Зоргондоо ороһон мал

-Мүнөөдэр баһа тэндэ һүрэг мал бэлшэжэ байна. Эзэдынь хараха, тэдэнээ манаха ёһотой ха юм. Тээмэндэ хүүгэдэй наадаха газарта үхэр бэлшэжэ ябаһаар, багахан үхибүүе гэмэлтүүлээ. Үхибүүн Улаан-Үдэ хотодо эмнэлгэ гаража байна. Аймагай засаг даргын бэшээшэдэ үтэр хонходожо, гомдол барихамни. Туужа абаашаг лэ, яла тохог. Аяар 20 гаран толгой намдуугаар хибэлжэ байна. Тэдэнэй 5-иинь буханууд, - гэжэ нютагай ажаһуугша эхэнэр хэлэнэ.

Энэ бэрхэшээлые нютагай сомон дарга хараадаа абанхай.

- Мүнөө энэ «байлдаанда» үйлсөөр, амаралгын газарнуудаар бэлшэжэ ябаһан бодо мал «диилэжэ» байна. Ушарынь гэхэдэ, захиргаанай ажалшадһаа һураггүй олон ха юм. Хүдөөгэй захиргаанда, бассейн болон соёлой байшанда үхэр мал туужа байха хүнэй ажалай һуури үгы. Хэрбэеэ бүхы хүсэ шадалаа элсүүлжэ, бодо мал адуулжа байгаа һаамнай, хэн манай ажал хэхэб? Харша хорёоһоо үхэрөө туужа гаргажархёод, амар һуудаг хэды айл энэ зунай эхинһээ ялада унаһан байха. Теэд саашадаа үхэр малаа манаха гэһэн һэдэлгэшье гаргаагүй. Аяар 10 гаран иимэ ушар баримталагдаһан юм. Хамтын хүсөөр нэгэ арга бэдэржэ, энэ ушар усадхаха бэзэбди, - гэжэ Шэнэ-Бэрээн нютагай сомон дарга Татьяна Манаева хэлэнэ.

Харууһагүй бэлшэжэ ябаһан адуу мал гансашье энэ нютагай ажаһуугшадта һаалта болоно бэшэ, харин Буряадай олонхон сэлеэн тосхондо иимэ бэрхэшээлтэй дайралдадаг. Үнгэржэ ерэхэдээ, Улаан-Үдын гудамжада үнеэд бэлшэдэг, тэрэнь нюуса бэшэ даа. Зоргоороо бэлшэһэн мал талха таряалангай болон сабшалангай газарнуудта орожо түйбэнэ, сэсэрлигүүдые үзэмжэгүй муухай болгоно. Тиимэһээ малшаниие хүлһэлжэ, үхэр малаа манаха хэрэгтэй.