Хадын үндэрһөө

- Бүхы юумэнэй үшөө бэлэн болоодүйшье һаань, ерэхэ үбэлдөө хүн зон эндэ наадажа эхилхэ, - гэжэ тус түсэл бэелүүлжэ байһан хүн найдуулна.

Хадаһаа санаар һолжоржо наадаха арга олгуулагдахаhаа гадна, мэргэжэлтэ тамиршадта тон хэрэгтэй «Нургуш» гэжэ түб байгуулагдаха. Ураалай хадануу­дай нэгэ үндэр орьёл иимэ нэрэ­тэй. Эзэниинь тэрэ нютагһаа уг гар­балтай байжа, иимэ нэрэ үгэхэ гэжэ шиидэһэн байгаа бшуу.

- «Нургуш» гэхэдээ, торолжо байһан шубуун гээд тайлбарилагдана, - гэжэ шэнээр баригдажа байһан түбэй эзэн хэлэнэ.

Манай Буряад орондо эгээл дүтэ иимэ томо түб Эрхүү можын Байкальск хотодо ажаллана. Үбэлэй сагта манай нютагаархид тиишээ ошожо амарха, сэнгэхэ дуратай юм. Харин мүнөө Улаан-Үдэ хотодоо хадын үндэрһөө санаар һолжорхо дуратайшуулда угаа һайн болохонь.