Түрүүшын бураздаа хахалагдаба

Зэдын аймагта 10 жэл элдүүрилэгдээгүй шэнэ газар ашаглажа эхил­хэнь. Бүхыдөө аймагта 7,5 мянган гектар шэнэ газар элдүүрилхэ. Бу­ряад Уласта хахалагдаха газар 18 ху­бяар ехэ болоо - 139,9 мянган гектар талмайда таряа тарихаар хараалаг­дана. Нёдондонойхитой сасуулбал, 21,2 мянган гектараар гү, али 18 хубяар ехэ болоно. Энэ шухала удха шанартай үрэ дүн. Бидэ урдаа бар­дам түсэбүүдые табинабди, ямар аймагуудта хэн хэды таряа тарихаб гэжэ ойлгонобди. Хүдөө ажахынхид­та туһалжа, 400 сая түхэригэй мүнгэн дэмжэлтэ үзүүлээбди. Уларил һайн байжа, таряанай һайн ургаса аба­хабди гэжэ найданаб, - гэжэ Алексей Цыденов тэмдэглээ.

Мүнөө жэлэй түрүүшын бураз­даа хахалха эрхэдэ «Наследие» гэжэ хизаарлагдамал үүргэтэй эмхи хүртэбэ. Эндэ эбэртэ бодо мал ша­хан тэжээлгын комплекс барихаар түсэблэгдэнэ, тиимэһээ шанартай ехэ тэжээл хэрэгтэй болохо. Россель­маш түхэлэй табан трактор газар ха­халаа. Саашадаа 6500 га хүдөөгэй газар ашаглагдахаар хараалагда­на, 5000 толгой эбэртэ бодо мал тэжээгдэхэ, мяха, орооһото культурануудай үрэһэн үйлэдбэрилэгдэхэ, тэ­жээл бэлдэгдэхэ. 2040 он болотор 524 сая түхэригэй хүрэнгэ шэглүүлэгдэхэ юм. Үйлэдбэри Буряад Уласай фермернүүдһээ, ажаһуугшадһаа ту­галнуудые худалдажа абаад, шахан таргалуулха, удаань мяхаяа наймаан­да табиха.

Һануулхада, Буряад Уласта 2-дохи жэлээ таряанай һайн ургаса абана. 2023 оной дүнгүүд һүүлшын 23 жэлэй дээдэ зэргын амжалта сохёо, бүхыдөө 140,6 мянган тонно таряан абтаа. 2022 онтой сасуулбал, 20,5 хубяар ехэ. Гектарһаа 20,7 центнерээр жэгдэрээ (дээдэ зэргын амжалта 1988 ондо тэмдэглэгдээ һэн – гектарһаа 18,0 ц, 2021 ондо – 18 ц), хартаабхын ургаса – гектарһаа 150 ц, огородой эдеэн– гектарһаа 314,1 центнерээр жэгдэрээ.