Буряад Уласта үндэр наһатай зоной бэеын элүүрые хамгаалха программа бэелүүлэгдэнэ

Мүнөө сагта наһатайшуулай энхэ элүүрые сахидаг гериатри гэһэн һалбари эдэбхитэйгээр хүгжэнэ. Зүүн зүгэй эмнэлгын түбэй эмшэд 5 жэлэй туршада энэ шэглэлээр ажалаа ябуулна. Наһатай зоной удаан сагай туршада эдэбхитэй, өөрыгөө хангаха шадалтай байхын түлөө тэдэ оролдоно, үбшэндэ дайрагдаһан зондо туһална.

- Манай эмшэд наһатай зониие дэмжэжэ, үбшэнгүүдынь аргална, бэе махабадайнь элүүрые хамгаална, бэеэ зүбөөр абажа ябахые һургана. Наһатайшуул нэгэ доро хэдэн үбшэндэ дайрагдажа магад, тиимэһээ эмүүдые, эмнэлгын аргануудые зүбөөр тааруулан аргалха гээшэ тон шухала.  Тэрээнһээ гадуур эмнэлгэ ба эдэбхитэй амидарал тэнсүүлхэ талаар туһа хүргэнэ, - гэжэ таһагые даагша Мария Шухоева хөөрэбэ.

Нютаг можын гериатрическа түбтэ жэл бүри 1200 гаран хүн эмнэлгэ гарана, тэдэнэй тоодо Агууехэ Эсэгын дайнай ветеранууд, ара талада ажаллаһан зон. Үбшэнтэдэй эмнэлгэдэ заншалта арганууд үргэнөөр хэрэглэгдэнэ, эмшэд фитотерапиин, зүү хадхалгын, гирудотерапиин аргануудые мүн эдэбхитэй хэрэглэнэ.