Уран зохёолшо багшанарые амаршалба

Энэ хэмжээ ябуулгада ургажа ябаһан улаан бургааһадые уран зохёолдо дуратайгаар хүмүүжүүлдэг, зохёохо дуратай шабинарайнгаа уран бэлигые бадараадаг багшанарые халуунаар амаршалжа урмашуулан, «Буряад-монгол аялга» гэһэн ирагуу найрагшадай онлайн-нэгэдэлэй медальнуудаар шагналга үнгэрөө, «Yбэлэй баяр» гэhэн хүүгэдтэ зорюулһан номтой танилсуулаа.

«Yбэлэй баяр» гэһэн ном соо ганса уран зохёолшодой бэшэ, харин hурагшадай зохёолнууд оролсоhон байна. Үшөө тиихэдэ Монголой, Хальмагай, Шинжаан Монголой (Хитадай Синьцзян Уйгарай автономно тойрог), Yбэр Монголой ирагуу найрагшадай зохёолнууд оролсоо. Ном Агын уран зохёолшо Намсалма Доржипалановагай «Yбэлэй баяр» гэжэ шүлэгэй нэрээр нэрлэгдэhэн байна.

Тэрээн соо 32 уран зохёолшодой ажалнууд, тэрэ тоодо Захааминай аймагай Үлэгшэнэй 6-дахи ангиин hурагшад Алеся Ажитова, Наталья Базарова, Сабина Галсанова, 7-дохи ангиин hурагша Даяна Будаева, Хуртагын 8-дахи ангиин hурагша Владимир Гуржапов; Үндэһэтэнэй 1-дэхи лицей-интернадай 8-дахи ангиин Эрдэни Цыренов гэһэн бэлигтэй бэрхэ һурагшадай уран шүлэгүүд оруулагдаһан байна. Мүн лэ Монгол Уласай Билэгноров, Yбэр Монголой Баян-Жаргал, Шинжаан Монголой Төртогтохын Торма; Хальмагай Эрдни Канкаев, Ирина Манджиева гэһэн уран зохёолшодой ирагуу зохёолнууд уншагшадай сэдьхэл хужарлуулхал байха.

Монгол, хальмаг уран зохёолшодой бүтээлнүүдые Амгалан Будаев Галина Ринчинова хоёр буряадшалаа. Нина Артугаевагай шүлэгүүдые хальмаг хэлэндэ - Ирина Манджиева, чечен хэлэндэ Бирлант Исакова оршуулаа. Эдир Сабинын зэхёолнуудые ород хэлэндэ - Астрахань хотын Сергей Масловский, хальмаг хэлэндэ – Эрдни Канкаев, чечен хэлэндэ – Бирлант Исакова, ингуш хэлэндэ – Илез Матиев, авар хэлэндэ – Наби Гисаевас (Исава), монгол хэлэндэ Пүрэвжавын Гэрэлт-Од оршуулһан байна.

Сергей Аюшеев

Суранзан Очирова

Баярта хэмжээ ябуулгые Захааминай залуу дуушад Суранзан Очирова, Эржена Санжитова, Улаан-Үдын «Алые паруса» сэсэрлигэй багашуул (хүмүүжүүлэгшэнь - буряад хэлэнэй багша Людмила Елизаровна Бальжурова), «Мүнгэн сэргэ» хамталигай Цыремпил Дармаев, Буряадай, Монголой габьяата артист Сергей Аюшеев гэгшэд ирагуу дуунуудаараа шэмэглээ.

Эржена Санжитова

"Алые паруса" сэсэрлигэй хүүгэд

Монгол хүгжэмшэн, Захааминай Эдиршүүлэй уран бэлиг хүгжөөхэ түбтэ хүгжэм зааһан, мүнөө Поселиин һургуулида заадаг Цывээнсүрэн Будрагча багша үхибүүдтэ зорюулһан дуунуудые зохёодог. Тиимэһээ энэ нэгэдэлэй ашаг үрэтэй ажалые үндэрөөр сэгнэжэ, хүгжэмдэ таараха үхибүүдтэ зорюулһан шүлэгүүдые олоор бэшэжэ байһандань баяраа мэдүүлээ.

- Хүн бүхэндэ эрдэмэй дээжэ бэлэглэжэ, ажабайдалай замай эхи заадаг эгээл хүндэтэй багшанар, танай тэсэбэри, сэсэн ухаан, халуун сэдьхэлтнай ходол ургажа ябаhан улаан бургааhадта туhа боложо байхань болтогой! - гэжэ Улаан-Yдэ хотын 54-дэхи hургуулиин һурагшад (багшань - Алла Александровна Сосорова) хүндэтэ багшанараа ирагуу шүлэгүүдэй мүрнүүдээр амаршалаа.

54-дэхи һургуулиин һурагшад

«Буряад-монгол аялга» онлайн-нэгэдэлэй ударидагша Амгалан Александрович Будаев амаршалгын үгэнүүдые хэлэжэ, Виктория Аюшеевна Хамагановада – Монголой «Соёлын гавьяат», Цырен Раднаевич Базаровта Нацагдоржын медальнуудые зүүлгээ.

Энэ найрта аяар холоhоо – Аргентина оронһоо уласхоорондын сэдхүүлшэ, табан номой автор Тадео Кастелони (Tadeo Castelloni) Соёлма Самбуева Баясхалан лама хоёрой уряалаар ерээ. Монгол һайхан оронhоо буужа ерэһэн хүндэтэ айлшад Хөхөө Наранхүү, Жамьянсүрэн Энхтуяа багшанар халуунаар амаршалжа, «Буряад-монгол аялга» онлайн-нэгэдэлэй ударидагша Амгалан Будаевта бэлэг сэлэгүүдээ барюулаа. Улаан-Баатарай 84-дэхи һургуулитай эб хамта ажалаа ябуулдаг Улаан-Үдын эдэбхитэй Виктория Найданова, Тамара Жапова, Ирина Исакова багшанарта Монгол ороной медальнуудые зүүлгээ.

«Буряад-монгол аялга» онлайн-нэгэдэлэй эдэбхитэд: үдэр бүри халуун мэндэеэ хүргэжэ, үреэлнүүдээ табижа байдаг Захааминай Хужарай Талана Дымбрыловна Цыбикова, Хориин Тээгдын «Уулын уладай уулзалга - 2026» нааданай «Хонгоодорой соло» урилдаанда эрхимлэһэн Жигжима Дашинимаевна Гончикдоржиева хоёр нэгэдэлэйнгээ гэшүүдые – багшанарые хани халуун амаршалгаараа, уран гоё үреэлнүүдээрээ урма зоригыень бадараажа, «Буряад-монгол аялга» онлайн-нэгэдэлэй ударидагша Амгалан Будаевта халуун баяраа мэдүүлээ. Баһал баярай үгэнүүдые хэлэхэдээ, Баясхалан лама энэ нэгэдэлэй ажал ехэ үндэрөөр сэгнэжэ, илангаяа буряад хүүгэдэй түрэл хэлэеэ үзэхэ, мэдэхэ хэрэгтэ, буряад хэлэнэй багшанарта аргагүй ехэ туһатайень тэмдэглээ. Эдэбхитэй эрхим багшанарта «Буряад-монгол аялга» онлайн-нэгэдэлэй «Булган хатан», «Уран Дүшэ» болон «Лопсон Тапхаев» медальнууд хүндэтэйгөөр зүүлгэгдээ.

- «Yбэлэй баяр» гэhэн ном Яндекста оронхой, хүн бүхэн уншажа, хэрэглэжэ шадаха аргатай, - гэжэ найрые хүтэлһэн 54-дэхи һургуулиин буряад хэлэ бэшэгэй багша Соёлма Дашинимаевна Бадмацыренова-Самбуева дуулгаа.

Цыремпил Дармаев

Жэнхэни буряад баян үгэтэй шүлэгүүд ном соо ороо гэжэ тэмдэглэе. Тиимэhээ энэ ном юрын уншагшадта һонирхолтой, буряад хэлэ бэшэгэй багшанарта, үхибүүдтэ туhатай байха гэжэ найдая.

Yшөө дахин багшанараа энэ нангин hайхан үдэрөөрнь амаршалнабди!

Сэнгэ Ринчиновэй, Долгорма Тогмитовагай гэрэл зурагууд