Алтан шаргал талха таряагаа элбэгээр таридаг, табан хушуу малаа тала дүүрэн үсхэбэрилдэг энэ аймаг ажалша бүхэриг зоноороо үнинэй суутай. Зүблэлтэ засагай үедэ Алташада ажалаа эрхилжэ байһан һү һаалиин фермэ бүхы Буряад орон соогоо мэдээжэ байһан юм. Дайнай хүндэ жэлнүүдтэшье хүн зониие сагаан эдеэгээр хангадаг һэн. Тэрэ үедэ 200 толгой һаамгай үнеэдые Алташын эжынэр, басагад һаадаг байгаа. Дадагма Дамбиева мүн лэ үхибүүн наһанһаа энэ фермэдэ хүдэлжэ эхилээ. Хөөрүү, хүндэмүүшэ, хүхюун абари зантай Дадагма Нимаевнатай хэһэн хөөрэлдөөн - та олоной анхаралда.
- Бага балшар наһан гэхэдэ, тоонто нютаг, аба, эжы эжэлүүдгүй һанагдадаг.
- Тон зүб. Алташа нютаг тухайгаа хэлэхэдээ, сэдьхэлдэмни тэрэ дороо омогорхол түрэдэг. Дэлхэй дээрэ ондоо иимэ нютаг байхагүй. Түүхэ домогоороо баян Түгнын энэ газарта Хёлго эрьемнай хударан урдана. Манай аба эжынэр ухаатайнууд хадаа эгээл энэ газарта буусаяа түхеэрээ гэжэ һанагшаб. Ямаршье хүндэ үхибүүн наһан - эгээл жаргалтай хаһа. Эсэгэмни - Нима Цыренович Цыбанов, эжымни - Дашима Доржиева. Бидэ гэр бүлэдөө долоон үхибүүдбди. Тиихэдэ хамаг айл аймаг булта олон хүүгэдтэй байһан. Зулгыхан зунай сагта бүхэли үдэрөө гэхээр Хёлгынгоо эрьедэ наададаг һэмди. Ехэ багагүй. Бэе бэеэ хараад лэ, харюусалгатайнууд байгаабди. Аба эжынэр сүлөө забгүй - ажалдаа. Лаптаа, городки, дунда оруулха, скакалкаар һүрэлдэхэ гэхэ мэтэ наадануудые наадагша бэлэйбди. Наадажа садаад, гэрэйнгээ газаахи ба досоохи ажалые хэхэбди даа. Түлеэ залһаа хюрөөгөөр тайрадаг байгаабди. Уһаяа асарха ажалаа һайн мэдэхэбди. Гэр соохи ажал гээшэ баһал эхи захагүй. Үдэшын 6-7 саг болоходо, тугалаа асаржа хааха хэрэгтэй. Үдэшэ тээшээ гэртэхинэй ажалһаа ерэхэдэ, гэрэй хамаг ажал хуу хэгдээтэй байгаал даа. Долоон үхибүүдэй хоёрдохинь хадаа дүүнэрээ хараад лэ ябагша һэм.
- Суулгын дунда һургуу- лида эрдэм номдо һураа гүт?
- Эхин классуудые Алташадаа дүүргээб. Тиигээд табадахи ангиһаа Суулгын дунда һургуулида һурадаг болооб. Һуралсалай энэ гуламтада һуража гараһандаа, аргагүй ехээр бахархадагби. Юундэб гэхэдэ, тэрэ үедэ одоол дээдэ гарай, бурханһаа табисууртай багшанар байгаал даа.
Хүнэй ажабайдалда олон юумэн багшанарһаа дулдыдадаг гэжэ һанадагби. Тэндэ интернадта байгша һэм. Тиихэдэ Федосия Петровна, Дагба Дашеевичэй нүхэр, хүмүүжүүлэгшэ байха. Тиихэдэ хүмүүжүүлэгшэ ба багшанарнай маанадтайгаа ямар гоёор хөөрэлдэдэг байгаа гээшэб. Багшанарнай һурагшадтаа хамаг сэдьхэлээ үгэдэг һэн. Дагба Дашеевич үглөөнэй 6 сагта ерээд лэ, интернадта үхибүүдые бодхоохо. Тиихэдэ үбэл гү, зун гү – заал һаа зарядка хүүлэхэ. Үглөөнэй сэбэр агаарта нэгэ модо зайда гүйлдөөд ерэгшэ һэмди. Багшын урдаһаа дуугарха гэжэ байгаагүй юм. Булта томоотойнууд, аха хүниие хүндэлхэ хүмүүжүүлгэтэйнүүд ябагша һэмди. Федосия Петровнагай ударидалга доро гэрэйнгээ даабари дүүргэгшэ һэмди. Эгээл сэнтэйнь юун бэ гэхэдэ, ном үзүүлжэ һургаа. Хониной нооһо ээрэжэ, нэхэжэ һургаашье. Федосия Петровнагай хүтэлбэри доро оймһо нэхэжэ һураа хүм. Интернат соо мэдэһэн, һураһан юумэмни хамаг наһандамни хэрэгтэй болоо.
1988 ондо Саянаа түрөөд байхадаа (тэрэ үедэ юумэн гээшэ хомор байгаа), эгээл түрүүн оймһо нэхээб. Тиихэдээ Федосия Петровнагаа дулааханаар һанаа һэм.
- Буряадай гүрэнэй хүдөө ажахын институдта һуража, зоотехнигэй мэргэжэлтэй болоот. Юундэ иимэ мэргэжэл шэлээ гээшэбта?
- Алташынгаа һүнэй фермэдэ һургуулиин байхаһаа, эжыдээ туһалжа эхилээ хүм. “Һаалишадай ажалые яагаад хүнгэдхэхөөр гээшэб?»- гэжэ үшөө үхибүүн ябаад, бодолгото бологшо һэм. Һаалишадай ажалые ехэ хүндэлэгшэ һэм. Үглөөгүүр эртэ, үүрэй сайхын урда - 4-5 сагаар бодожо, үнеэдээ һааха даа. Тиихэдэл би зоотехник мэргэжэлтэй болохоб гэжэ һанааб. Тиигээд институт дүүргээд, мэргэжэлтэй болоод, түрэл нютагаа бусаад, ажалайнгаа намтар эхилээб. Тэрэ үедэ тиимэ олон зон дээдэ һургуулитай болодоггүй байгаа. Диплом абаад ерэхэдэмни, абамни ехээр баярлаа, омогорхоо.
Фермэдэмнай тэрэ үедэ амаргүй ажалша, мэдээжэ һаалишад хүдэлдэг байгаа һааб даа. Ленинэй, Хубисхалай орденуудтай һаалишан Сэсэг Гомбоевна Улзытуева, Чимитцу Ширипнимбуевна болон бусад. Иимэ суутай зонтой хүдэлхэ хубитай байгаалби даа. Сугтаа хүдэлжэ байһан аба эжынэрнай наһанайнгаа амаралтада гаража эхилээ. Залуу басагад, бэреэд хүдэлжэ захалаа. Тиигэжэ комплексые даагшаар олон жэлдэ ажаллааб. Тэрэ үедэ Пётр Лукич Носков директорнай байгаа. Шэнэ комплекс барижа үгөө һэн. Булта оролдожо, түсэбөө дүүргэдэг байгаабди. Ажалаймнай газарта саг зуура амараадшье гараха, хамаг байдал хуу зохёогдонхой һэн. Фермэ соомнай ариг сэбэрэй эрилтэнүүд дүүрэн сахигдадаг һэн.
- 1992 онһоо үмсын ажахытай болоот?
- Тиигээ даа. Хүдөө нютагта байгаад, яагаад хони малаа харангүй байхаб даа. “Мал хараха - ама тоһодохо» гэһэн урданай үгэ миин хэлэгдээгүй. Мал үсхэбэрилгын ажал гээшэ ямаршье институт дүүргэһэнһээ ехэ эрдэм байна гэжэ хэлэхэ байнаб. 2015- 2016 онуудаар хамба ламынгаа «социальна отара» гэһэн түсэлдэ хабаадажа, бүмбэр сагаан хонидойнгоо тоо толгой олошоруулжа, Түгнынгөө талын хүдэр хүбүүдтэ дам саашань дамжуулдагбди.
- Дадагма Нимаевна, энэ юртэмсэдэ эгээл сэнтэй юун бэ? Юун гэжэ һананат?
- Түрэл тоонто нютаг гэжэ хэлэхэ байнаб. 1988 ондо энэ нютагтаа Ванчик Бабасанович хани нүхэртэеэ энэ гэр байраяа баряабди. Угаа үргэжэлүүлхэ хоёр хүбүүтэйбди. Гэр бүлэтэйнүүд, ажалтайнууд. Энэ хэжэ байһан ажалыемнай хүбүүднай, ашанарнай үргэлжэлүүлхэ. Зунайнгаа амаралтада амтатайхан ашанарнай ерэнхэй. Долоон ашанарай аба эжыбди. Бэрхэнүүд, бидэндээ туһална. Тэдэнэртэеэ буряадаар лэ хөөрэлдэхэ гэжэ оролдонобди. Үргэжэ абаһан хүбүүднай бидэнтэйгээ ходо байдаг хадаа буряад хэлэтэйнүүд. Бэри басагадтаа ходо хэлэдэгби: “Эжы хүн үхибүүдээ буряад хэлэндэ һургаха ёһотой. Эжыһээ бэшэ хэн һургахаб? Үритэй хүн үгы. Өөрөөл өөрынгөө үхибүүдые һургаха хэрэгтэй».
- Дадагма Нимаевна, жаргал гэжэ юун бэ?
- Жаргал гээшэмнай иигээд лэ магазинда худалдажа байхагүй. Тиигээд бэлэн нэгэ тээ хэбтэжэ байхагүй. Жаргал гээшые үдэр бүри өөрөөл бии болгожо байха хэрэгтэй. Үглөөгүүр эртэ һэрихэдэ, ехэ жаргал. Гэр бүлэтэйгөө сайгаа уужа һууха -баһал жаргал. Хамаг жаргалнай - сэдьхэл соомнай.
- Һайнта даа, Дадагма Нимаевна, бэеын элүүр энхые, зол жаргалые хүсэнэбди.
- Тандаа баһал һайниие хүсэнэб. Ажалдаа амжалтатай, зол жаргалтай ябыт даа.
Автор: Дарья ЦЫДЫПОВА
Фото: Дадагма Дамбиевагай гэр бүлын альбомһоо гэрэл зурагууд