Буряад хэлэнэй фестиваль

Сагаалган дүүрэхэ тээшээ болобо. Болбосоролой эмхинүүдэй эдэбхитэд тами­рай, соёлой, уран һайханай хэм­жээ ябуулгануудаар Сагаан һараяа үдэшэхэ гэжэ шиидхэбэри абаһан байна. Тиин Посели һууринай дун­да һургуулиин талмай дээрэ Сагаалганай һайндэр эмхидхэгдээ. Бу­ряад Уласай Угсаата соёлой шэглэлтэй болбосоролой эмхинүүдэй эблэлэй X фестиваль Буряадай Тол­гойлогшо Алексей Цыденов нээбэ.

– Үхибүүдые буряад хэлэн­дэнь һургажа, дурлал түрүүлхые оролдожо байһан гэртэхиндэ, үбгэд хүгшэдтэ, багшанарта баяр хүргэнэб. Фестивалиин нээлтээр таанадые амаршалнаб! Манай гүрэн дотор олон яһатан ажаһуудаг, тэдэнэй хэлэ жэнхэни хэбээрнь үлөөхэ шухала. Буряад ёһо занша­лаа, түрэл хэлэеэ сахин хамгаалжа шадабал, хүсэ шадалтай байхабди, - гэжэ Алексей Цыденов хэлэбэ.

Сагаалганда зорюулагдаһан X фестивальда «Манай нютагhаа Сагаан hарын мэндэ!» гэһэн амар­шалан мэндэшэлгын, «Гуурһанай гурбан нюуса...» гэжэ уран уншал­гын конкурснууд эмхидхэгдээ. Тиихэдэ «Ивалга нютагаар аян­шалга» гэһэн викторина, «Буряад Уласай Угсаата соёлой шэглэлтэй болбосоролой эмхинүүдэй эблэ­лэй Баатар – Дангина» конкурс эмхидхэгдээ. Дүн хамтадаа 500 хүн фестивальда хабаадаа, тэдэнэй олонхинь үхибүүд юм.

– Үхибүүд манай хэмжээ ябуулгануудые аргагүй ехээр хүлеэдэг. Мүнөөдэр, жэшээнь, анха түрүүшынхиеэ бууза бэл­дэлгээр конкурс үнгэргэбэбди. Һонирхолтойнь гэхэдэ, энэ кон­курсдо хабаадагшадай ехэнхинь - хүбүүд байгаа. Гэр бүлэнүүдтэ ара­дай ёһо заншалнууд сахигдаһаар гэжэ баярламаар байба. Хүн бүхэн бууза бэлдэхэ өөрын аргануудтай­шье һаа, ёһо заншалаа хүндэлхэ элинсэг хулинсагуудаймнай һургаал мартагдаагүй, - гэжэ Посе­лиин һургуулиин захирал Баир Ширапов тэмдэглэбэ.

Буряад Уласай Угсаата соёлой шэглэлтэй болбосоро­лой эмхинүүдэй эблэл буряад хэлэеэ энэ зандань үлөөхэ, дэлгэрүүлхэ зорилготойгоор 2014 ондо байгуулагдаһан байна. Энэ хүдэлөөн хүгжэһөөр. Эблэлэй бүридэлдэ Буряад Уласай 15 һургуули ороно. X фестивалиин үнгэргэгдэжэ байһан үдэр Яруунын аймагай Иисэнгын дунда һургуули эблэлэй бүридэлдэ оробо.