Ерээдүйн оюутадта – онсо анхарал

«Буряад Уласай Толгойлог­шын болон Засагай газа­рай захиргаанай хороо­ной грантын ашаар хүдөөгэй залуу- шуулые хүмүүжүүлгэдэ нүлөөлхын тулада түсэл зохёогоод бэелүүлжэ байнабди. Тэдэнэй олонхинь – манай ерээдүйн оюутад ха юм. Мүнөө дээ­рээ 3 аймаг хүрөөд байнабди. Шэнэ жэлэй үмэнэ Мухар-Шэбэрэй болон Тарбагатайн аймагууд руу ошоод ерээ һэмди. Хаанашье бидэниие ду­ратайгаар хүлеэн абана. Бэшүүрэй 1-дэхи һургуулиин захирал Тамара Владимировна Зайцевада баяраа мэдүүлнэбди. Саашадаа Сэлэнгын, Зэдын, Хяагтын аймагууд руу ошо­хобди. Үбэр Байгалай хизааршье хүрэхэ һанаатайбди», - гээд, БГСХА- гай хари хэлэнүүдэй тэнхимые дааг­ша Сэсэг Гармаева дуулгана.

Бэшүүрэй аймагай юрэнхы һуралсалай 1-дэхи дунда һургуулида аяар 200 гаран үхибүүд хүдөө ажа­хын академиин багшанарай болон оюутадай бэлдэһэн мастер-клас- суудта оролсоо. Энэ хэмжээ ябуулгын дэлисэнь гансашье регион хоорон­дын бэшэ, мүн уласхоорондын болоо гэхээр. Юундэб гэхэдэ, Монголой оюутад һэеы гэр яагаад суглуулхаб гэжэ харуулаа, Тывагай оюутан хасагуудай ташуур гүрэжэ һургаа. Академиин багша Виктор Филиппо­вич Иванов шэмээшэгүүдэй урданай станок дээрэ бүһэ нэхэхыень үхибүүд ехэтэ һонирхожо хараа. Харюудань Шэбэртын болон Бэшүүрэй 1-дэхи һургуулинуудай шабинарай хабаа­далгатай һайхан тоглолто хараабди гээд, БГСХА-гай түлөөлэгшэд ехэ урматай. Бэшүүрэй хэдэн зохёо­хы бүлгэмүүдэй хүтэлбэрилэгшэ, нютагтаа ёһотоор үндэһэн заншалаа сахигша Александр Сидорович Утен­ков тоглолтые гансата шэмэглээ юм ха.