​«Геройнуудай хана» Буряадай Хэжэнгэ нютагта баригдаха

Байгша оной дүүрэтэр Хэжэнгэ нютагта “Алдар солын аллей” гэһэн дурасхаалай комплекс һэльбэн шэнэлэгдэхэ юм. Хотын байдал зохёохо зорилготой федеральна программын ашаар энэ хэрэгтэ 1 сая түхэриг һомологдонхой. Мүнөөнэй байдалаар тэндэнь зайн гал татагдаа, гэрэлтүүлдэг хэрэгсэлнүүд тодхогдоо, оршон тойронхи газарынь шэнэ плиткэнүүдээр хушагдаа.

Хэжэнгэ нютагай “Алдар солын аллей” аяар 1975 ондо баригдаһан юм. Олон жэлэй үнгэрэн ошоходо, бүхы юумэн хуушардаг, һандардаг заншалтай ха юм. Тиимэһээ шэнэлэлгын ажал хүдэлмэри эхилхэ гэһэн шиидхэбэри абтаһан байна.

“Бидэ Эсэгэ ороноо хамгаалһан баатар сэрэгшэдэйнгээ аша габьяа, баатаршалга мартаха ёһогүйбди. Энэ хүшөөгөө ходол сэбэрээр, наринаар хадагалжа ябаха - манай уялга”, - гэжэ Хэжэнгэ һууринай ажаһуугшад тоолодог.

“Ажал яһала хэгдэжэ байна. Бага зэргэ түсэбһөө хожомдоо, тиигэбэшье дүүрэхэ болзортоо дүтэлөө. Жэлэй һүүл багта Т-62 түхэлэй танк эндэ асаржа табихабди. Танк асарха хэрэгтэ бэрхэшээл гараа, тиигэбэшье асуудал шиидхээбди”, - гэжэ Буряад Уласай Түрүүлэгшын орлогшо Евгений Луковников хэлээ.

Һануулан хэлэбэл, энэ жэл онлайн аргаар дуугаа үгэлгэндэ хэжэнгынхид гурбан ниитын газар болбосон түхэлтэй болгохо аргада хүртэбэ. Ерэхэ жэл Новокижингинск, Хэжэнгэ болон Загаһата нютагуудта паркнууд шэнэлэгдэхэ юм.