Буряад Уласта бог шорой хаядаг 14 газар усадхагдаба

Буряад Уласта «Экологи» түсэлэй ашаар бог шорой хаядаг 14 газар усадхагдаба. Энээн тухай Буряад Уласай Байгаалиин нөөсын ба байгаали хамгаалгын сайд Наталья Тумуреева февралиин 15-да үнгэргэгдэһэн сэдхүүлшэдтэй уулзалгада мэдээсэбэ.

Тус уулзалгада үндэһэтэнэй «Экологи» түсэлэй дүнгүүд болон үндэһэтэнэй «Экологиин талаар һайн байдал» гэжэ шэнэ түсэл бэелүүлгын түсэбүүд тухай хөөрэлдөөн болоо.

«Байгал далай хамгаалга» ба «Арюун сэбэр орон» гэжэ Холбоото уласай түсэлнүүдэй ашаар Буряад Уласта бог шорой хаядаг 14 газар усадхагдаба. Эдэ газарнууд Кабанскын, Баргажанай, Захааминай, Хяагтын аймагуудай болон Северобайкальск хотын дэбисхэр дээрэ байгаа.

Үндэһэтэнэй «Экологиин талаар һайн байдал» гэжэ шэнэ түсэлөөр энэ ажал үргэлжэлүүлэгдэхэ.

– Селенгинск, Турунтаево, Баргажан ба Ангой һууринуудта бог шорой болбосоруулха комплекснүүдэй барилга эхилхээр хараалагдана. Барилгын түһөө түсэб бэлэн боложо байна, - гэжэ Буряад Уласай Байгаалиин нөөсын ба байгаали хамгаалгын сайд Наталья Тумуреева хэлэбэ.

2024 оной эсэстэ Буряад орон Холбоото уласай «Сэбэр агаар» түсэлдэ оруулагдаба.

– 2030 он болотор «Сэбэр агаар» түсэлдэ 22 миллиард түхэриг һомологдоо. Мүнгэн зөөри гол түлэб үмсын гэрнүүдые зайн галаар дулаасуулха хэрэгтэ шэглүүлэгдэхэ. Гэртээ зайн галаар дулаасуулгын түхеэрэлгэнүүдые абажа табиһан эрхэтэдтэ гаргашалһан мүнгыень хүсэлдүүлхэ, тиихэдэ түлеэнэй субсиди абадаг зондо зайн гал хэрэглэһэнэй түлөө түлэһэн мүнгэнэйнь зарим хуби мүн бусаагдаха. Мүнөө жэлдэ Улаан-Үдэ хотын 160 гэр, Гусиноозёрскын Первомайский тосхон зайн галаар дулаасуулагдадаг болохо, - гэжэ Наталья Тумуреева хэлэбэ.

Холбоото уласай түсэлэй ашаар Котокель нуур сэбэрлэгдээ. Энэ хэрэгтэ 26,46 сая түхэриг һомологдоо. Тиихэдэ «Россиин уһан» гэжэ Холбоото уласай түсэлөөр Галуута нуур сэбэрлэлгын хэмжээ ябуулганууд 2026-2027 онуудта үнгэргэгдэхэ. Энэл түсэлөөр Северобайкальск ба Улаан-Үдэ хотонуудта сэбэрлэлгын түхеэрэлгэнүүдэй барилга үргэлжэлхэ.

5 жэлэй туршада бэелүүлэгдэһэн үндэһэтэнэй «Экологи» түсэлдэ холбоото уласай 11 түсэл ородог байгаа. 2030 он болотор бэелүүлэгдэхэ «Экологиин талаар һайн байдал» гэжэ шэнэ түсэлдэ холбоото уласай 6 түсэл ороно, тэрэ тоодо «Сэбэр агаар», «Россиин уһан», «Ой модо бүтэн үлөөлгэ», «Генеральна сэбэрлэлгэ» гэхэ мэтэ.