2024 ондо Буряад Уласай 4,5 мянган бүлэ Алас Дурнын ба Арктикын ипотекэ хэрэглэбэ

Хүнгэлэлтэтэй (2%) урьһаламжын  мүнгөөр Алас Дурнын тойрогто ажаһуудаг 143 000 бүлэ үмсын гэртэй болоһон байна. Тус программаар үгтэһэн урьһаламжын мүнгэн бүхыдөө 681 млрд түхэриг гэжэ багсаагдана.

 Россиин Юрэнхылэгшэ Владимир Владимирович Путин Алас Дурнын ба Арктикын ипотекын хүнгэлэлтэ (2%) 2030 он болотор зандань үлээхэ гэһэн даабари үгөө. Тэрээнһээ гадуур, хүнгэлэгдэмэл ипотекэ абаха аргатай мэргэжэлтэдэй список үргэдхэгдэхэ юм.

 - Юрэнхылэгшын даабари дүүргэхэ хэрэгтэй. Банкнууд ондоо шиидхэбэри абаа һэн, би энээн тухай Россиин Засагай газарай Түрүүлэгшэ Михаил Владимирович Мишустинда дуулгааб. Тэрэ Россиин Мүнгэн һангай яаманда банкнуудтай хүдэлхэ даабари үгөө.  Энэ ажалай дүнгүүд гэхэдэ, Юрэнхылэгшын даабари дүүргэхын тула Засагай газар банкнуудта нэмэхэ мүнгэнэй хэмжээ элирүүлээ. Саашадаа Алас Дурнын ажаһуугшад хүнгэлэгдэмэл ипотекэ хэрэглэжэ, абаһан гектар дээрээ гэр бариха, ажаһуудалаа һайжаруулха аргатай, - гэжэ Ородой Холбоото Уласай Засагай газарай Түрүүлэгшын орлогшо-Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Трутнев хэлэбэ. Энэ һарада Россиин Засагай газар хүнгэлэгдэмэл урьһаламжа үгэдэг банкнуудта хүсэлдүүлхэ мүнгэнэй хэмжээ ехэ болгобо. Жэшээнь, 2025 оной февралиин 7-һоо августын 6 болотор Алас Дурнын ба Арктикын ипотекээр олон квартиратай гэртэ байра хүн абаба. Энэ ушарта банк гүрэнһөө 3% хүрэтэр хүсэлдүүлгэ абаха болоно. Хэрбэеэ үмсын гэр бариха ипотекэ эрхэтэнэй хэрэглээ һаа, хүсэлдүүлгэ 3,5% хүрэтэр байха. Хүнгэлэгдэмэл ипотекэ үгэхэ хэрэгтэ энэ арга туһатай.

- Хүсэлдүүлгын хэмжээ ехэ болгохо талаар дурадхалнуудые Россиин Зүүн зүгые хүгжөөлгын яаман, Ородой Холбоото Уласай Засагай газарай Түрүүлэгшын орлогшо-Алас Дурнын тойрогоор Россиин Юрэнхылэгшын бүрин эрхэтэ түлөөлэгшэ Юрий Петрович Трутнев оруулаа. Иимэ шиидхэбэриин ашаар «Алас Дурнын ба Арктикын ипотекэ» гэжэ программаар урьһаламжа 2024 оной оршон байдалда бусаа, - гэжэ Ородой Холбоото Уласай Алас Дурна ба Арктика хүгжөөлгын сайдай орлогшо Эльвира Нургалиева тэмдэглээ.Тэрэнэй онсолһоор, «Алас Дурнын ба Арктикын  ипотекэ» гэжэ программа тойрогой барилгын хүгжэлтэдэ сэхэ нүлөөлнэ. Программа бэелүүлгын үедэ Алас Дурнын тойрогто гэр байра барилгын хэмжээн 3 дахин ургаа, ашаглалда тушаагдаһан гэрнүүдэй хэмжээн 2 дахин дээшэлээ. Барилгын һалбари хүгжөөхэ эрхэ нүхэсэл байгуулхада, Алас Дурнын хотонуудай мастер-түсэбүүд мүн урагшатайгаар бэелүүлэгдэнэ бшуу. 

«Алас Дурнын ба Арктикын ипотекэ» гэжэ программа 2030 оной эсэс болотор хүдэлхэ.