Эхинһээ эдэбхитэй, ажалша, дууша солотой

Эхинһээ эршэ ехэтэйгээр эм­хидхэлэй ажалда хам ороһон, БГПИ дүүргэһэн бэеын тамирай багша 11 жэл соо түрэл ню­тагтаа амжалтатай хүдэлжэ, һургуулиингаа хүмүүжүүлгын талаар захиралай орлогшо боложо, бэрхэ спортсменүүдые хүмүүжүүлһэн га­бьяатай. Эдэбхи үүсхэлтэй мэргэ­жэлтэниие Могойтын откормочно совхозой партбюрогой секретаряар томилһон юм.

Шударгы хүдэлмэреэрээ шалгаржа...

Талаан тудажа, Могойтын со­вхозой бэрхэ захирал Бабудоржо Жамбалович Жамбаловтай дай­ралдажа, тус ажахынгаа шударгы ажалда шунан оролсоһон, дайнай ветеран Дарма абадаал адли ажал­ша, малша Мунко-Жаргал Дарма­ев һургуулиинь заһабарилгые суг түгэсхөө. Хүдөө ажахын бэрхэ мэргэ­жэлтэй боложо, стадион, клуб, мүн малай байрануудые олоор барижа, таряан ажалаа үргэдхэжэ, ехэ амжал­та туйлаа бэлэй. Тиимэ богонихон ху­гасаа соо ажахыгаа үйлэдбэриин совхоз болгожо, гурба мянган хонитой, 300-400-гаад үхэр, адуун һүрэгтэй боложо, үбһэ тэжээл элбэгээр бэл­дэжэ, түрүү һуурида гараһан совхо­зойнгоо ажалшадые урмашуулан, клубтаа хүгжэмтэ түхеэрэлгэнүүдые абажа, хатарай үдэшэнүүдые үнгэргэдэг байгаа. “Элбэг хүрэхэ се­наж, силос хоёр-гурба дахин ехээр бэлдэжэ, Яруунын, Захааминай ай­магуудтай хэлсээ баталжа, модоорнь андалдажа, олохон гэрнүүдые эндээ бодхоогоо бэлэйбди. Совхозоймнай олзо оршо 37 процентээр дээшэлээ һэн”, - гэжэ залуу, эршэтэ наһаяа дурсан байжа, бэрхэ эмхидхэгшэ хөөрөө һэн.

Холын газарта ходол түрүү зэргэдэ

“КПСС-эй ЦК-гай дарга Смир­новто бэшэг бэшэһэмни, Туркме­ниин Марын областиин даргатай хөөрэлдэжэ үгөө, тиин тэндэхи пар­тиин обкомой нэгэдэхи секретарь Г.Д. Оразов урилга эльгээжэ, ерээдүйн ажалаа тэндэ хэлсэжэ ерээб. Ехэ басага­яа Туркменидэ хадамда үгэжэ, түрэ нараа хээд, тиишээ зөөгөөбди. Тур­кмениин Байрам-Али хотын (суута сэдхүүлшэн, арадай поэт Цырен­дулма Дондогой тиишээ айлшалаа бэлэй) Бэеын тамирай талаар коми­тедэй түрүүлэгшээр би һунгагдажа, нэн түрүүн стадион барилгын ажа­лые арадай хүсөөр эмхидхэжэ, за­водуудай, эмхи зургаануудай, һур- гуулинуудай дарганар, ажалшад хабаадажа, хахад жэл соо барилгаяа бүтээгээ бэлэйбди”, - гэжэ омогорхон хөөрэһэн Мунко-Жаргал Аюшеевич холыншье газарта мүхөөгөө үгтөөгүй, бүри оролдосотойгоор ажаллаба.

Москва М-Ж.А.Дармаев коман­дировкодо ошожо, тэндээ хэлсээ баталжа, спортсменүүдэй гүйлдэдэг тартан дэбисхэр стадиондоо оло­жо, мүнгэнэй асуудал Байрам-Али­даа шиидхээ бэлэй. Үшөө тиихэдэ бүхы һургуулинуудай бэеын тами­рай багшанарые суглуулжа, бүмбэгэ үдьхэлдэг ногоон поли хэхэ тухай хэлсэһэнэй удаа богонихон болзор соо тэрээнээ бүтээһэн габьяатай...

Түрэл арадаа, гэр бүлөө үргөө, дэмжээ

...Улаан-Үдэеэ бусажа, гэр бүлэдөө гэр байра бэлдэжэ түбхинэһэнэйнгээ удаа Президентын аппарадта до­лоон жэл хүдэлхэ үедөө инженер- барилгашанай ажалтай болоһон Мунко-Жаргал Аюшеевич байшан­гайнь заһабарилгын хүдэлмэриие бэе дээрээ даажа абажа, хушал­тынь хуушарһан шифернүүдыень һэлгэһэн, тиин евро-сонхонуудые табюулһан, бусад ажал ябуулһан юм.

Наһанайнь нүхэр 1971 онһоо олон жэлдэ БГПИ-гэй психологиин багша- эмхидхэгшээр амжалтатай хүдэлһэн, 1980 ондо Ленинградай А.И. Герце­нэй нэрэмжэтэ институдай аспи­рантура дүүргээд, нютагаа бусаһан Эльвира Бальжинимаевна Аюрова олон оюутадые һургажа гаргаһан алдартай. СССР-эй Верховно Сове­дэй депутат ябаһан, республикынгаа болон олон аймагуудта харюусалга­тай тушаалнуудые эзэлһэн, Ажалай Улаан Тугай ордендо хүртэһэн Баль­жинима Тудупович эсэгынгээ (мүнөө 100 наһанайнь хүндэлэлдэ) нэрые дээрэ үргэжэ байһан Эльвира Баль­жинимаевна 30 жэлдэ суг ажаһуужа байһан Мунко-Жаргал Аюшеевич нүхэрөө ходол дэмжэжэ, хоюулаа ма­най “Тоонто” ансамбльдамнай дуу­лалдадаг байгаа. Бидэниие Виктория басагантаймнай, Лиза, Марк зээнэр­тэймнай Түнхэнэй аймагай Жэмһэгтэ өөһэдынгөө олон таһалгатай гэр­тээ хэдэн жэлэй саана зундаа амаруулһан, концертнүүдээрээ жаргуулһан, сэнгүүлһэн Дармаевтанай бүлэдэ, нүхэдтөө баяр хүргэн ябадаг­бди.

2006 ондо түрүүшын Прези­дент Потаповай захиралтаар хүнгэн хүлтэй, урагшаа һанаатай, урма зо­ригтой Мунко-Жаргал Аюшеевичые ВАРК-ын вице-президентээр, харин Монголһоо бусаһан Г.Н. Манжуев президентээр һунгагдажа, түрэл арадайнгаа түлөө ехэ ажал ябуулаа, хоёр округой болон республикын зоной хабаадалгатай буряад хэлэ­нэй түрүүшын һайндэр, Сагаалганай найрнуудые, Ёрдын, “Алтарганын” наадануудые үнгэргэһэн байна. ВАРК-ын музей соо үлэһэн суута уран зурааша Д.Д. Дугаровай зурагууды­ень болон шабинарайнь бүтээһэн алташа, мүнгэшэ зүйлнүүдыень но­мерлоод, Сампиловай болон бу­сад музейнүүдтэ үгэхэ, бурханай дүрсэнүүдыень Ивалгын дасанда тушааха харюусалгатай ажал Мун­ко-Жаргал Аюшеевичтэ даалгагдаа бэлэй. “КАМАЗ-аар багтахаар бэшэ томо-томо витринэнүүдые, Гэсэрэй шэрээ, бусад түхеэрэлгэнүүдые, мо­дон зүйлнүүдые тараагаа бэлэйб­ди”, - гэжэ Мунко-Жаргал Аюшее­вич хөөрэнэ. Тиихэдэ ВАРК-ынгаа “Бүгэдэ Буряадай арадайнгаа урда аша габьяагай түлөө” гэһэн алталмал түрүүшын медальнуудые хэжэ, Ага ошожо, Иосиф Кобзон Баир Жамсуев хоёрто барюулһан байна.

Зургаан хүүгэдээ гарыень ганза­гада, хүлыень дүрөөдэ хүргэһэн Дар­маевтанай эбтэй гэр бүлэ бултандань дээдэ һургуули олгоо, тэдэнь мүнөө бэрхэ мэргэжэлтэд болонхой.

Хэһэн ажалаараа омогорходог бүлые Гэр бүлын жэлдэ хани халуунаар амаршалнабди! Мунко-Жар­гал Аюшеевичые угтажа байһан 75 наһанайнь баярта ойгоор, Эльви­ра Бальжинимаевнатаяа суг хамта 30 жэлдэ ан-бун, амгалан тэнюун, бэе бэеэ дэмжэн ажаһуужа байһан бүлэдэнь, хүүгэдтэнь, ашанар, зээ­нэртэнь элүүр энхэ, эбтэй эетэй бай­хыень, ута наһатай, удаан жаргалтай һуухыень, бурхантай, буянтай ябахы­ень хүсэе!