Хурса хажуурай мүрөөр

Үбһэ абалгын халуун хаһада арад зон оньһон техникэ хэрэглэдэг болонхой. Теэд трактор машинын орожо шадахагүй газарта ногоо­гоо хуушанайнгаа заншалаар хажуураар сабшана бшуу. Ой модоной, хорёо хашаагай, полиин заха­нууд, болдогтой газарнуудта хажуур тон хэрэгтэй зүйл болоно бшуу.

“Успех” ТОС-ой үүсхэлээр эмхидхэгдэһэн “Тоо­рын хажууршад” гэһэн урилдаан Тооро һууринай ниитын ажаябуулагша, нютагай эдэбхитэн, гартаа дүйтэй Георгий Намсараевич Ябжановай мүнхэ дурасхаалда зорюулагдана. Тэрэ хажуураар гек­тар-гектараар ногоо унагаажа шададаг байһан юм гэжэ нютагаархид хөөрэнэ.

- Манай Тооро һууринай айл бүхэндэ трактор машинын хажуурнууд, тармуурнууд бии. Хэды тиигэбэшье, иимэ мүрысөө үнгэргэхэ гэжэ шиидээбди. Урдандаа теэбии таабайнарнай ямар ажал хэжэ байгааб, илангаяа үбһөө хажуураар сабшадаг байһыень залуу халаанда хэмжээ ябуулгын үедэ хөөрэжэ, заажа, харуулжа үгэнэбди, - гэжэ “Успех” ТОС-ой түрүүлэгшэ Татьяна Улокшо­нова хөөрэнэ.

Эмхидхэгшэдэй мэдүүлһээр, мүнөө жэл­дэ хүнүүд олоороо суглараа. Залуушуулай һонирхожо, дуратайгаар хажуураа хурсадхажа, саб­шажа байһандань баярламаар. Бултанай дунда Тоорын сомон дарга Олег Александрович Хол­хоев хабаадалсажа, хажуурай ажал мартаагүй байһанаа харуулаа.

Тооро һууринаа холо ойгуур суурхуулжа ябаһан “Туяа” ансамблиин гэшүүд урилдаае шэмэглээ гэжэ хэлэхэдэ, алдуу болохогүй. Сабшалгын үедэ хуушанай арадай дуунуудые хангюурдан, хүнгэн бэшэ ажал ябуулаа. Иигээд лэ, дуутай шуутайгаар элинсэг хулинсагууднай хүдэлдэг байһан юм.

Георгий Намсараевичай аха дүүнэрэй, ТОС-уудай гэшүүдэй, Тоорын сомоной суглуулһан мүнгэн шангуудта эрхимүүд хүртөө.