Дээрэһээ доошоо таталагдадаг ушарһаа “босоо” (бодомол) бэшэг гэгдээ. Босоо бэшэг - мориной гүйдэл дундашье зурамаар хурдан бэшэг, хабтайжа хэбтээгүй, эмниг мориндол өөдөө соройһон, саарһанда гамтай бэшэг. Мүнгэшэ дарханай һиилэһэн угалза мэтэ харагдаад, нюдэнэй шэмэг болодог, ородоор “монгольская вязь” гэгдэнэ, харин “арабская вязь” гэжэ хажуу тээшээ хэбтэдэг бэшэгһээ босоо - бодомол шэнжээрээ илгарна.
Арбаад гэхээр зуун жэлэй туршада монгол бэшэгтэй үльгэр түүхын, шажан номой, уг гарбалай, ажал хэрэгэй гэхэ мэтэ баримтата гар бэшэгүүд, хэблэмэл сударнууд яар ябта сугларанхай хэбтэнэ. Зүгөөр тэрэнэй нэгэ багахан хубинь лэ оршуулагдаһаниинь харамтай. Тиимэһээ энэ ехэ энжэһээ хэн нэгэнэй хүрбүүлһэн, оршуулһан зүйлнүүдые туйлай үндэрөөр сэгнэмээр.
Сэмжэд Доржиевна Гуробазарова анхан арбаад наһандаа ахадаа заалгаһаар, торон тогтонгүй улам саашань шудалһаар, һайн монголшо боложо шадаа гэхээр. Хожомшог түрэһэн байбал, сохом нэрэ солотой востоковед-монголовед эрдэмтэн боложо тодорхо байһаниинь элитэ.
Сэмжэд Доржиевна тухай хүсэд һайнаар мэдэхэгүй байтар, тэрэнэй дүү хүбүүн, эрдэмтэ зоотехник, сэдхүүлшэ, багша, литературна критик Эрдэни Цырендоржиевич Бальжинимаев 1967 ондо “Буряад үнэн” сониндо эгэшынгээ намтар толилуулһан байжа, аргагүй ехэ туһа болоо. Табяад жэлэй урда гараһан газетэдэ ехэ ахынь хүбүү бэри Дамби, Нина Цыбиковтэн хуулбарии- ень хайшалжа хадагалһаниинь, юунһээшье сэнтэй бэлэг байба.
Тус статья соо хэлэгдэһээр, Сэмжэд басаган 1923 ондо бурюуха хүбдүүд угай Доржын Гуробазарай үри боложо түрэһэн. 6-дахи ангида һуража байтарнь, ахань хэбтэриин үбшэн боложо, һургуулиһаа болиһон. Цыбикжаб ахаяа аргагүй сэбэр наряар харууһалха сагтань ахань өөрөө хүсэлжэ, “хожомой үедэ шамда туһатай болохо” гэжэ дүүдээ монгол бэшэг заажа үрдиһэн. Саашадаа Эгэтын-Адаг нютагай Хангир гэжэ аршаан булагаар дэлбэрһэн арюун газарта хамтын ажалай амта танижа бэежээ. Дайнһаа бусаһан залуу офицер Гончик Хамаевич Жамьяновтай танилсажа, айл болоһоной удаа Үльдэргэ нютагта түбхинэһэн.
Сэмжэд Доржиевна магазинда, һургуулида хүдэлжэшье байха сагтаа хуушан монгол бэшэгээ орхёогүй, мүн дээрэһээнь түбэдөөршье уншажа һураа. Зүблэлтын үедэ худам монгол бэшэг ула болоһон хуушанай зүйлдэ тоологдоод, тэрэниие үзэхэ хүсэлтэй хүнүүд “тархинь муудаа” гэхэһээ нааша хүндэ шоо үзүүлхэ зэргэтэй һэн. Хэды иимэ сагта байбашье, Сэмжэд Доржиевна хүнэй хорон хэлэнһээ айгаагүй, хүсэл зоригоо мүхөөгүй. Буддын шажанай номуудые, үльгэр домогуудые уншажа, угайнгаа һарбаалжан согсолжо ябаа. Өөрөө бэе, хэлэн, сэдьхэлээ тон һайханаар сахижа, дүйсэн үдэрнүүдые алдангүй масаглажа, махабодын хатуужал баримталжа ябаһан.
Осорма ашынь хэлэһээр, шүдэндэ торсолдохо юумэ эдидэггүй байгаа гэхэ. Монгол бэшэгтэй ном судар юрэ уншаад гарадаггүй, һургуулиин шабинарай нарин бүдүүн дэбтэрхэнүүдые хэрэглэн, бэхэ гуурһаар номой удхые кирилл үзэг дээрэ хүрбүүлжэ һуудаг һэн.
Тэрэ 2018 ондо Оюна Балдандоржиевна аша басагандаа һайханаар үргүүлһээр, 95 наһа хүрэтэрөө нэгэтэшье миин һуугаагүй, номоо уншаһаар, хүрбүүлһээр, һонор са- рюун зандаа бурханай орондо заларһан. Аша зээнэрэйнь, нютагай зоной хэлэһээр, өөрынгөө юумэ дорохоноо оршуулжа һуугаагүй, мүн олон эрдэмтэд, зохёолшодой, танигдаагүй зонойшье ерэжэ, энэ тэрые һуража, оршуулжа үгэхыень гуйхада, нэгэтэшье арсадаггүй байһан ха. Мэдэхэ, таниха зонһоо үльгэршэн Рыгзен Эрдынеев, зохёолшон Сергей Бахлаев, эрдэмтэн Ширап-Нимбу Цыденжапов гэгшэд ерэдэг, зүбшөөл һурадаг, оршуулга хүүлэдэг һэн.
Сэмжэд Доржиевна наһанайнгаа эсэсэй дүтэлһые мэдэхэдээ, арбаад дэбтэрхэнүүдые ашанартаа һарбайжа, “эдээнииемни хожом ном болгожо гаргаарайгты” гэжэ захяа һэн. Улзыма Семёновна ба Оюна Жаргаловна аша басагадынь тэдэнииень арбаад жэлдэ наряар хадагалжа байтараа, сагай ерэхэдэ гаргажа, сахим сүлжээнэй-электронно түхэлдэ оруулаа. Ном болгохын тулада мүнгэн хэрэгтэй боложо, угайнгаа аха заха болоһон Дамби Гуробазарович Цыбиков энэ сагай эрхээр хүнгэн бэшэ уялга даажа абаба. Тиин Цыбиковтэн, Гуробазаровтан, Бальжинимаевтан, Бардуевтан болон бэшэшье түрэл гаралнуудынь яаралтай түргөөр мүнгэеэ суглуулжа захалаа. Гончик Хамаевич Сэмжэд Доржиевна хоёрой Үльдэргэ нютагта ажаһууһан хадань, тэндэхи зон үнэн зүрхэнһөө дэмжээ: Анна Чимитдоржиевна Цыденова, Виндарья Ринчиннимбуевна Доржиева-Кимэй, Цырма Ринчиновна Лыктыпова, Долгор Жанчиповна Тудупова, Жанна Чимитовна Дымчикова, мүн Үльдэргын захиргаанай зүгһөө Эржэн Токтохоевна Жамбалова, Долгор Сандаковна Доржиева, Цырендулма Дашанимаевна Чимитова, Туяна Бальжинимаевна Жанчипова.
Тиигэжэ зон нүхэдэй дэмжэлгээр буянтай һайхан, сэсэн мэргэн Сэмжэд абгайн ном ИП Бальжинимаевай “Фактор” гэһэн Хэблэлэй гэртэ барлагдажа, дизайнер Баяр Батуевай хүсөөр янзалуулан “нара хараба”. Номой түсэлые Дамби Гуробазарович хүтэлжэ, Цырен-Ханда Дарибазарова тааруулан хинаба. Тус номой 210 хуудаһанда кирилл бэшэгтэ оруулһан, мүн түбэд (Жаргал Дугданов) ба монгол бэшэлгэ (Валерий Шагдаров) элсүүлһэн шажанай номууд, лүндэнгүүд, 18-дахи зуун жэлдэ Бээжэндэ гараһан, буддын шажантай холбогдоһон монгол бэшэгтэй “Абай Гэсэр хаан”, уг гарбалай домог болон һарбаалжангуудай зурагууд гэхэ мэтын зүйлнүүд оронхой. Номой урда, хойто гадарай зурагуудые Валентина Новикова бэелүүлжэ, Оюна Намсараева Хэблэлэй газарта хүргэбэ. Досоохи үнгэтэ 16 хуудаһанай гэрэл зурагуудые хамта олоороо суглуулан табиба.
Дуйнхор хуралай хурагдажа, сагай хүрдын эрьелдэхэ үдэртэй барилдалгын хүсөөр тохёолдон, Үндэһэтэнэй номой сангай һаруул танхим соо шэнэ ном тоглогдобо. Дэмбэрэлтэй хэрэг бүтээлсэхэеэ Сэмжэд абгайн түрэлхидэй уряалаар Уран зохёолшодой холбооной түрүүлэгшэ Сергей Доржиев, тус эмхиин нарин бэшээшэ Дмитрий Кушеев, мэдээжэ нэрэ солото артистнууд: Буряад драмын зүжэгшэн, дуушан Дамба-Дугар Бочиктоев, дууриин дуушан Лидия Галсанова, Буряадай АССР-эй габь- яата артист, Оросой Холбоото Уласай искусствын габьяата ажал ябуулагша Сергей Бальжанов гэгшэд ерээ. Ерэһэн айлшад һайхан дурсалгануудые хэлэжэ, ая дуугаа дуулажа, булта үреэл үгэеэ хэлэжэ, жэгтэй дулаахан оршондо тоглолто үнгэрбэ. Тус үйлые урагшатай зохидоор хүтэлһэн ород хэлэнэй багша, номой харюусалгата редактор Дарима Эрдынеевнада ба энэ гоё һайхан ордондоо угтан абаһан Үндэһэтэнэй сангай ажалшадта халуун баяраа мэдүүлнэбди.
Автор: Цырен-Ханда ДАРИБАЗАРОВА
Фото: Цырен-Ханда Дарибазаровагай дурадхаһан гэрэл зурагууд