​Найрлаха гүбди?

Шэнэ жэлые угтуулан, хаа яанагүй баярай үдэшэнүүд үнгэргэгдэдэг заншалтайбди. Хотын ажаһуугшад эгээл энэ һайндэрөө хаана, яажа үнгэргэхэбибди гэжэ ехэл һанаата болоод байна.

Ханяаданай тараһан сагһаа хойшо олоной хабаадалгатай хэмжээ ябуулганууд хорюултай гэжэ ойлгонобди. Хизаарлагдаһан хэмжээн декабриин 1 болотор үргэлжэлнэ. Харин тэрэнээ саашань һунааха гү, али үгы гү гэжэ засаг баригшад тодо харюу үгэнэгүй.

Үбшэнэй һүжэрһэнһөө бүхы юумэн дулдыдаха. Үбшэлһэн зоной тоо үсөөржэ эхилбэлнь, һайн тээшээ шиидхэгдэхэ. Энэ талаар ерэхэ долоон хоногто тусхай штаб үнгэргэгдэхэ, - гэжэ Буряадтахи таһагай Роспотреб-хиналтын түрүүлэгшын орлогшо Елена Кузьмина хэлэнэ.

Юумэнэй элирээгүй байгаашье һаань, кафе, ресторанууд найр нааданда уридшалан захилнуудые абажа байна гэһэн һураг суу тарана. Нёдондо иимэ хэмжээ ябуулгануудые үнгэргэхэнь мүн лэ хорюултай байгаа бэлэй.