![](/upload/resize_cache/iblock/e0d/780_780_1/nquo430jvuxrskcvfgn6gwb0lstsvtjp.jpg)
Номой байгуулга харахада, эхинэйнь оролто үгэ, уншагшадта хандалга, С. Махабадаровагай зохёохы зам, ажабайдалайнь хүндэ хүшэр шата- нууд тухай ажаглалтануудые болон түгэсхэлыень Ц. Бабуева бэшэнэ. Харин ехэнхидээ энэ ном соо С. Махабадаровагай өөрынь намтар, тэрэнэй зохёолнуудынь, шүлэгүүдынь, үгүүлэл, зүжэгынь, нютагайнь зоной hанамжанууд, дурсалганууд ороhон байна. Бултанда хэрэгтэй, hонирхолтой ном болоо гэжэ тэмдэглэе.
С. Махабадарова гансашье уран шүлэгшэ, зохёолшо бэшэ, харин уг гарбалайнгаа жолоо баригша, арад зонойнгоо түлөө ородолжо ябаhан шанга удаган эхэнэр юм. Тус ном соо тэрэнэй удаган болохо хатуу уялга, наhанайнь хүндэ хүшэр шатанууд тухай уншажа, энэ хүн ямар ехэ бэрхэшээл дабажа гараhан бэ гэжэ ойлгохоор. Буряад арад зоной анханай мүргэл болохо бөө шажанай нангин харгытай байhан С. Махабадарова олон тоото бэрхэшээлнүүдые амин бэеэрээ гаталжа, өөрынгөө хуби заяа оложо, угайнгаа хэрэг эрхилжэ, сагаан hайхан сэдьхэлээрээ амитан зондо туhа хүргэжэ, арад зонойнгоо ёhо заншал hэргээжэ, сахижа ябаhаниинь гайхамаар hайшаалтай. Ном соо С. Махабадаровагай бөө мүргэлдэ зорюулhан шүлэгүүд, ёhо заншал, тэрэнэй удха, нютагтаа болон эжыдээ зорюулhан уянгата hайхан мүрнүүд ороhон байха юм. Тэрээнhээ гадна hонирхолтой үгүүлэл ба «Бугаалиин буурал эжы» гэhэн баhал бөө мүргэлдэ хабаатай зүжэг үгтэнэ.
«Уран зохёолшо миин түрэдэггүй, заабол саанаhаа бурханай үгэhэн абьяас бэлигтэй байха ёhотой», - гэжэ манай монгол туургата арадууд хэлсэдэг гээшэ. Угтай хүн заабол бэлигтэй байдаг ха юм даа. С. Махабадаровагай бэлиг түгэлдэр гээшэ угайнь нангин бэлэг болоно. Угаа уhанда хаяхагүй гэжэ манай арадай үгэ бии. С. Махабадарова мүнөө дээрээ мэдээжэ болоhон удаган, уран шүлэгшэ, хэдэн номуудай автор болоно. Буряад арадайнгаа ёhо заншалнууд тухай номуудые, уран шүлэгэй суглуулбари хэблүүлhэн. С. Махабадарова миин hуудаггүй, үдэр бүхэндэ шүлэг бэшэхэhээ гадна, буряад арадайнгаа түүхэ, заншал тухай hонирхолтой мэдээсэлнүүдые суглуулан байдаг.
Буряад хэлэн дээрээ бэшэдэг зохёолшодые бултадаа дэмжэн, буряадаараа уншадаг болоёл, нүхэд!
Энэ номой согсолборилогшо-авторнуудта Цындыма Дашиевна болон Светлана Аюровнада элүүр энхэ, ута наhатай, удаан жаргалтай ябахыень, ажал хэрэгтэнь аргагүй ехэ амжалта хүсэе!
Автор: Лариса ХАЛХАРОВА