Саха Уласай айлшад эмээл морёор Буряад орон хүрэбэ

Саха (Яхад) Уласһаа эмээл морёор холын Европо хүрэхэ һанаатай Дугуйдан Винокуров болон Мичил Неустроев хоёр нютагһаа гараһан юм.

Октябриин 28-да тэдэнэр Таксимо тосхон хүрэжэ ерээ һэн. Айлшадые буряадай, эвенк, ород арадай һайхан заншалаар нютагаархиднай тиихэдэ угтаа бэлэй. Холын хүйтэн Саха нютагһаа гараһан аяншадтай Константин Ноговицын Михаил Федоров хоёр хамтаржа, замда гаралсабад. Саха (Яхад) Уласһаа Москва, Санкт -Петербург хүрэхэ энэ хэмжээ ябуулгаяа түрэл уласайнгаа байгуулагдаһаар 100 жэлэй ойн баярта зорюулнад.

Эдэ бүлэг зон мүнөө Хурамхаанай аймагай Уланхаан нютаг хүрэжэ ерээд байна гэһэн мэдээсэл дуулдаба. Яхад үүлтэрэй шэрхи моридоор тэдэнэр хахад һарын туршада хада хабсагай дабажа, Буряад орон хүрэбэд. Эдэ хүбүүд тус хэмжээ ябуулгаараа яхад үүлтэрэй адуунай амаргүй шэрхи байһан тухай дэлхэйн зондо дуулгаха һанаатай. Хүйтэндэ эмээл морёор харгыда гараха гээшэ гайтай даа. Тиибэшье эдэ дүрбэн хүбүүд хээрэ газаагуур хүйтэ нойтондо ябажа һурамхи зон. Саашанхи аяншалгань һаадгүй урагшатай байг лэ даа!