Хүхэ түлишэ хүрэхэнь гү Буряадта?

Олондо мэдээсэл тараадаг эмхинүүд һаяхана энээн тухай зураглал бэлдэһэн байна. Түсэблэгдэһэн эдэ соргонууд Түнхэнэй аймагай дэбисхэр дээгүүр гаража, саашаа Захааминай аймагаар Монгол орон руу татагдаха юм ха.

«Сила Сибири-2» гэһэн түсэл тухай эндэ хэлэгдэнэ. Сибириин үргэн дайдада олзоборилогдодог хүхэ түлишэеэ энэ эмхи үнинэй Хитад гүрэндэ наймаалха түсэбтэй. ООО «Газпром проектирование» гэһэн эмхиин үгэһэн мэдээгээр, Түнхэнэй хойто хада һэтэлжэ, Далахай, Гужиры, Еловка, Зактуй, Жэмһэг нютагуудай хажуугаар татагдаха. Иигэжэ ИА «Интерфакс» гэһэн мэдээсэлэй агентство дуулгана.

Энээнһээ урид Ковыктинское гэһэн уурхайһаа урагшань мүн лэ Буряадай аймагуудай газар дэбисхэр дээгүүр сорго татахань, али үгы һаа, Үбэр Байгалай хизаарай болон Амарай можоор Хитад руу оруулха һанаатай һэн. Энэ хүхэ түлишэ манай нютаг ерэбэлнь, дулаасуулгын тогоонууднай энээгээр түлигдэдэг болоо һаань, оршон тойронхи байгаалияа бузарлахаяа болихо һэмди. Һүүлэй хэдэн жэлэй туршада эгээл муухай хотонуудай зэргэдэ Улаан-Үдэмнай ходол ороно.

Уридшалан хараха аргатай

Олон зоной һанаа зобооһон энэ асуудалда Буряад Уласай Толгойлогшын зүбшэлэгшэ Алдар Бадмаев август һарада Буряадаймнай газар уһан дээгүүр газопровод яагаашье һаа татагдаха гэжэ бэшэһэн байна. Ушарынь юуб гэхэдэ, Монгол гүрэн руу сорго татахадань, эгээл дүтэ, богони зайтай болоно бшуу.

- Сорго татаха талаар бэлдэлгын ажал түлэб дундаа ябажа байна гээд харанабди. Хитад орондо элшэ хүсэнэй дутагдалһаа боложо, энэ асуудал амин шухала болоод байна. Энэ шугам Байгал далайһаа яһала холо зайда, тиимэһээ эгээл энэ түсэл дэмжэгдэхэ гээд һанагдана. 16-17 жэлэй саада тээ ябуулагдаһан ажалай дүн хараадаа абан, түсэблэнэ ёһотой. Тиихэдэ «ЮКОС» гэһэн эмхи нефтепровод татаха һанаатай байгаа. Түнхэнэй, Захааминай, Зэдын, Мухар-Шэбэрэй болон Сэлэнгын аймагуудаар гараха һэн. Газпром мүнөө тэрэл зүргөөр татаха һанаатай бшуу даа, - гэжэ экономист Алдар Бадмаев хэлэнэ.

Түнхэнэй аймагаар хүхэ түлишын соргонуудые татаха тухай асуудал шиидхэгдэнхэй.

- Яагаашье һаа, энэ түсэл бэелүүлэгдэхэ. 2021 ондо Монголдо «Газопровод Союз Восток» гэһэн эмхи байгуулагдаа. Тус түсэлэй экономическа талаһаань шэнжэлгэ ябуулна, - гэжэ Буряадай гүрэнэй университедэй Зүүн зүгэй иститудай дарга, Монгол оронтой холбооной талаар мэргэжэлтэн Владимир Родионов хэлэнэ.

Нютагаархид буруушаанагүй

Түнхэнэй аймагай засаг дарга Чингис Маншеев энэ асуудалай талаар зүбшөөһэн видео-хандалга бэшээд, арад зондоо тарааһан юм.

-Түнхэнэй хүреэлэнэй газар дээгүүр ямаршье барилгын ажал хэжэ болохогүй гэжэ хуулида бэшээтэй. Гэбэшье, тэрэ хүреэлэндэ аша туһа асарха түсэл байбалнь, хүнгэлэлтэ оруулагдаха юм байна. Нютагаймнай арад зондо тэрэ соргодо сэхэ хабсаржа, хүхэ түлишэ хэрэглэхэ арга байхагүй. Аймаг дотороо газ сэбэрлэлгын тусхай станци бариха болонобди, тэндэһээ багахан баллон руу тарааха аргатай байха, - гэжэ тэрэ хандалгадаа хэлэбэ.

Гэхэтэй хамта, Буряад Уласай Толгойлогшо Алексей Цыденов ПАО «Газпром» эмхиин түлөөлэгшэдтэй ажалайнгаа хэрэгээр уулзалга үнгэргэһэн юм. Тэрэ уулзалгын һүүлдэ Буряад Уласые газаар хангаха бүлэг байгуулагдаа, тэрэниие Засагай газарай Толгойлогшын орлогшо Евгений Луковников ударидаа. Хэзээ нэгэтэ хүхэ түлишэ манай нютаг хүрэжэ ерэхэ бэзэ