Буряад ороноо харуулаа
Өөрөө Аюна Халудорова 36-тай эхэнэр гээшэ. Багаһаа хойшо тайзан дээрэ гараха һанаатай байһанаа тэрэ абаһаар лэ мэдүүлнэ. Иимэ арга боломжо һаял тушаалдаһан байна.
2023 ондо “Pushmina Models” гэһэн агентствэдэ һуража, бэеэ туршаа. Түрүүшын алхамуудые хэжэ байхадань, агентствын дарга Мария Пушмина хэдэн шабинартаа “Топ-модель Бурятии. Мировая модель” гэһэн урилдаанда хабаадахыень дурадхаа. Иигэжэ Аюна өөрөөшье ойлгонгүй, томо хэмжээ ябуулгада хабаадаха эрхэдэ хүртөө.
“Һаял эхилжэ байһан хүнүүдтэ амжалтанууд дуратай” гэһэн арадай үгэ дэмы хэлэгдээгүй. Тиигэжэ Аюна гол шанда хүртэжэ, Буряадһаа уласхоорондын урилдаанда хабаадаха эрхэтэй болоо.
Майн эхиндэ “Мировая модель-2024” гэһэн уласхоорондын урилдаан үнгэрөө. Буряадай юһэн һайхан модель хүбүүд, басагад, эхэнэрнүүд түлөөлжэ, гурбаниинь өөрын наһанай бүлэгүүдтэ шалгараа.
- Урилдаанда хабаадахын урдахана бэлэдхэл өөрөө хээб. Нэн түрүүн бүхы интернет-магазинуудта хубсаһа хунар, элдэб гоёолтонуудые бэдэрээб. Улаан-Үдынгөө наймаанай бүхы түбүүдээр ябааб. Түрүүшын шатада бидэ өөрыгөө танилсуулхадаа, нютагайнгаа бэлэг барюулха байгаабди. Этигэлэй Хамба ламын Ордонтой этнопанно, үбэлэй мүльһэтэй Байгал далайн открытка абаад ошооб. Буряад нютагаа хөөрэжэ, бултаниие гайхуулһан байнаб. Мүн Буряад Уласай туг абаад ябаабди. Хоёрдохи шатада совет үеын хубсаһа үмдэжэ харуулха даабари үгтэһэн байбашье, эмхидхэгшэдтэй харилсажа, буряад хубсаһаараа гарахаяа хөөрэлдөөб. Хэдэн үдэр хореографтой хүдэлжэ, тоб байса ябадалаа зохёо- гооб. Гурбадахи шатада бидэ үдэшын плати үмдэжэ, тайзан дээгүүр ябаабди. Хэды айжа, һалганажа байгаад, тайзан дээрэ гараашье һаа, бүхы хэхэ юумэеэ хүсэд харуулжа шадааб, - гэжэ модель Аюна Халудорова урилдаан тухай хөөрэнэ.
36-40 наһанай хабаадагшадай эхэнэрнүүдэй дунда буряад угтай басаган гол шан - Гран-придэ хүртөө. Москва хотын Шэнэ Арбат дээрэхи эгээл томо “Октябрь” гэһэн моодо харуулалгын танхимай тайзан дээрэ бүхы дэлхэй дээрэ мэдээжэ Сергей Зверевэй гарһаа гол шан абахадань, сугтаа ошолсоһон наһанайнь нүхэр, үхибүүниинь эжыгээрээ урмашан һуугаа.
- Иимэ томо мүрысөөндэ хабаадахадамни, түрэл гаралнуудни тон ехээр туһалаа. Шулуута нютагай, Түнхэнэй аймагай арад зон намайе һайнаар танихашьегүй һаа, мүнгэ суглуулжа, намда эльгээгээ. Буряад Уласай Арадай Хуралай хорооной түрүүлэгшэ Александр Владимирович Бардунаев, Түнхэнэй аймагай захиргаан, илангаяа засаг даргын орлогшо Арюна Базаровна Зарбактаева, Буряадай гүрэнэй эмхи зургаануудай хүдэлмэрилэгшэдэй профсоюзой хүтэлбэрилэгшэ Майя Саяновна Махеева өөрынгөө талаһаа намда туһаламжа үзүүлһэн байна. Бултандань баярые хүргэнэб. Өөрынгөө амжалта нэн түрүүн гэр бүлэдөө, нүхэдтөө, нютагаархидтаа зорюулнаб, - гэжэ Гран-придэ хүртэгшэ баяраа мэдүүлнэ.
Багаһаа азатай
Дэлхэйн модель Аюна Халудорова Түнхэнэй аймагһаа уг гарбалтай байһанаа мэдүүлнэ. Тэрэ Саха Уласай Нерюнгри хотодо түрэһэн.
- Багаһаа хойшо тайзан дээрэ гараха дуратай басаган гэжэ түрэл гаралнуудни хэлсэдэг байгаа. Элдэб юумээр микрофон хээд лэ, өөрыгөө бултанай урда танилсуулаад лэ, хатараад, дуулаад үгэдэг байһан тухаймни эжы абамни хөөрэдэг. 6-дахи класста һуража байхадамнай, ажалаймнай багша нэгэ адли бэетэй басагадуудые суглуулаа. Конфетын саарһа суглуулаад, бултандамнай плати хээд үгөө. Тэрэ бүтээлыень үмдэжэ, гол модель болоод, нэгэл дахин тайзан дээрэ гараа һэм. Юуб гэхэдэ, эжы абамни түрэһэн Шулуута нютагаа бусаа бэлэй. Нерюнгридэ уран зурагай хүүгэдэй һургуулида һурагша һэм. Орхихо баатай болооб, - гэжэ Аюна басаган эдир наһаяа дурсана.
Түрэл һайхан Түнхэндөө Аршаанай лицейдэ һурал- салаа дүүргээ. ВСГУТУ-да зочид буудалай болон аяншалгын хүдэлмэрилэгшын мэргэжэлтэй боложо гараа. Удангүй БГСХА-да орожо, “финансы и кредит” таһагта һураһан юм. Теэд эдэнь һанаандань таарама бэшэ мэргэжэлнүүд байшоо.
- Оюутан ябахадаа, моделиин һургуулида ябаад туршааб, хүсэд ябагдаагүй. “Дангинын” урилдаануудта хэдэн дахин хабаадааб.
Хадамда гараад, үхибүүтэй болоод һуухадаа, бэеэ бүхы талаһаань шэнжэлжэ эхилээб. Өөрөө өөрыгөө хүгжэлтын замда гаргаха хэрэгтэй гэжэ ойлгооб. Энээниие бүтээхын тулада дуратай ажал хэрэгээ хэдэг болохоёо шамдааб. Нэн түрүүн багаһаа хойшо зурадаг хадаа зураашан болохоёо һанааб. Гоёор хубсаһанай эсхэбэри зураад, өөрын коллекци бүтээхэшье һанаан байгаа. Минии аба фотоаппарадаараа элдэб юумэ хаанаһаа, хайшан гээд сохихоб гэжэ багаһаамни һургаһан юм. Энэшье харгыгаар урагшаа дабшахамни гээд һанааб. Иимэ хэдэн тэнсүүри зосоогоо дабажа гарааб даа. Тиигэжэ һүүлэй һүүлдэ модельнэ агентствэдэ һурахаяа орошооб. Эндэ хүнэй наһые, туранхай тарганиие, үндэр набтарые харадаггүй. Эрэшүүлшье иишээ ябаха аргатай. Одоошье дуратай юумэеэ олооб. Алишье наһандаа һанаһандаа хүрэхэ хэрэгтэй, - гэжэ Аюна Халудорова зосоогоо болоһон тэмсэлгэеэ дуулгана.
Мүнөө үедэ модель басаган хэды мэдээжэ, нэрэ солотой болобошье, “ANGARA MODELS” агентствэдэ үшөө бүри дүршэлтэй болохо гэжэ һуралсалаа үргэлжэлүүлнэ.
Аюна гэр бүлөөрөө Аюша Самбаевич, Лариса Ринчиновна Ардуева эжы абадаа жэл бүри ошодог заншалтай. Түрэл һайхан Түнхэн нютагһаа хүсэ шадалтай болоод ерэдэг.