Ниигэм 24 jan 2025 231

Уянгын долгин дээрэ

Ага тойрогой Зугаалай нютагта ажаһуудаг уран бэшээшэ, Буряадай Уран зохёолшодой холбооной гэшүүн Гомбо- Дугар Болотовой шэнэ шүлэгүүдые толилхо зуураа, «Һээр шаалган», «Шагай наадан» гэжэ шүлэгүүдынь дуун болохоор түсэблэгдэнхэй гэжэ мэдүүлэе.

© фото: Гэр бүлын архивһаа

Үглөөгүүр

Жабар үбгэн хүдөөгүүр

Жалга хүбшөөр дэншэнэ,

Шэмхээд эртэ үглөөгүүр

Шуурга, һалхяар шэдэлнэ.

Үргэн тала дайдамнай

Үргэһэ нойрһоо һэринэ,

Үүрэй сайхын эхиндэ

Үүдээ сэлижэ угтана.

Хүнгэрэг саһанда хушагдаад,

Хүдөө нютагнай амархал,

Ургын һалбархые хүлеэгээд,

Угтажа, баяраа мэдүүлхэл.

Һээр шаалган

Эртэ урдын домогтой

Элинсэг угайм наадан -

Эршэ хүсэеэ харуулһан

Эрын һээр шаалганай мүрысөөн.

Дабталга:

Һээр, һээр, һээр шаалган -

Һүрөөтэй хүбүүдэймнай тэмсээн.

Бүхэ һээр хухалха -

Буряад арадайм заншал.

Холын үргэн Буряадайм

Хүдэр шангашуул сугларба.

Нюдаргын шадал мэдүүлхэ

Нютагай һээршэд элирбэ.

Олон һээр хухаржа,

Омог илагша шалгарба,

Буряадай суута хүбүүе

Барлан, магтан дуулая.

Шагай наадан

Табан хушуун малаараа

Тала дайдаар суурханхай,

Шагай наадан-мүрысөөн,

Шамбай түргэн үрдилдөөн.

Бүгэдэ арадайм наадан -

Буряад шагай наадан.

Яһан шагай мухаряа,

Яаран хёрхоор няһалаа.

Хурдан шагай хүсэгдөө,

Хурган минии нугархай.

Дабталга.

Шагайн мори һорилгон,

Шанга гүйдэл, хатараан.

Солбон, дорюун абаргын

Соло дуудан уряалаан.

Дабталга.

Автор: “Буряад үнэн”

Фото: Гэр бүлын архивһаа