Эдир сэдхүүлшэд эрмэлзэлтэй

Байгша ондо гүрэн дотор соносхогдоһон Гэр бүлын жэл­дэ зорюулагдаһан, сэрэгэй тусхай хэмжээ ябуулгада хабаадажа байгаа баатар хүбүүд түхай, байгаа­ли хамгаалга тухай зураглалнуудые эдир сэдхүүлшэд эльгээгээ.

«Энэ удаа тус харалгадамнай Буряад ороной 15 аймагай, Улаан-Үдэ хотын дунда һургуулинуудай шабинар хабаадаа. Ургажа ябаа үетэнэй бэшэһэн хүдэлмэринүүдые уншахада, урматай байгаа. Нээрээшье, үхибүүднай ямар бэрхэнүүд гээшэб. Эдир сэдхүүлшэд телерепортажуудые, газетнэ зураглалнуудые эрхимээр бүтээнэ гээд тэмдэглэлтэй. Энэ хадаа багшанарайнь ехэ оролдолго болоно.

Эдиршүүлэй эдэ хүдэлмэринүүдтэ жюриин гэшүүдтэ сэгнэлтэ үгэхэнь тон хүндэ байгаа. Тиибэ яабашье эрхимүүд сооһоо эгээл эрхимүүдынь элирүүлхэ бэлэн бэшэ үүргэеэ шүүгшэднай шадамар бэрхээр дүүргээ», - гээд, Буряад ороной Эдир журналистнуудай холбооной түрүүлэгшэ Людмила Доржиева хэ­лэбэ. «Буряад үнэн» сониной, Буряадай гүрэнэй телерадиокомпаниин дүй дүршэлтэй сэдхүүлшэд хабаа­дагшадай хүдэлмэринүүдтэ сэгнэлтэ үгөө.

«Мүнөө үеын баатарнууд» гэһэн янзада Улаан-Үдэ хотын 33-дахи гимназиин 7-дохи ангиин һурагша Егор Сотнич түрүүшын һуури эзэ­лээ. Тэрэ дайшалхы талмайда эрэл­хэг зоригтойгоор ябаһан хүбүүд ту­хай удха шанартай фильм буулгажа дурадхаа. «Гэр бүлэ - ажабайдалай эхинэй эхин» гэһэн янзада Хэжэн­гын Эдиршүүлэй уран һайханай түбэй бэлигтэн, 8-дахи ангиин һурагша Алтана Бабаршуева ам­жалта туйлаа. «Бидэ мэдээсэлэй оршон байгуулнабди» гэһэн ян­зада Түнхэнэй аймагай Аршаанай дунда һургуулиин 10-дахи ангиин һурагша Анна Усольцева 1-дэхи һуури эзэлээ. Тэрэнэй «Һургуули гээшэ һонирхолтой» гэһэн медиа- түсэл жюриин үндэр сэгнэлтэдэ хүртөө. «Эдир наһанайм эгээл ду­ратай булангууд» гэһэн янзада Се­веробайкальск хотын Валерия Вла­димирова эрхимлээ. Тэрэ 9-дэхи ангида һурадаг юм. Гэхэтэй хам­та конкурсдо Хэжэнгын аймагай һурагшад буряад хэлэн дээрэ эр­хим хүдэлмэринүүдые дурадхаа.

Шагнал барюулгын үедэ хабаа­дагшад эдир сэдхүүлшэдэй эрхим видеоролигуудые хараа. «Алтан гуурһан» мүрысөөндэ хабаадаг­шад өөһэдынгөө бэлиг шадабари харуулхаһаа гадна бэе бэетэйгээ та­нилсажа, дүй дүршэлөөрөө андалда­ха аргатай байна. Тэрэнь эгээл сэн­тэй гээд эмхидхэгшэд тэмдэглэнэ. «Алтан гуурһан» конкурсдо хабаада­жа, талаан бэлигээ улам һалбаруулха һэдэлгэтэй болоһон үхибүүд сааша­даа Буряад орондоо, гүрэн соогоо мэдээжэ, бэрхэ эрхэтэд болохо бэзэ гээд найдагдана.