Буряад Уласта «Уран хэлэтэнэй урилдаан» соносхогдоо

Буряад арадай һайндэр Сагаалганда дашарамдуулан, Эсэгэ ороноо хамгаалагшадай жэлдэ зорюулан, уласай VI-дахи «Уран хэлэтэнэй урилдаан» соносхогдоо. Тус хэмжээ ябуулгада буряад хэлэ мэдэхэ ямаршье яһатан, наһанай хизаарлалтагүй, ажаһуудаг газарһаа дулдыдангүй хабаадаха аргатай юм.

- Түрэл хэлэеэ шудалха талаар һонирхол түрүүлхэ, буряад хэлэеэ, арадай аман зохёолой бага жанрнуудые дэлгэрүүлхэ, арадай аман зохёолдо багашуулай һонирхол түрүүлхэ, бэлигтэй уншагшадые, авторнуудые элирүүлхэ зорилготойгоор урилдаан соносхогдоо, - гэжэ эмхидхэгшэд - Уласай уран бэлигэй түбэй хүдэлмэрилэгшэд хэлэнэ.

Урилдаанда илагшад мартын 1-дэ Физкультурна-тамирай комплексдо үнгэргэгдэхэ Сагаалганай найрта хабаадаха. Эрхим үреэлнүүд болон магтаалнууд «Уран хэлэтэнэй урилдаан» гэһэн согсолборидо хэблэгдэхэ.

«Үреэлнүүд, юрөөлнүүд»: «Гэр бүлын ажабайдалда хабаатай үреэлнүүд», «Сагаалганай үреэлнүүд», «Эсэгэ ороноо хамгаалагшадта, сэрэгэй албанда мордогшодто хабаатай үреэлнүүд», «Амгалан байдалай түлөө» гэһэн номинацинуудта уран уншагшад хаба шадалаа туршаха. Тиихэдэ аха захатан «Дасанай магтаалнууд» гэһэн номинацида уригдана.

Урилдаанда хабаадаха гэбэл, 3 минутаһаа дээшэ бэшэ видеобуулгабари хэжэ, «ВКонтакте» сүлжээндэ, өөрынгөө хуудаһанда толилхо хэрэгтэй. Тиихэдэ хэмжээ ябуулгада хабаадаха тухай мэдүүлгэеэ 2025 оной февралиин 24 болотор (үглөөнэй 10 саг болотор) [email protected] гэһэн сахим хаягаар оруулха шухала. Урилдаан тухай мэдээсэл Уласай уран бэлигэй түбэй www.байкалфолк.рф сайтда толилогдонхой.