Буряад хэлэндэ – анхарал

Исток, Солдатский һууринуудай үхибүүд 54-дэхи һургуулиин шаби­нар юм. Сентябриин 2-то тэндэ эр­дэм мэдэсын баяр ёһололой хэмжээн заншалта ёһоороо үнгэргэгдөө. Һургуулиин бүхы һурагшад тэрээндэ хабаадаба.

54-дэхи һургуулиин захирал Ар­салан Будаев, Буряад Уласай Арадай Хуралай һунгамал Олег Бадлуев гэг­шэд сугларагшадые халуунаар амар­шалаа. 11-дэхи классай һурагша Да­ниил Фёдоров 1-дэхи классай шаби Юмжана Доржиеватай түрүүшын хонхо жэнгирүүлээ.

Мүнөө жэлдэ 1-дэхи класста 120 үхибүүн ерэбэ. Тэдэ дүрбэн класста хубаагдаа. Харин 30 үхибүүн буряад хэлэ гүнзэгыгөөр шудалхаар хараа­лагдана. Дүй дүршэл ехэтэй Людми­ла Жамьяновна Цыренова энэ клас­сай хүтэлбэрилэгшөөр табигдаа.

- Гурбадахи жэлээ удаа дараа­лан буряад хэлэнэй класс абанабди. Үхибүүдээ түрэл хэлэндэнь һургаха тухай 30 түрэлхид тусхай мэдүүлгэ оруулаа. Эдэмнай буряад хэлэеэ бусадһаа ехээр шудалха, ёһо зан­шалаа, соёлоо үзэхэ болоно. Трудай, хүгжэмэй, уран зурагай хэшээлнүүд буряад маягтайгаар үнгэргэгдэхэ, тусхай программашье табигданхай, - гэжэ захиралай орлогшо Татьяна Владимировна Дулгарова хөөрэнэ.

Сагай эрилтэдэ таарамаар һуралсалай гуламта хүдэлхэ гэжэ оролдоно.

- Шэнэ хэшээлнүүдые нэбтэрүүлхэдэ, һургуулимнай бэлэн. “Труд” болон “Эсэгэ ороноо хамгаалга болон аюулгүй байдалай эхин мэдэсэнүүд” гэһэн хэшээлнүүдэй танхимууд хүсэд хангагданхай. Гэбэ­шье тэндэхи оньһон техникэ, стано­гууд, хэрэгсэлнүүднай нэгэ бага хуушан, шэные абаа һаа, һайн байгаа, - гэжэ Татьяна Дулгарова мэдүүлнэ.

Исток һууринда эхин клас­сай һургуули 1986 онһоо хүдэлжэ эхилһэн юм. 1998 онһоо 54-дэхи дун­да һургуули болгогдоһон түүхэтэй. Эдэ жэлнүүдтэ һуралсалай гулам­та нэгэ ехэ бэрхэшээлтэй дайрал­дана. Ушарынь гэхэдэ, һургуулиин дэргэдэ тамирай зал үгы байгаа. Мүнөө жэлдэ шэнэ тамирай зал бодхоогдожо байнхай. Сентябриин 1-дэ ашаглалгада тушаагдаха болзорынь хойшолуулагдаһаниинь харамтай. Жэлэй түгэсэтэр үхибүүд хүлеэхэ баатай болобо. Түргөөр бодхоогдодог армаг барилгын ажалда хэрэглэгдэ­нэ. Тамирай залда ганса физкульту­рын хэшээлнүүд үнгэргэгдэхэ бэшэ, мүн спортын шэнэ зүйлнүүдээр секцинүүд хүдэлхөөр хараалагдаа.

“Самолётик будущего” гэһэн түсэл бүхы Ород гүрэнэй һуралсалай гуламтануудта бэелүүлэгдэнэ. 54-дэхи һургуули баһа энээндэ хабаадажа, һайн амжалтануудые туйла­на. Һайхан үгэнүүдтэй саарһаар хэгдэһэн агаарай онгосохонуудые 11-дэхи классай үхибүүд 1-дэхи клас­сайхидта дамжуулба.

- Бүхы гүрэн доторой түсэл шэнэ һуралсалай жэлэй, аха заха клас­сай үхибүүдэй багашуултайгаа ха­рилсаанай шэнжэ тэмдэг болоно. Үнгэрһэн һуралсалай жэлдэ манай һургуулиин агаарай онгосохон холо ойгуур ниидээ, һурагшаднай, багша­нарнай элдэб янзын урилдаанууд­та, олимпиадануудта, суглаануудта, хуралдаануудта амжалтатайгаар ха­баадаа. Энэшье һуралсалай жэлнай бүри амжалтатай байха бэзэ гээд, найдагдана, - гэжэ хүмүүжүүлгын та­лаар захиралай зүбшэлэгшэ Дарима Дымбрыловна Султумова хэлэнэ.

Иигэжэ 54-дэхи һургуулида бэр­хээр һураһан, хүмүүжүүлэгдэһэн үхибүүд холо ойгуур түрэл гулам­таяа суурхуулна. Москва, Санкт- Петербург, Томск, Красноярск, Улаан- Үдэ хотонуудай дээдэ һургуулинуудта тэдээнтэй уулзаха аргатайт. Мүнөө зундаа һургуулияа алтан медальтай­гаар дүүргэһэн Алексей Гергенов Владивосток хотын Алас Дурна зүгэй федеральна университедэй оюутан болоо.