашаар нютаг нугануудай ерээдүйн хүгжэлтын зам тодоруулагдаха юм.

Түнхэнэй аймагай Хэрэн һууринай баруун талада, Хужар нютагай зүүн талада Маргарита Паданова бэшээшээр эдэ үдэрнүүдтэ хүдэлнэ. Тэрэ 191 гэр бүлэдэ орожо гараха даабаритай.

- Нютагаймнай зон хэды намайе танибашье, гэрэй байшан, олзо тухай асуудалнуудта харюусахаяа һананагүй. Зарим айлда орожо шаданагүйб, нохойнуудаа табяад байна, - гэжэ Маргарита Паданова бэрхэшээлнүүд тухай хөөрэнэ.

Гэртээ оруулха дурагүй байбал, ажаһуугшад бэшэлгын тусхай түбтэ хандаха аргатай. Ганса Улаан-Үдэ хотодо иимэ 59 түб хүдэлжэ эхилэнхэй. Алибаа хүнэй гэртээ үгы байбал, түбүүдтэ ерэхыень урилга үүдэндэнь гү, али почтын хайрсагтань бэшээшэ үлөөнэ.

Буряад Уласай Толгойлогшо Алексей Цыденов, Арадай Хуралай Түрүүлэгшэ Владимир Павлов тус хэмжээ ябуулгада түрүүшүүлэй тоодо хабаадаһан байна.

- Тоо бүридхэлгэһөө манай ерээдүй дулдыдаха. Булта энээндэ хабаадажа, зүб мэдээнүүдые үгөө һаамнай, гүрэн бүри эршэтэйгээр хүгжэхэ гээд ойлгохо хэрэгтэй. Шухала үйлэ хэрэгһээ айнгүйгөөр, хуу булта хабаадаял даа, - гэжэ Алексей Цыденов уряалба.