Монгол гүрэн ба Буряад Улас уушханай ханяада аргалха талаар хамтын ажал ябуулха

Уушханай ханяадантай тэмсэдэг Буряад Уласай Г.Д. Дугаровагай нэрэмжэтэ клиническэ диспансер Монголой Элүүрые хамгаалгын дэргэдэхи халдабарита үбшэнүүдые шэнжэлдэг үндэһэтэнэй Түбтэй «Бэе бэеэ ойлгосолгын меморандум» баталба. Дансада Монголой Элүүрые хамгаалгын дэргэдэхи халдабарита үбшэнгүүдые шэнжэлдэг үндэһэтэнэй Түбэй генеральна захирал Энхболд Анхбаяр, Уласай клиническа диспансерэй ахамад эмшэн Валерий Кожевников гэгшэд гараа табиба.

Хоёр талын түлөөлэгшэд эпидемиологическа хиналтын һалбарида, уушханай үбшэ шэнжэлхэ, аргалха, тэрээнһээ һэргылхэ талаар суг хамта ажалаа ябуулха тухай хэлсэбэ. Тиихэдэ бронхоблокаторна хирурги нэбтэрүүлхэ, Буряад Уласай диспансерэй бааза дээрэ һуралсал эмхидхэхэ тухай хөөрэлдөө.

- Халдабарита үбшэнүүдые элирүүлхэ, ехээр һүжэрүүлхэгүй, богони сагай туршада тэдэниие усадхахаар бэлэн байха хэрэгтэй. Тиихэдэ хүршэ гүрэнүүдэй эмшэдтэй хэлсээтэйгээр ажаллаха талаар манай арга боломжонуудые бүри шангадхаха ёһотойбди, илангаяа Монгол гүрэнэй эмшэдтэй, - гэжэ Валерий Кожевников тэмдэглээ. Монголой ба Росиин хилэ шадарай аймагуудта уушханай ханяаданһаа һэргылэмжын уласхоорондын конференци эмхидхэхэ тухай Валерий Кожевниковэй дурадхал Монголой эмшэд дэмжэбэ.                                                                                             

- Буряадай суг ажалтанаар ерээдүйн хамтын ажаябуулга тухай зүбшэн хэлсээбди. Уушханай ханяада болон бэшэшье халдабарита үбшэнүүдые аргалха, элирүүлхэ, тэрээнһээ һэргылхэ талаар хамтын ажал ябуулхабди. Хирургическа эмнэлгын хажуугаар хамтын тренинг эмхидхэхэбди, шэнжэлэлгын ажал ябуулхабди, манай гүрэнүүдэй хилэ шадархи аймагуудта уулзажа байхабди, - гэжэ Энхболд Анхбаяр хэлэбэ.Уушханай ханяадантай тэмсэдэг Буряад Уласай Г.Д. Дугаровагай нэрэмжэтэ клиническэ диспансерэй ахамад эмшэнэй мэдээсэһээр, Улаан-Үдэдэ үнгэргэгдэхэ уласхоорондын конференцидэ Тыва Уласай, Үбэр Байгалай хизаарай, Буряад ороной мэргэжэлтэд уригдаха юм. Россиин түлөөлэгшэд Монголой эмшэдэй ба мэргэжэлтэдэй нэгэдэлтэй, Монголой Сэлэнгын аймагай Департаментын дарга Ж.Одомтой конференциин стратеги, хамтын ажаябуулгын түсэбүүд болон холбоо харилсаа үргэдхэхэ тухай хөөрэлдөө.