Үнэн сэхэ эрхэтэдые хүмүүжүүлхэ

Декабриин 2-то бүхэли үдэрэй хугасаада “Россия-это мы!” гэһэн патриотическа форум ажалаа ябуулаа. Үглөөнһөө абаад, зургаан талмайда ганса бэрхэшээлнүүд тухай хөөрэлдөөн эмхидхэгдээ бэшэ, мүн хэгдэһэн ажалай дүнгүүдтэй танилсуулга болоһон байна.

“Юнармия Бурятии”, “Горжусь тобой, Отечество”, “Родина начинается с детства”, “Жить и учиться в Бурятии” гэһэн тусхай талмайнуудта һургуулиин үхибүүд, оюутад хабаадалсаа. Сэрэгэй-патриотическа нааданууд энэ үдэр эмхидхэгдээ.

Форум эмхидхэһэн патриотическа хүмүүжүүлгын, хизаар ороноо шэнжэлгын, аяншалгын болон тамирай ресурсна түб хэдэн жэлэй хугасаада “Илалтын туг” гэһэн туг барюулна.

- Энэ түсэл зохёон бэелүүлнэбди. Һүүлэй һарануудта тугнай Бабантын аймагта “айлшалаа”. Энэ үедэ патриотическа олон тоото хэмжээ ябуулганууд үнгэргэгдөө. Тус форумой үедэ тугнай Хойто-Байгалай аймагта дамжуулагдаа, - гэжэ ресурсна түбэй захиралай орлогшо Даша Кырмыгенов хөөрэнэ. 

“С чего начинается Родина” гэһэн тусхай түсэл тухай хөөрэлдөөндэ хүндэтэ айлшад хабаадаһан байна. Ородой Юрэнхылэгшын Алас Дурна зүгэй федеральна тойрогтохи бүрин эрхэтэ түлөөлэгшын орлогшо Григорий Курановай тэмдэглэһээр, энэ түсэл зохёон бэелүүлхэеэ эгээл түрүүн Буряад Уласай Толгойлогшо Алексей Цыденов дурадхаһан байна.

Патриотическа хүмүүжүүлгэ хадаа буу зэмсэг барижа, гүрэн ороноо хамгаалгада бэлдэлгэһээ гадна, нэн түрүүн, бүхы заншалнуудаа сахин, түрэл нютагтаа дуратайгаар хүмүүжүүлгэ болоно гэжэ бүхы хабаадагшад тэмдэглэнэ.

- Манай ерээдүй Буряадтаа. Түрэһэн гараһан һууринуудтаа эрдэм һуралсал абажа, нютагаа һэргээн үргэе, үетэн нүхэдөөрөө, баатарнуудаараа ходо омогорхожо ябая, - иимэ уряатайгаар Алексей Цыденов амаршалгын үгэ соогоо хандаһан байна.

Эсэгэ орондоо дуратайгаар хүмүүжүүлгын жэшээнүүдые бидэ үдэр бүри харанабди. Сэрэгэй тусхай үйлэ хэрэгтэ хабаадажа байһан сэрэгшэдтэ ба тэдэнэй гэр бүлэнүүдтэ һайн дуратан, илангаяа ургажа ябаа залуу халаан үдэр бүри туһаламжа үзүүлнэ. Энэ хадаа үнэн эбтэй байдал харуулна. “Бүхы юумэн илалтын түлөө” гэһэн уряа доро ажал ябуулагдана. Манай сэрэгшэдтэ туһалха ажал тогтоногүй.

Зүүн зүгэй сэрэгэй тойрогой зэбсэгэй командалагшын орлогшо, генерал-лейтенант Роман Грековэй хэлэһээр, багаханшье үйлэ хэрэг туһа нэмэри боложо үгэнэ.

- Үхибүүн бүхэн баһа өөрын нүлөө үзүүлнэ. Тэдэнэй һайхан, зүрхэ сэдьхэл доһолгоомо дулаан үгэнүүдтэй бэшэгүүдые сэрэгшэд хадагалаад ябана. Нэгэ бага забһарлалай гарахада, дахин-дахин таанадай бэшэгүүдые уншана. Дайсадые түргөөр бута сохижо, нютагтаа бусаад, бэшэг эльгээһэн хүүгэдтэй танилсахаяа бодонод, - гэжэ Роман Греков залаар дүүрэн сугларһан эдиршүүлдэ хандаба.

“Хэн сэрэгшэдтэ бэшэг эльгээгээб?” гэжэ генерал-лейтенантын асуухада, 100 гаран үхибүүдэй гараа үргэһэндэнь баярламаар. Роман Грековтэй хамта сэрэгэй үйлэ хэрэгтэ хабаадажа байһан Буряадай 18 сэрэгшэн ерэлсээ. Буряадһаа найман мянга гаран километрэй саана газарта боложо байһан үйлэнүүд тухай үнэн сэхыень уласай үхибүүдтэ, арад зондо тэдэ хөөрэжэ үгэхэ түсэбтэй. Иигэжэ хүмүүжүүлгын талаар сэгнэшэгүй ажал хэгдэхэнь гээшэ.

Сэрэгэй үйлэ хэрэгэй үедэ ганса Буряадай 19 сэрэгшэн “Оросой Герой” гэһэн нэрэ зэргэдэ хүртэһэн байна. Тэдэ ами наһаяа хайрлангүй, үдэр бүри баатаршалга гаргана. Буряад сэрэгшэд хүндэмүүшэ, һайн зантай гэжэ эли болоо. Роман Грековэй хэлэһээр, мүнөө үедэ Буряадай 17 мянган сэрэгшэн алба гаража, уялгаяа дүүргэнэ.

- Манай сэрэгшэдэй Угледар хотые абаһанай һүүлдэ хоёр үдэр болоод байхада, сурбалжалагшадтай тиишээ хүрөөбди. Дайсад тэндэхи ажаһуугшадые буряад сэрэгшэд ерээд, бултыетнай бута сохихо гэжэ айлгаһан байгаа. Угледарай ажаһуугшадтай эгээл түрүүн буряадууд уулзажа, туһа хүргэхэ гэжэ гараа һарбайгаа. Энээнииень дуулаад, бишье уярааб. Буряад ороной ажаһуугшадта иимэ хүбүүдэй түлөө доро дохин баяраа хүргэнэб, - гэжэ Роман Греков хөөрэнэ.

Бүхэроссиин болон уласхоорондын хэмжээнэй конкурс урилдаануудта амжалта туйлаһан үхибүүд форумой түгэсхэлдэ шагнагдаа.