![](/upload/resize_cache/iblock/b12/780_780_1/w2oi3mk22z2qy1jcpsytiqzyg8kdh6tx.jpg)
Олон можо хизаарнуудhаа, хото городуудhаа, хүдөө аймагуудhаа делегадууд Бүгэдэ Буряадай үндэhэн соёлой эблэлэй саг зуура уялгануудые дүүргэгшэ юрэнхылэгшын элидхэл шагнаа. Зүблэлэй болон Хиналта-шалгалтын комиссиин гэшүүд мүн лэ тоосоо баряа. Оперо болон баледэй театрай үндэр тайзан дээрэ һанаа амаруулма үнэн һайхан үгэнүүд хэлэгдээ, дурадхалнууд оруулагдаа.
Өөрынгөө һанамжа Россиин Буддын шажантанай заншалта Сангхын дид-хамба лама Дагба Очиров иигэжэ хэлэнэ бэлэй: «Суглаанда сугларагшадай олонхинь буряадаа муу ойлгоно. Үхибүүдынь баһал муугаар ойлгоно. Харин аша зээнэрнай оройдоошье мэдэнэгүй. Юундэ тиинэб? Манайшье Ивалгын дасанда хубарагуудай 70 хубинь буряад хэлэгүй. Энэ манай тон ехэ бэрхэшээл болоод байна. Голхоролтойл байна даа. Түрэл хэлэ үзэлгэмнай доройтожол байна. Түрэл хэлэеэ һэргээхэ зорилготойгоор Буряад-ТВ, Буряад радио хэгдэһэн байна. Теэд үрэ дүн үгы».
Хэдэн тээшээ таhаршаhан буряад угсаатамнай энэ хуралда ерэжэ хабаадахадаа, сэдьхэл ехэ дээгүүр, урма баяр түрэнэ гэжэ хэлэнэд hэн. Москва, Санкт-Петербург, Новосибирск, Якутск болон бусад хото городуудhаа түлөөлэгшэд ерэжэ, съездын ажалда хабаадаа.
Хүршэ Монгол оронhоо 70 гаран хүн ерээ. Олон жэлэй туршада ВАРК-ын д и д - ю р э н х ы л э г ш ө ө р хүдэлжэ байhан Соёлсурэнгийн Билегсайхан эблэлэй эгээн түрүүшын хуралдаанда хабаадалсаһан хүн гээшэ. Мүнөө буряадуудай хүгжэлтэ, эблэрэлгэ, түрэл хэлэеэ үри һадаһадтаа яагаад дамжуулха тухай һанамжална бэлэй.
СО РАН ИМБТ-гэй эрдэмтэн Дамдин Бадараевай буряад арадай хүгжэлтын гол бодол тухай элидхэл эгээл һонирхолтой, гүн удхатай байгаа. Зарим тэды тэмдэглэлнүүдыень дурадхахамнай.
Мүнөө дээрээ буряад арадай эгээл шухала асуудал – буряад хэлэнэй байдал. Энэ талаар толинууд, шэнжэлгын хүдэлмэринүүд хэблэгдэнэ. «2021-2030 онуудта буряад хэлэ аршалан хамгаалгын болон хүгжөөлгын талаар гүрэнэй программын» хэмжээн соо социологуудай шэнжэлгэ хэгдээ. Тиихэдээ ганса Россиин бэшэ, мүн хүршэ Монгол орон болон Хитадай Хулун-Буирай ажаһуугшадые хараалаа. 2010 оной байдалтай зэргэсүүлхэдэ, буряад хэлэ мэдэгшэдэй тоо 50 хубяар дээшэлээ гээд элирүүлээ. Теэдшье шэнжэлгэнүүд тад ондоо байдал харуулна. Эрдэмэй хүреэлэнгэй түлөөлэгшэд элдэб хэмжээнэй экспертнэ комиссиин ажалда оролсоно. Хэлэ бэшэгэй эрдэмэй доктор Бабасан Цыреновэй хүтэлбэри доро Yandex-оршуулгада буряад хэлэн нэбтэрүүлэгдэжэ эхилэнхэй.
Һүүлэй сагта олониитэ Гэсэртэ анхаралаа хандуулдаг болоо. Арадай эпосые аршалан хамгаалха үшөөл хэрэгтэй гэжэ элирээ. Жамсаран бурхан болон Гэсэр хоёрой хоорондохи зүрилдөөнэй эшэ үндэһэнь уудалагдаа. Гэлүүгбын шажантанай Гэсэртэ харша һанамжатай гээшые элитэ академик Бямбын Ринчен буруушааһан байна. ИМБТ- гэй жасада хадагалаатай Гэсэрэй һалаануудые шэнжэлэгшэ Ц.П. Ванчиковагай баталан тэмдэглэһээр, «бүхы текстнүүд буддын шажанай нүлөөтэй». Түбэд, Хитад болон Монгол Уласуудай хороондохи шажанай-политическэ зүрилдөөндэ эхи үндэһыень бэдэрхээр гэжэ тобшолол хэгдээ. Буряад Уласай Засагай газарай һанамжатай эрдэмтэдэй тобшолол адли байна. Үндэһэн эпостээ гамтайгаар хандаха, хүгжөөхэ ёһотойбди. Соёлой энэ уута баялигайнгаа талмай байгуулаад, бүхэдэлхэйн хэмжээндэ дэлгэрүүлхэ байгаабди.
Буряад арад олон зуун жэлэй баян түүхэтэй, оюун ухаатай. Теэд мүнөө болотор эрдэмэй тулгатай, олоной дэмжэлтэтэй хүгжэлтын гол бодол (стратеги) үгы. 2019 онһоо ВАРК-ын Юрэнхылэгшын болон гэшүүдэй үүсхэлээр буряад арадай хүгжэлтын стратегиин түсэл зохёон байгуулагдажа эхилээ. Тиигэхын урда тээ бусад ондоо арадуудай стратеги шэнжэлэгдэһэн байна. Глобализациин тараһан сагта буряад арад дабташагүй онсо этнос гээшэбди гэжэ өөһэдыгөө аршалан хамгаалхаһаа гадуур Россиин болон дэлхэйн арадуудай дунда мүнөө сагай эрилтэдэ таарама, хүгжэнги үндэһэ яһатамди гэжэ бэеэ батаар харуулха ёһотой. Арад зоноймнай саашанхияа бодомжолхо саг ерээ. Таhаран амидаржа байhан буряад зон хоорондоо илгарха бэшэ, харин баян хэлээрээ, соёлоороо, ёhо заншалаараа хамтарха, нэгэдэхэ ёhотой, бэе бэеэ хүндэлхэ, сэдьхэлээрээ ойлголсохо үе тохёолдоод байна. Монголдо, Шэнэхээндэ байдаг буряад зонтоёо холбоогоо улам шангадхажа, «Алтаргана» наадандаа ха- баадалсаха, эрдэм hурал- салай болоод уран зохёолой номой андалдаа эмхидхэхэ, тэдэниие оршуулха ажал ябуулбал, ехэл hайн. Танай анхаралда харуулагдаhан «Буряад зоной хүгжэлтын гол бодолго» булта оролдожо, арад зондоо тараая гэжэ ханданаб!
Автор: Эрдэни РАДНАЕВ
Фото: Анна Огородник