Буряадай «Асториум» түбтэ гүрэнөө үргэхэ хүнүүдые бэлдэхэ

Буряад Уласай Толгойлогшо Алексей Цыденов бэлигээ бэхижүүлжэ байһан үхибүүдээр харилсажа, шэнээр байгуулагдаһан түбэй ажабайдалтай дүтөөр танилсаа.

Толгойлогшын хэлэһээр, бүхэроссиин “Сириустэй” адли томо түб Буряадта нээхэ тухай зүб шиидхэбэри абтаа.

- Таһалга лабораторинуудаар ябахадамнай, үхибүүд маанадые обёорношьегүй. Юуб гэхэдэ, дуратайгаар хэжэ байһан юумэниинь һонирхол татана, иишэ тиишэ һамаарха аргань үгы. Энээниие хараад лэ баярлааб, - гэжэ Алексей Цыденов тэмдэглээ.

Эрдэм шэнжэлэлгын, соёл урлалай, тамирай шэглэлнүүдээр түб ажалаа ябуулха гээд хэлэлтэй. Жэлэй хугасаада эндэ 1100 хүрэтэр бэлигтэйшүүл эрдэм мэдэсэеэ мүлихэ болоно. Буряадай бүхы аймагуудһаа түлөөлэгшэд 10-21 үдэрэй туршада эндэ бэлиг шадабарияа дээшэлүүлхэ. Холын аймагай үхибүүд 45 һууритай хамтын байрада хонон байрлаха аргатай. Үдэртөө таба дахин тэдэ амтатайгаар эдеэлхэ юм.

“Асториумдо” хэрэглэгдэдэг оньһон техникэ олониие гайхуулна. Үхибүүд мүнөө үеын технологи хэрэглэн һураха аргатай болобо. Һүүлэй үедэ бултанай һонирхол татаһан робототехникэһээ гадна, хүн зоной ажамидаралда хэрэгтэй зүйлнүүдые шэнжэлхэ арга боломжо үгтэнэ. Физикэ, хими, биологи, мүн бусадшье эрдэмүүдэй талаар гайхамшагта шэнжэлгэнүүдые Буряадаймнай үхибүүд ерээдүйдэ хэжэшье магад.

Буряадай Толгойлогшо химиин лабораторидо ороод, “Хамтаараа эндээ ковид үбшэнһөө эм хэхэ аргатай болообди”, - гэхэдэнь, сугларагшад альгаа ташажа эхилээ. Эдэ үгэнүүдынь дэмы бэшэ. Бүхы дэлхэйдэ хабаатай юумэ бүтээхэ шэнжэлгын түб эндэмнай нээгдээ гэжэ ойлгохо хэрэгтэй.

Һургуулида һуража байгаа сагтань бэлигтэй үхибүүдые ехэ эрдэм шэнжэлэлгэдэ оруулха зорилготойгоор энэ түб нээгдээ. Һуралсалдаа хүбүүд, басагад хэды бэрхэшье һаа, бүри үргэн эрдэм мэдэсэ абаха арга боломжо тэдэндэ олгуулаабди, - гэжэ Алексей Цыденов хэлэнэ.

Хүдөө ажахын, хүн зониие абаралгын, элүүр энхые хамгаалгын тусхай лабораторинууд үхибүүдэй һонирхол татана. Ерээдүйн тамиршад, соёлшод эндэ ерээд, һуралсал гараха аргатай.

- Һаяшаг манай бүлэг үхибүүд эндэ һуралсал гараа. Һорилго хэхэһээ гадна һургалгын хэмжээ ябуулгануудые олоор эмхидхээ. Тамиршаднай эндэһээ ондоо хараа бодолтой болоод гараа, - гэжэ һур харбалгаар Буряад Уласай гүрэнэй һоригшо Сэсэг Доржиева хөөрэнэ.

Сибирьтэ болон Алас Дурна зүгтэ эхэнэрнүүдэй дунда анха түрүүшын уласхоорондын гроссмейстер, Арадай Хуралай һунгамал Инна Ивахиновагай хэлэһээр, эдир шатаршад һорилгоёо эндэ эршэтэйгээр эмхидхээ.

- Манай хүүгэд һургуулиингаа программаһаа ехээр үлэхэбди гэжэ айгаагүй. Ород хэлэнэй, математикын багшанар ерэжэ, үхибүүдтэй үдэр бүри хүдэлөө. Шадамар бэрхээр харилсахын, өөрөө хэлэжэ шадахын хэшээлнүүд үхибүүдыемнай һонирхуулаа. Мүн бусадшье хэмжээ ябуулганууд тон ехэ һонирхол татаа, - гэжэ Инна Ивахинова мэдүүлнэ.

Ерээдүйдэ Буряад ороноо өөдэнь үргэхэ бэрхэшүүл эндэл һуража гараха гээд найдая.