![](/upload/resize_cache/iblock/2c3/780_780_1/hpq3qcx6zf24i4qzvr6ygk33eh4ooi1w.jpg)
-Буряадай гүрэнэй хүдөө ажахын академиин оюутад бодолнуудаа проект болгон бэелүүлхэ аргатай болобо. Эрхим түсэлнүүдые бэлдэһэн залуушуулда федеральна шүүмжэлэгшэд, олзын хэрэг эрхилэгшэд дүй дүршэлөөрөө хубаалдаха, энэ тэрэ шэнэ онол аргануудта һургаха, проектнүүдыень мүлилсэхэ. Энэ хэрэгыень Буряадай Үйлэдбэриин болон инвестициин яаман ехэ дэмжэнэ. Саашадаа проектнүүдынь уласайнгаа хүгжэлтэдэ хэрэглэжэ боломоор, гансашье хүдөө ажахыда бэшэ, харин бүхы һалбаринуудта, - гээд, уласай үйлэдбэриин сайдай орлогшо Виталий Хамарханов хэлэнэ.
Жэшээнь, гурбадахи курсын оюутан Маргарита нүхэдтэеэ хамта гэрэй амитадые саг зуура байлгаха амаралгын байра тухай түсэл бэлдэнэ. Нээрээшье, энэ хэрэг олоной бэрхэшээл болоо. Болбосон түхэлтэй гэртэ ажаһуугшад иишэ тиишээ амархаяа ошоходоо, амитадаа үлөөхэ газаргүй. «Энэ проектнай илажа, мүнгэн туһаламжада хүртэхэ бэзэ», - гэжэ мал эмнэлгын дээдэ hургуулиин гурбадахи курсын оюутан Маргарита Сидорчук хубаалдана һэн.
Ноябрь һарада эрхим ажалнууд шэлэн абтажа, удаадахи шатада орохо, илаһан проект 500 мянган түхэригтэ хүртэхэ аргатай.
Автор: Эрдэни РАДНАЕВ бэлдэбэ