Алдар БАНЗАНОВ: «Ажал хэхэл хэрэгтэй»

Илангаяа Суулга нютагта Алдар Цыдендоржиевич БАНЗАНОВ хонин ажалаар хоолойгоо тэжээхэ хүсэлтэй 2020 ондо 100 толгой хони абаад, харюулжа эхилээ.

Нютагаа бусаад...

Хүдэржэһэн сагһаа хүнгэн бэшэ барилгын ажалда ябаһан аад, дүшэ наһандаа дүтэлөөд, хони үсхэбэрилжэ эхилхэб гэжэ Алдар ухаандаашье оруулаагүй ябаа. Эгэшэнь үхибүүдтээ эрдэм ном олгуулхаяа Улаан-Үдэ зөөшэхэдэнь, нагаса абынгаа нангин бууса яагаад хооһоор үлээхэб? Тэрээн тухай ухамайлһаар ябатараа, Хамбын хонид тухай дуулаад, нюдэниинь гансата ялалзашоо. Тиигэжэ Суулгынгаа сомон даргатай зүбшэлсөөд, хүршэ нютаг Алташаһаа Дадагма Нимаевна Дамбиеваһаа хонидые даажа абаха гэжэ шиидэһэн байна.

“Нэгэ жэл үбэлжөөд харааб. Гэмгүй ажал байна”, - гэжэ Алдар хэһэн тобшололоо хэлээдхинэ. Үнгэрһэн зун хура бороон элбэг байжа, урда жэлэйхиһээ үлүү һайн үбһэ тэжээл бэлдэжэ үрдеэ. Тэрээндээ ехэ олзуурхана. Теэд тиигэнгүй яахаб? Хонидынь хурьгалха ха юм. Тиимэһээ хүйтэн үбэлые дабамаар хүрэмэ үбһэн яаха аргагүй хэрэгтэй лэ! “Нёдондо үбһэн хоморшог байгаал даа. 3 аарбал бэлдээ һэмди. Теэдшье бараг ондо орообди. Энэ жэл 150 тюк нөөсэлөөд байнаб”, - гэжэ хонишон дуулгана һэн.

Гүүртэ байгуулна

Эхиндээ хэзээдэшье бэрхэшээл байгаал гүб даа. Урдань Суулгын совхозой гүүртын байһан Тахяагай фермэдэ газар абажа хорёолоод байна. Тэндээ малайнгаа байра түхеэрхэ юм. Эхи захагүй ажал хүлеэнэл даа. “Теэд ажал хээгүй һаа, хаанаһаа юун байхаб даа?” - гэжэ Алдар онсолно. Хооһон талада гүүртэ байгуулха гээшэ бэлэн бэшэл даа гэжэ ойлгуулна. Һаяын сагта түлеэ залһаяа бэлдэхэ хоорондоо хорёо хотондоо хэрэглэхэ модо бэлдэжэ үрдинэ. Саашадаа хонин ажалаа улам хүгжөөхэл түсэбтэй. “Энэ ажал бүри урид эхилхэ байгааб. Хойнотон алдааб”, - гээдхинэ.

Мал ажалаар гэр бүлэеэ тэжээхээр гээшэ гү гэжэ асуухадамни, иигэжэ харюусаба: “Мүнөө энээн тухай хэлэхэнь эртэ байна. Мянган толгой хонитой болоходоол, яһала олзо оршотой, барюубшатай байха”.

1. Хүдөөдэ үндыһэн хүбүүд шэрхи, бата. Алдар Банзанов эгээл тиимэ хүбүүдэй нэгэн юм. Түрэһэн нютагаа һэргээхэ хэрэгтэ хам ороод, ажалһаа сухарингүй, урагшаа зүдхэһөөр. Эхилһэн хэрэгынь бүтэсэтэй байг лэ!