Хилэ дээрэ-шэнэ хүүргэ

Нээлгын баяр ёһололдо Буряад Уласай Толгойлогшо Алексей Цыденов онлайн-гуримаар хабаадаа.

- Бултаниие энэ баярта ушараар – хүүргын нээгдэһээр амаршалнаб! Буряадай харгы замуудта саг үргэлжэ һаналаа табижа байдаг Россиин транспортын яаманда, Росавтодорто, «Урда Байгал» Упрдорто баяр хүргэнэб.  Хүлтүүг-Моондо федеральна харгы аймагайшье ажаһуугшадыешье, Түнхэнэй аймагта мянгаадаараа ерэһэн аяншалагшадыешье холбоно. Харгы замуудые барилга, заһабарилга аймагай экономикые хүгжөөхэ хэрэг болоно. Һаяын жэлнүүдтэ Моондын хилэ дабалгын пункт  уласхоорондын болохо юм. Тиин һаяын сагта гурбадахи оронуудай эрхэтэдтэ тэрэ нээгдэхэ, тиимэһээ аяншалагшадай тоо ехэ болохыень хүлеэнэбди. Аймагай хүгжэлтэшье шэнэ түлхисэ абаха. Хаана һайн харгынууд бэ – тэндэл ажабайдал, - гэжэ Буряадай толгойлогшо тэмдэглээ.

Хүүргын ута бүхыдөө 228 метр болоно. Үргэниинь 7 мэтрһээ 10 метр болотор үргэдхэгдөө, ябаган тротуарнуудшье 65 см байһан һаа, нэгэ хахад метр болгогдоо. Хуушан хүүргээр оройдоол  25 тонно тээбэритэй машинанууд ябадаг байһан һаа, мүнөө 80 тонно ашаатайгаар гараха аргатай болобо.

 Хүүргэ дээгүүр амяарлаһан барьернэ ба перильнэ хаалтанууд татагдаа, зайн гал носоогдоо, шэнэ тэмдэгүүд табигдаа, харгы хубааһан тэмдэгүүдшье зурагдаа. Харгы дээрэ  сугларһан уһа сэбэрлэхэ хоёр түхеэрэлгэ баригдаа.