​Монголой алдарта Фронт Цэгмид - Москвада үнгэрхэ Агуу Илалтын Парадай хүндэтэ айлшан

Дайнай үеын суута гэрэл зураг дээрэ Сурэнхорын Цэгмид буулгагданхай гэжэ һануулнабди.

Дайнай үедэ Москва шадарай байлдаанда хабаадажа байһан совет  сэрэгшэдтэ Монголой арад зонһоо туһа хүргэжэ, эрэлхэг зүрхэтэй Сурэнхорын Цэгмид дамжуулжа ерэһэн юм. Тэрэ гэһэнһээ хойшо түрэл орондоо баатаршалга харуулһан залуу басаган Фронт Цэгмид гэжэ алдаршаа.

- Мүнөө энэ алдар суута хүгшэн 102 наһатай болонхой. Монгол арадһаа совет сэрэгшэдтэ туһа хүргэжэ, Баруун фронт ошоһон тухайгаа тодоор һанажа гайхуулна. Бүхы наһаараа хүнгэн бэшэ мал ажалда ябана, заяандаашье хүдөөгэй ажабайдал орхижо, хото зөөхэгүйб гэжэ хүгшэн хэлэнэ. Монголдоо тэрэ Фронт Цэгмид гэжэ мэдээжэ. Мүнөө Сурэнхорын Цэгмид Дундговь аймагта ажаһууна, шадал тэнхээ дүүрэн, Агуу Илалтын һайндэртэ Москва ошохоёо бэлдэжэ байна, - гэжэ Цыпилма Очирова хэлэбэ.