392
Манай ТОС-то мүнөө сагта 41 айл ороно. Эгээ үндэр наhатай хүмнай - Цыденов Бато таабай. Олон үхибүүдэйнгээ, ашанарайнгаа дунда хүхюун дорюун, элүүр энхэ, бушуу тушуу ажалаа хэжэ, гүйжэ ябадаг зандаа.
ТОС-ой олон залуу айл гэр бараагаа барижа, түбхинэжэ, үхэр малаа олоороо барижа, шууялдан байдаг. Бэе бэеhээ хойнотохогүй гэжэ урилдан һагад олон хүүгэдтэй боложо байнад. 2019 оной hүүл багаар эхир хүбүүд Баясхалан ба Баяр Доржиевууд нэжээд мантагар томо хүүгэдтэй болоо.
Январиин 6-да Мунко Базаров баhал мантагар томо хүбүүтэй болоо бшуу. Үшөөл олон хүүгэдтэй болохыень нютагаймнай аха захатан уряална. Һургуулидамнай 29 hурагшад hурана, сэсэрлигтэ 14 хүүгэд хүмүүжүүлэгдэнэ. Ехэнхи сэсэрлигэй ажалшад манай ТОС-hоо юм.
Ажал ябуулагдана
Нютагайнгаа шарай hайхан байлгахые оролдожо, хабар ба намар субботнигуудые үнгэргэнэбди. Нютагhаамнай hайхан газар хаанашье үгы гэжэ ажалша бүхэриг залуушуулнай ойлгожо, ажабайдалаа hэргээхэ гэжэ түсэблэнэ.
2019 ондо грант шүүжэ, 150 мянган түхэриг шан абаабди. Тэрэ мүнгэндөө Сурхарбаанай талмай дээрэ материал, шэрэ, шифер абажа, эдеэ хоолоо бэлдэхэ, худалдаа наймаагаа хэхэ 4 таhагтай томо веранда баряабди. Нютагаараа хамтаржа, Соёлой байшангай ажалшадтайгаа цемент абахынь тула 10 мянган түхэриг мүнгэ үгэлсэжэ, томо сценэ шудхажа бодхоогообди.
Түрэл hургуулидаа огородто үхибүүдэйнгээ ведрогоор уhаа зөөхыень болюулхын тула 35 мянган түхэриг капельно-оросительна системэ абахыень үгэлсөөбди.
Намарай hүүл hарануудта үбhэ хуряалгын, хартаабха малталгын hүүлээр сүлөөтэй болоод, баhал материал абажа, хүүгэдэй талмай бэлдэн, баханануудые hуулгажа, хашаалжа шэрдээбди. Хабар дулаан болохотой сасуу ажалаа дүүргэхэ түсэбтэйбди. Хүүгэдэй талмай дээрэ бага үхибүүдэй hолжорхо тусхай добонууд, элһэн соо наадаха хэрэгсэл, томошогуудайнь бэеэ татажа hорихо турнигууд тодхогдохо.
Манай ТОС-ой хамтын ажалда урагшаа hанаатай, эбтэй эетэй ябалсагшад - Цыден-Еши Чимитовна, Сергей Балданов, Валерий Буянтуев, Мунко Базаров, Амгалан ба Августина Гомбоевтон, Людмила Очирова, Виктория Дымпилова, Туяна Дугарова болонод.
Соёлой байшанайнгаа ажалшадтай эбтэй эетэйгээр ажалаа ябуулнабди. Бүхы найр наадануудта, конкурснуудта эдэбхитэйгээр хабаадалсаха гэжэ оролдодогбди. Бидэнгүйгөөр нэгэшье найр үнгэргэгдэнэгүй ха. Нютагайнгаа зониие хүхеэжэ, өөhэдөөшье Ехэ-Сахирай, Дүтэлүүрэй, Захааминай театрнуудтай хамтаржа, «Жэлэй эрхим театр» гэhэн номинацида хабаадажа, зүжэгүүдые табижа харуулаабди. С.Н.Цыренжапова, Ц-Е.Ч. Цыреторова, С.М. Дымпилова гэгшэд хабаадана.
Намарай hайхан сагта Ехэ-Сахир нютагай ТОС-ууд харгы заhабарилгын ажал ябуулжа эхилээ. Харгы дээрэ бии болоhон нүхэнүүдые хайр шулуугаар хаажа сэхэлбэ. Нютагай техникэ олоороо ажал ябуулаа.
Эндэ манай нютагай хүбүүд нэгэ hаналаа табижа, энэ ажалаа түргэн бүтээбэд. Хабаадалсаhан хүнүүд гэхэдэ, Сергей Цыбиков, Баир Лыгденов, Даша Дамбаев, Баир Доржиев, Жамбал Дугаров болон бусад. Эрмэлзэлтэй залуу хүбүүдтэ нютагай захиргаанай зүгhөө ехэ гэгшын баярые хүргэнэбди. Харин тиихэдэ амтатай эдеэ хоолоор хангаhан эзынэртэ мүн лэ баяраа мэдүүлнэбди.
Мэлэ, Сагаан Морин, Баянгол, Борто ба манай нютагай жолоошод hайн харгыгаар гал тэргэ мориёо харайлгажа байхадаа омогорхоно.
«Би гэhэн - гансаараа, бидэ гэhэн - олоороо» гэhэн урданай буряад үгын ёhоор, булта барандаа ажал ябуулжа байhан зоной үйлэ хэрэгүүд бүтэсэтэй, үхибүүдэй ба залуушуулай наhанайнь харгы замынь арюухан байхал даа гэжэ найданабди.
Спортын талаар мүн лэ эдэбхитэйбди
Энэ үнгэрhэн жэлдэ спортдо дуратай залуу айлнууд бага хүүгэдээ дахуулан, елүүр дээрэ ерэжэ, конькигаар халтиржа, санаар hолжоржо, үдэрөө дүүрэн хүхюутэйгээр үнгэргөөбди. Жэл бүри үбэлэй ута амаралтануудта Виктор Васильевич Аюшеевэй эмхидхэhэн кубогта түрүүшынхиеэ туршая гэлдээд, залуушуулай команда табижа, 6 команда сооhоо 5-дахи hуури эзэлээд, ехэ баяртай байнабди. Залуу айл Галдан Владимирович Будаев hургуулиин физкультурын багша Баярма Игоревна нүхэртэеэ hур харбалгаар hонирхожо, туршажа, харбажа эхилээд, hайн дүнгүүдые харуулжа байна. Баярма Игоревна зунай Сурхарбаанда эхэнэрнүүдэй дунда түрүүшын hуури эзэлээ.
Түсэбүүд
Үдэшэндөө үйлсэ гэрэлтүүлхэ хэрэгсэлнүүдые энэ жэл тодхохо гэжэ түсэб табяад байнабди.
Сындыма ДЫМПИЛОВА, «Молодёжное» ТОС-ой түрүүлэгшэ
