![](/upload/resize_cache/iblock/172/780_780_1/ov9zyfof47m4j4ry41wk9jzwur1cqhir.jpg)
Энэ һургуулида бэлигтэй багашуул олоор һурадаг гэжэ мэдээжэ, тэрэ бэлигыень бүри дээшэлүүлхэ гэһэн зорилго һургуулиин захирал урдаа табинхай. Хүгжэмтэ һайхан дуунуудаа, үреэлнүүдээ үхибүүд аятай зохидоор гүйсэдхэнэ һэн.
Буряадай Үндэһэтэнэй 1-дэхи лицей-интернадай захирал Булат Шойнжонов иигэжэ хэлэбэ: «Энэ Сагаалганда анги ангяарнь хубаа- гаабди, жэшээлхэдэ, 5-6-дахи ангинууд Сагаан һарын эдеэ хоол бэлдэжэ, 7-8-дахи ангиинхид Буряад- та һуудаг уг изагууртанай хубсаһа хунар үмдэжэ, үреэл бэлдэхэ байгаа. Тиихэдээ үхибүүн бүхэн энэ Сагаалганда хабаатай болоно».
«7-8-дахи ангиин һурагшад Буряадай угсаатануудай хубсаһа хунар үмдэжэ, нютагуудай аялгаар хэлэхэ болоо. Багашуул яһала оролдожо, даабаринуудаа дүүргэхые оролдоо. Аман үгын баялиг харуулхын хажуугаар эдеэнэй баялиг харуулаа. Гэртэхин оролдожо, баян шэрээ бэлдээ: мяхан табаг, бууза, орёомог, хиимэ, үрмэ, элдэб янзын сайнууд, байгаалида ургадаг алим жэмэс, тэрэнээр буйлуулһан эдеэн жюриин урда дэлгээгдээ. Эдеэ бэлдэхэ хэрэгтэ гэртэхин хам оролсоһон байгаа юм ааб даа. Теэд тэрэ эдеэгээ бэлдэжэ байхадаа, үхибүүдтээ хөөрэжэ, харуулжа, ойлгуулжа үгэһэн байха бэзэ гээд найдагдана.
Буряад Уластамнай хэдэн жэлэй саана буряад һургуулинуудай эблэл байгуулагдаһан гээшэ. Сагаалганай үедэ баһал уулзалгын баяр эмхидхэдэг заншалтай. Байгша ондо тэрэ уулзалга мартын нэгэндэ үнгэрхэ. «Поселиин дунда һургуулиин дэргэдэ уулзахаяа бэлэдхэл хэгдэжэ байна», - гээд, Буряадай Үндэһэтэнэй 1-дэхи лицей-интернадай захирал Булат Шойнжонов хэлэнэ һэн.
Жюриин гэшүүд соо буряад хэлэнэй багшанар һуугаа, мүн тиихэдэ Ивалгын аймагай Поселиин дунда һургуулиин захирал Баир Ширапов оролсоо. Тэрэнэй хэлэһээр: «Манай һургуули иимэ үргэнөөр Сагаалганай баяр эмхидхэнэгүй, ерээдүй сагта хэхэл байхабди, харин мүнөө бага хэмжээндэ үнгэргэнэбди. Шэнэ һургуули ха юм даа, һаяхана үшөө нэгэ байшандаа орообди, эмхидхэлэй талаар асуудалнууд гаража ерэнэ. Эндэ хабаадажа байһан багашуулай толгойдо би буряадби гэһэн мэдэрэл түрэжэ, нютагһаа холо ябахадань, элиржэ ерэхэл байха», - гэжэ тэрэ хэлээ.
Буряад арадай эгээл ехэ һайндэр - Сагаалган гээшэ. Урда сагуудта монгол туургата арад зон түрэһэн үдэрөө Сагаалганаар тоолодог байгаа. Мүнөө ургажа байһан улаан бургааһаднай буряад хэлэеэ, ёһо заншалаа, уг изагуураа мартахагүй, саашанхи үри һадаһадтаа дамжуулха гэжэ ехэ найданабди. Мартахагүйн тула иимэ түхэлэй хэмжээ ябуулга- нууд үнгэргэгдэжэ байха ёһотой.
Автор: Эрдэни РАДНАЕВ
Фото: Эрдэни Раднаев