Буряадай түрүү хүнүүдэй алдар солые дуудая!

Энэ жэлэй 25-дахи ойн баяр­та урилдаан долоон сэдэбэй тусхай янзаһаа бүридэһэн: “Аламжа Мэргэн Арюун Гоохон хоёр”, “Гуа сэсэн хатан”, “Эхэ-Герой”, “Хүг­шэн эжын хүндын тэмдэг”, “Баатарай соло”, “Баатар Мэргэн”, «Сагаан үб­гэн». Байгша ондо гүрэн дотор со­носхогдоһон Гэр бүлын жэлдэ даша­рамдуулан, уншагшаднай бата бэхи байдалтай, эбтэй эетэй гэр бүлэнүүд тухай илангаяа олон зураглал­нуудые эльгээгээ гээд тэмдэглэе. Энэ удаа олоной дуратай “Буряадай түрүү хүнүүд” гэһэн урилдаан “Бу­ряад үнэн” Хэблэлэй байшан Бүгэдэ Буряадай үндэһэн соёлой эблэлтэй суг хамта үнгэргөө. Тус урилдаамнай Буряад ороноймнай холо ойрын эл­дэб аймагуудһаа, хүршэ Үбэр Бай­галай хизаарһаа, Эрхүүгэй можоһоо уншагшаднай эдэбхитэйгээр хабаадаа. Тиигэжэ “Буряад үнэн” Хэблэлэй байшангай захирал-ахамад редак­тор Даши-Доржо Болотов, Бүгэдэ Буряадай үндэһэн соёлой эблэлэй түрүүлэгшэ Чимит Бальжинимаев сугларһан зониие хани халуунаар амаршалжа, һайн һайханиие хүсөө.

 Тодорхойлон хэлэхэдэ, энэ конкурсдо жэл бүри хонгор һайхан Хориин аймагһаа ун­шагшаднай тон эдэбхитэйгээр хабаададаг. Урилдаанаа соносхоһонһоомнай хойшо редакцидамнай хонходожо, энэ тэрэ асуудалнуудые лаблажа байдаг юм. Тиин энэ­шье удаа Хориин аймагайхид бүгэдөөрөө сугларжа, энэ һайндэртэмнай буугаа.

Гэхэтэй хамта Оросой Хол­боото Уласай ба Буряад Ула­сай алдар суута артистнууд - Саян ба Эржена Жамбалов­тан, Буряадай элитэ дуушан, хүгжэмшэн Намгар Лхасара­нова, дуушан, хүгжэмшэн Бато Гуранов гэгшэд аялга дуунуудые зэдэлүүлжэ, сугларһан зо­ной сэдьхэл баясуулаа.

Үбэлэй янгинама хүйтэнэй үедэ дурдагдаһан номой сан­да сугларһан зоной зүрхэ сэдьхэл хөөрэнги байгаа. Бэе бэетэйгээ уулзажа, амар мэн­дэеэ хэлсэжэ, үреэлэй һайхан үгэнүүдтэ хүртэжэ байхаһаа энэ дэлхэй дээрэ юун сэнтэйб даа.

Зай гэжэ, тус сэдэбэй ян­зануудаар илажа гараһан Ла­уреадуудай нэрэнүүдтэй та­нилсагты:

«Аламжа Мэргэн Арюун Гоохон хоёр»

Андрей Ракшаевич бо­лон Светлана Владимировна Дондуповтан. Андрей Ракша­евич үндэһэн буряад наада­нуудые – һээр шаалга, тэбэг сохилго, ташуур таталга гэхэ мэтые һэргээн дэлгэрүүлхэ талаар аргагүй ажал ябуулна, “Буряад Уласай үмэнэ габьяатай байһанай түлөө” меда­ляар шагнагдаһан. Светлана Владимировна – Оросой Хол­боото Уласай габьяата эмшэн, Буряад Уласай Арадай Хура­лай һунгамал, Баргажанай ай­магай эмнэлгын түбэй ахамад врачаар олон жэлдэ хүдэлһэн. Хоёр һайхан басагадые тү- рэжэ үндылгөө. Найруулгын автор - Валентина Походиева.

Бэлигто Баянович болон Цыцыгма Дамбаевна Жам­балдоржиевтан – үмсын ажа­хы эрхилдэг эрхим гэр бүлэ. Буряад Уласай Засагай газа­рай, Буряад Уласай Хүдөө ажа­хын болон эдеэ хоолой яама­най Хүндэлэлэй грамотануу­даар шагнагдаhан юм. «Эрхим олзын хэрэг эрхилэгшэд» гэжэ нэрэ зэргэдэ хүртэһэн. Нютаг дээрээ «Алан Гуа» гэһэн аян­шалгын комплекс байгуулһан гэр бүлэ нютагайнгаа, айма­гайнгаа волонтёрнуудтай няг­та холбоотойгоор хүдэлдэг. Найруулгын автор - Лариса Ванжилова.

Базаржаб Цыбендоржи­евич болон Цырендулма Цыбиковна Батомункинтан. Базаржаб Цыбендоржиевич – хизаар ороноо шэнжэлэгшэ, “Алтан жаса” гэһэн ниитын эм­хиин хүтэлбэрилэгшэ. Байгша ондо “Агын буряадууд: түүхэ, ёһо заншал, соёл” гэһэн хоёр боти ном хэблүүлээ. Цырен­дулма Цыбиковнагай ажа­лай намтар сэдхүүлшэнэй мэргэжэлһээ эхи абаһан байна. Дулдаргын аймагай радио дамжуулга хүтэлдэг байһан. Олон жэлдэ Үбэр Бай­галай хизаарай Буряад соёл хүгжөөлгын түбтэ амжалтатай ажаллаһан. Базаржаб Цы­бендоржиевич Цырендулма Цыбиковна хоёр буряад ара­дайнгаа түүхэ мүнхэрүүлжэ, алдар солыень үргэжэ, бу­ряад хэлэнэй түлөө, соёлой хүгжэлтын түлөө эршэ хүсэеэ элсүүлдэг, зүрхэ сэдьхэлээ зо­рюулдаг сэхээтэн хүнүүд юм. Найруулгын автор - Намжил­ма Бальжинимаева.

Дандар Дашидоржиевич болон Маргарита Михай­ловна Базаржаповтан. Үбэр Байгалай хизаарай Хёлгын дасанай ловон лама Дандар Дашидоржиевич ба Хэжэн­гын лицей-hургуулиин багша Маргарита Михайловна Ба­заржаповтан табан үхибүүдтэй эбтэй эетэй гэр бүлэ юм. Дан­дар лама һүзэгшэдэй хэрэг бүтээхэһээ гадна, СВО-гой эхилхэhээ хойшо сэрэгшэдтэ туһалха талаар ехэ ажал ябуулна. Табан үхибүүдынь номдоо бэрхэнүүд, алишье хэрэгтэ амжалта туйлажа ябадаг, мүн эгээл шухалань буряад хэлэн­дээ бэрхэнүүд юм. Найруулгын автор – Вера Аюшеева. Вера Лубсанимаевна жэл бүри нютагайнгаа ажалша бэрхэ зон тухай зураглалнуу­дые бэлдэжэ, манай редакци эльгээдэг юм.

Батор Кимович болон Со­ёлма Батуевна Тарнуевтан. Батор Кимович – Хэжэнгын аймагай захиргаанай тол­гойлогшын орлогшо, Соёлма Батуевна – Хэжэнгын айма­гай Хүүгэдэй уран бэлигэй түбэй захирал. Тарнуевтан Буряадайнгаа табан эрхим гэр бүлын тоодо «2024 оной гэр бүлэ» гэhэн бүхэроссиин урилдаанда хабаадажа, хүн- дэлэлэй тэмдэгтэ хүртэһэн. Эжын һайхан уурагаар, эсэгын эрхим һургаалаар үндыжэ ябаһан үхибүүдыньшье али олон хэмжээ ябуулгануудта хабаадажа, амжалта туйладаг юм. Найруулгын автор – Ва­лентина Батуева.

Саян Цыдыпович болон Эржена Зугдаровна Жамба­ловтан – Буряад Уласай ара­дай зүжэгшэд, Оросой Хол­бото Уласай соёлой габьяата хүдэлмэрилэгшэд, Буряад ороноймнай эгээл мэдээжэ гэр бүлэнүүдэй нэгэн. Гурбан үхибүүдынь Сойжин, Дахалэ болон Юмжана аба эжынгээ хэрэг амжалтатай һайнаар үргэлжэлүүлжэ, өөһэдөөшье нэрэтэй түрэтэй хүнүүд боло­жо ябана. Найруулагша автор - Баярма Баторова.

“Гуа сэсэн хатан”

Лариса Цымжитовна Халхарова - Доржи Банзаровай нэрэмжэтэ Буряадай гүрэнэй ехэ hургуулиин доцент, хэлэ бэшэгэй эрдэмэй дид-доктор, уран зохёол шэнжэлэгшэ. “Буряад ТВ” теле-субагай хүтэлэгшэ, Монгол-Ород гүрэнүүдэй хоорондохи харил­саа бэихжүүлхэ талаар го­ритой ажал ябуулһанайнгаа түлөө Монгол Уласай “Алтан гадаһан” ордендо хүртэһэн. Найруулагша автор - Баярма Баторова.

Надежда Михайловна Ба­торова - 35 жэлэй туршада “Буряад үнэн” сониндо, мүн наһанайнгаа амаралтада га­ратараа Буряадай гүрэнэй телерадиокомпанида амжал- татай ажаллаһан, Буряад Ула­сай олондо мэдээсэл тараадаг хэрэгсэлнүүдэй хүгжэлтэдэ горитой хубитаяа оруулһан хүндэтэ аха захатан. Буряа­даараа 88 наһатай Надеж­да Михайловна мэдээжэ сэдхүүлшэдэй, уран зохёол­шодой бүтээлнүүдэй үргэн олониитэдэ хүрэхэ хэрэгтэ шу­хала үүргэ гүйсэдхэһэн габь- яатай. Найруулагша авторнууд – Гэсэгма Доржиева, Людмила Цыденова.

Цырендари Аюровна Самбуева – Санкт-Петербург хо­тын буряадуудай “Ая ганга” нэгэдэлэй түрүүлэгшэ, Бу­ряад Уласай соёлой габьяата хүдэлмэрилэгшэ. Олон һайхан хэрэгүүдые үүсхэжэ үнгэргэдэг, мүнөө үедэ сэ­рэгэй тусхай ябуулгада хабаадаһан хүнүүдтэ туһа хүргэхэ талаар эдэбхитэй ажал ябуулна. Найруулагша автор - Сарюна Эрдынеева.

Соёлма Цырендоржиевна Бадмаева – Улаан-Үдэ хотын Исай Калашниковай нэрэмжэтэ номой сангай хи­заар ороноо шэнжэлэлгын таhагай ахамад мэргэжэлтэн. Мэдээжэ уран бүтээлшэдтэ зорюулагдаһан олон тоо­то хэмжээ ябуулгануудые эмхидхэхэһээ гадна, буддын шажанай нангин шүтөөн бо­лохо Джарун Хашорай субар­га һэргээлгэдэ хабаадалсаха мэтээр ниитын удха шанартай олон хэрэгүүдые бүтээлсэһэн габьяатай. Найруулагша автор – Виктор Гунгаров.

Намгар Аюшеевна Лха­саранова – Буряад Уласай габьяата зүжэгшэн, алдарта дуушан. Буряад-монгол угсаа­танайнгаа урданай дуунуудые бүхы дэлхэйгээр сууряатуул­жа, түрэл арадаа, нютаг нугаяа суурхуулжа ябаһан дуушан. Найруулагша автор – Баярма Баторова.

“Эхэ-Герой”

Жэгжэма Дугаровна Евре­ева – аяар 15 үхибүүдые алтан дэлхэй дээрэ мүндэлүүлжэ, хүнэй зэргэдэ хүргэһэн ашата һайхан эжы. «Эхэ-Ге­рой» гэhэн орденоор, «Ал­дартай эхэ» гэһэн меда­ляар шагнагдаһан Жэгжэ­ма Дугаровна арбан табан хүүгэдэйнгээ хажуугаар мүнөө дээрэ 33 аша зээнэртэй, 26 гу­шанартай, үри һадаһадайнь тоо дүн хамта 99 халуун амин болоод байна. Найруулагша автор – Оюна Доржиева-Ев­реева.

Эржена Найдановна Шойжилова – эжы абаяа, эгэшэ дүүнэрээ алдажа, үншэрхые үзэбэшье, өөрөө мүнөө юһэн үринэрые, тэрэ тоо­до табан хүүгэдые үргэжэ абаад хүмүүжүүлжэ байна. Тэрээнһээ гадна олон жэлэй туршада Хориин аймагай эмнэлгын газарта акушер­кээр хүдэлжэ, алтан дэлхэй дээрэ мүндэлһэн али олон үхибүүдые альган дээрээ то­дожо абаад тэнжээһэн буян­тай. Найруулагша автор – Зо­ригма Цыбикова.

«Хүгшэн эжын хүндын тэмдэг»

Дырма Зугдуровна Бад­мацыренова – Эсэгэ ороноо хамгаалгын Агууехэ дайнай эхилхэдэ, арбатайхан ябаад, хамтын ажалда хабаадажа эхилһэн. Оролдосотой бэрхэ­эр ажаллаһанай түлөө СССР- эй Верховно Соведэй Пре­зидиумэй Хүндэлэлэй грамотаһаа эхилээд, олон тоото  шагналнуудта хүртэһэн, Эхын орденуудаар, «1941-1945 онуу­дай Эсэгэ ороноо хамгаалгын Агууехэ дайнай үедэ габьяата ажалай түлөө», «В.И. Лени­нэй түрэһөөр 100 жэлэй ойдо габьяата ажалай түлөө» гээд лэ, Эсэгэ ороноо хамгаалгын дайнай илалтын ойнуудай медальнуудаар шагнагдаһан. Мүнөө 93 наhатай.

Найруулагша автор – Л. Намжилова.

Мария Цыбекжаповна Цы- бекжапова – Буряад Уласай хүдөө ажахы хүгжөөлгэдэ го­ритой хубитаяа оруулһан, 14-тэйхэн байхаһаа хойшо ажалайнгаа намтар эхилһэн. Хамтын ажалда хам орожо хүдэлхын хажуугаар алтан дэлхэйдэ арбан үринэрые мүндэлүүлһэн аша габьяатай. Гурбан шатын «Эхын Алдар Соло» ордендо, «Эхэ- Герой» гэһэн үндэр нэрэ зэргэдэ хүртэһэн. Мүнөө 90 наһанайнгаа дабаан дээрэ ябаһан Мария Цыбекжапов­нагай үри һадаһадыень, аша, гуша, дүшэнэрыень бултыень тоолобол, 121 халуун амин бо­лонхой. Найруулагша автор - Сэнгэ Ринчинов.

Нина Дондоковна Шаг­дарова - Буряад Уласай, мүн Оросой Холбоото Уласай соё­лой габьяата хүдэлмэрилэгшэ, Оросой Сэдхүүлшэдэй хол- бооной гэшүүн. Буряад Ула­сайнгаа болон Монгол оро­ной сонин сэдхүүлнүүдтэ, Бу­ряад Уласай Юрэнхылэгшын болон Засагай газарай Захир­гаанда амжалтатай һайнаар хүдэлһэн. Мүн олониитын ажалдашье эдэбхитэйгээр хабаадажа, Буряадай Сэрэг­шэдэй эхэнүүдэй холбооной президиумэй гэшүүн ябаһан габьяатай. Найруулагша автор – Светлана Батуева-Шойжоно­ва. Светлана Чимитовнамнай мүн лэ “Буряад үнэн” сонин­доо һонирхолтой зураглалну­удые үргэлжэ эльгээжэ бай­даг, хурса гуурһатай уншаг­шамнай болоно.

Намжилма Нанзатовна Бальжинимаева – Интернет- хүгшөөдэй гээд холо ойгуур алдаршаһан блогер, “Мүнгэн тобшо” гэһэн сайт байгуулаг­ша. Бүхы наһаараа Буряадай олондо мэдээсэл тараадаг хэрэгсэлнүүдтэ, тодорхойлхо­до, “Хараасгай” сэдхүүлдэ, “Бу­ряад үнэн” сониндо амжалта­тай ажаллаһан. Сэдхүүлшэдэй олон тоото мүрысөөнүүдтэ илалта туйлажа, шангууд­та хүртэхэһөө гадна, Бу- ряад Уласай Засагай газа­рай Хүндэлэлэй бэшэгээр, Бүгэдэ Буряадай үндэһэн со­ёлой эблэлэй «Буряад арадай үмэнэ габьяатай байһанай түлөө» медаляар шагнагдаһан габьяатай. Найруулагша ав­тор – Бэлигма Орбодоева.

«Баатарай соло»

Дондоков Вячеслав Баиро­вич. Буряад Уласай Арадай Ху­ралай һунгамал болоод, Нии- гэмэй бодолгын хорооной түрүүлэгшын орлогшын тушаалда хүдэлжэ байһан аад, “сэрэгэй эмшэн” мэргэжэлтэй хадаа тэндэ туһатай байхаб гээд, байлдаанай газар руу зо­рёо ха юм. Вячеслав Баирович гүрэнэй элдэб хайра шагнал­нуудта, тэрэ тоодо «Эрэлхэг зоригой түлөө» гэһэн гүрэнэй ордендо хүртэһэн. Найруулаг­ша автор – Светлана Батуева- Шойжонова.

Воротников Николай Ин­нокентьевич, сэрэгэй тус­хай операцида хабаадагша. Мүнөө Сергей дүү хүбүүнтэеэ хамта һайн дуратанай ёһото тусхай отряд байгуулһан. Тэ­дэнэр өөрын хүсөөр хуушан авто-унаануудые шэнэлэн за- һабарилаад, тусхай операци­ин газар руу эльгээдэг. Най­руулагша автор - Баясхалан Дабаин.

“Баатар Мэргэн”

Сандан Баирович Гарма­ев – байгша ондо Кыргызста­най ниислэл Бишкек хотодо болоһон яхад арадай хапса­гай барилдаагаар дэлхэйн абарга болоһон тамиршан. Найруулагша автор – Галина Дашеева-Базаржапова.

Виталий Григорьевич Раднаев – “Буряад ТВ” теле- субагай хүтэлбэрилэгшэ, бэ­лигтэй бэрхэ сэдхүүлшэн, эм­хидхэгшэ. Найруулагша автор – Николай Шабаев.

Аюр Дашинимаевич Сам­пилов – үмсын ажахы эрхилэг­шэ, адуушан, Буряадай Мори урилдаанай федерациин юрэнхылэгшэ. Найруулагша автор - Лайжа-Ханда Борохи­това.

Алдар Валерьевич Дам­динов – мэдээжэ гүрэн түрын ажал ябуулагша, эрдэмтэн, Доржи Банзаровай нэрэм­жэтэ Буряадай гүрэнэй ехэ һургуулиин захирал, түүхын эрдэмэй кандидат. Найруу­лагша автор – Оюна Раднаева.

Ринчин Львович Даши­цыренов – Буряадай мэ­дээжэ дуушан, олониитын ажал ябуулагша, “Ринчин Да­шицыреновэй жаса” гэһэн буян үйлэдэлгын эмхиин түрүүлэгшэ. Найруулагша автор - Дашама Доржие­ва.

«Сагаан үбгэн»

Александр Андреевич Амагзаев – Эрхүү хотодо Бу­ряад арадай соёл хүгжөөлгын түб байгуулагшадай нэгэн, олон жэлэй туршада Байгал шадарай үндэһэн арадуудай соёл хүгжөөлгын түбэй захи­рал ябаһан, Орос гүрэнэйнгөө олон тоото хайра шагналнууд­та хүртэһэн, Монгол ороной “Алтан гадаһан” орденоор шагнагдаһан. Найруулагша автор - Серафима Балданова.

Мунко-Жаргал Аюшеевич Дармаев – түрэһэн Ага нютаг­таа, холын Туркменистанда, мүн Буряад орондо элдэб ту­шаалнуудта амжалтатай ажал- лаһан. 2006 онһоо Бүгэдэ Бу­ряадай үндэһэн соёлой эблэ­лэй дид-юрэнхылэгшэ ябаһан. Арадай аман зохёолой “Тоонто” ансамблиин гэшүүн. Мү- нөө жэлдэ 75 наһанайнгаа ал­тан ойе тэмдэглээ. Найруулаг­ша автор - Евгений Орбодоев.

Цыдып Балданович Цы­рендоржиев - Буряадай мэдээжэ уран зохёолшон, сэд- хүүлшэн, гүрэнэй болон оло­ниитын ажал ябуулагша, Бу­ряад Уласай соёлой габьяата хүдэлмэрилэгшэ. Цыдып Бал­данович олон жэлэй турша­да Буряадай Сэдхүүлшэдэй холбооной правлениин тү- рүүлэгшээр, «Буряад үнэн» сониной редактораар ажал- лаһан намтартай, байгша ондо 75 наһанайнгаа алтан ойе тэмдэглээ. Найруулагша автор - Галина Дашеева-Ба­заржапова.

Даба Санжитович Жа­мьянов – Оросой Холбоото Уласай Түмэр харгын хүндэтэ хүдэлмэрилэгшэ, һур хар­балгаар СССР-эй спортын мастерта кандидат. Сэрэгэй тусхай ябуулгада хабаадажа байһан хүбүүдтэ болон ажа­байдалай хүндэ хүшэрые бэе дээрээ мэдэрһэн бусадшье хүнүүдтэ туһаламжа хүргэжэ байдаг буянтай. Найруулагша автор – Долсон Галсанова.

Пурбо Найданович Да­миранов – Буряадай мэ­дээжэ композитор, Буряад Уласай Гүрэнэй шангай ла­уреат, Буряадай урлалай га­бьяата ажал ябуулагша. Олон һайхан дуунуудые зохёожо, арад зоной дунда алдар нэ­рэеэ суурхуулһан. Пурбо Найданович «Байгал» ан­самблиин уран һайханай хүтэлбэрилэгшэ байхаһаа гадна, Буряадай Хүгжэмэй зохёолшодой холбооной түрүү- лэгшэ ябаһан габьяатай. Авто­рынь - Цыпилма Батурова.

Максим Соктоевич Гомбо­ев – мэдээжэ уран зураашан, дархан, уран барималшан, Бу­ряад Уласай Гүрэнэй шангай лауреат. Хабаровскын хизаа­рай Уран зураашадай холбоо- ной болон Оросой Холбоото Уласай Уран зураашадай хол­бооной гэшүүн, буддын шажа­най хэрэгсэлнүүдые, бурхад сахюусадай хүрэгүүдые урлан бүтээхэһээ гадна, дасан ду­гангуудые һэргээлсэһэн га­бьяатай. Найруулагша автор – Жалсан Дондоков.

Хүсэтэй һахюуһан бэлэг

“Буряадай түрүү хүнүүд” гэһэн урилдаанай лауреа­дууд болон хабаадагшад­та хүндэлэлэй тэмдэгүүдтэй хамта гүнзэгы удха шанартай, сэнтэй бэлэгүүд барюулагдаа. Буддын шажанай эгээл хүсэтэй “Найман тахил” гэһэн һахюуһанай наймадахи һүлдэтэ тэмдэг – Хорло эзэнэйн­гээ хуби заяанда һайн хуби­лалтануудые асардаг убадистай. Суранзан мэтээр илал­та туйлалтануудые татажа асардаг. Дасанда ламада рам­найлуулаад, маани тарнииень уншажа байбал, байда­лай бүхы талаар – эд зөөриин, мүнгэнэй, инаг дуранай г.м. асуудалнууд урагшатайгаар шиидхэгдэжэ, зол жаргал, ам­галан тайбан байдал тогтодог.

«Буряадай түрүү хүнүүд» урилдаа эмхидхэхэ хэрэгтэм­най туһалһан эбээн тэдхэг­шэд тухай хэлэе. “РИТМ” гэһэн эмнэлгын ба шэнжэлгын түб, генеральна захиралынь Доржи Дашиевич Замбалов, “Орда” гэһэн этно-ресторан, эзэдынь Дамдин, Инна Да­шиевтан, Буркоопсоюзай хүтэлбэрилэгшэ, Арадай Хура­лай гэшүүн Долгор Кимовна Норбоева. Эдэ зондоо халуун баярые хүргэнэбди.

Зай, иигээд лэ, шэнэ жэ­лэй үмэнэ буряад арадайнгаа эгээл ажалша бүхэриг, абьяас бэлигтэй, Буряадайнгаа һүр һүлдэ дээрэ үргэжэ ябадаг түрүү зоноо хүндэлжэ, “Буряад үнэн” Хэблэлэй байшан­гай, Бүгэдэ Буряадай үндэһэн соёлой эблэлтэй суг хамта эмхидхэһэн энэ үйлэ хэрэг эмхи гуримтайгаар, һайнаар үнгэрбэ гээд онсолоё. Шэнэ жэлдэ, хүндэтэ уншагшаднай, дахяад уулзахабди!