Буряад Уласта «Манай Буряад орон» гэһэн нээмэл суглаан үнгэргэгдэхэ

Буряад Уласай Засагай газар март һарада үнгэргэгдэхэ «Манай Буряад орон» гэжэ нээмэл суглаанда улас дотор бэелүүлэгдэһэн үндэһэтэнэй түсэлнүүдэй дүнгүүд согсологдохо, мүн шэнэ түсэлнүүдтэй танилсалга болохо. Тэрээнһээ гадуур стратегическэ сессинүүд үнгэргэгдэхэ. Эндэ тобшолол хэдэг мэргэжэлтэд, олониитын, эрдэмэй, олзын хэрэгэй түлөөлэгшэд хабаадажа, Буряад Уласай ниигэмэй ба экономикын талаар хүжэлтын һанал бодолнууд ба түсэлнүүд тухай хөөрэлдэхэ. Буряад Уласай Толгойлогшын ба Засагай газарай Захиргаанай хүтэлбэрилэгшын мэдээсэлэй политикээр, олониитэтэй холбоогоор ба олониитын түсэлнүүдээр орлогшо Ирина Доржиева февралиин 17-до үнгэргэгдэһэн брифинг дээрэ энээн тухай мэдээсэбэ.

Буряад Уласай Засагай газарай «Манай Буряад орон» гэжэ нээмэл суглаан энэ удаа хоёрдохиёо үнгэргэгдэхэ. Түрүүшын иимэ хэмжээ ябуулга 2020 оной февраль һарада эмхидхэгдэһэн байна. Тэрэ суглаанда Засагай газарай Түрүүлэгшын орлогшонор һүүлэй гурбан жэлэй ажаябуулгын тоосоо хэжэ, түсэбүүдээрээ хубаалдаһан байна. 2020 ондо стратегическэ сессинүүд мүн үнгэргэгдэжэ, дурадхалнуудай ехэнхинь бэелүүлэгдээ, нютаг можын хүгжэлтын түсэбтэ оруулагдаа һэн.

– Мартын 12-то Буряад Уласай Засагай газарай Түрүүлэгшын орлогшонор үндэһэтэнэй түсэлнүүдые бэелүүлгын дүнгүүд, Россиин Юрэнхылэгшын табиһан зорилгонууд, түсэблэгдэһэн хэмжээ ябуулганууд тухай хөөрэхэ. Тиихэдэ үндэһэтэнэй түсэлнүүдэй ёһоор, уласай ажаһуугша бүхэндэ хабаатай юун хэгдэхэб гэжэ хөөрэлдөөн болохо. Энэ хэмжээ ябуулгада олониитын эдэбхитэдые уринабди. Аймаг бүхэн делегадуудые, яамануудай, эмхи зургаануудай ниитын зүблэлнүүд өөһэдынгөө тобшолол хэдэг мэргэжэлтэдые эльгээхэ. Буряад Уласай Толгойлогшын ба Засагай газарай дэргэдэхи зүбшэлэлгын органууд делегадуудаа мүн хабаадуулха. Тиихэдэ энэ хэмжээ ябуулгада хабаадаха хүсэлтэй зон уласай хүгжэлтэдэ туһатай дурадхалнуудаа, һанал бодолоо, мэдүүлгэнүүдээ [email protected] электрон хаягаар эльгээхэ аргатай, - гэжэ Ирина Доржиева хэлэбэ.

Мэдүүлгэнүүд мартын 3 болотор абтаха. Ирина Доржиевагай һануулһаар, Буряад Уласай Засагай газарай нээмэл суглаанай дүнгүүдээр «Залуу» гэжэ урлалай түб, түхэреэн сүүдхын туршада ажалаа ябуулдаг «Буряад-ТВ» гэжэ үндэһэтэнэй түрүүшын теле-субаг байгуулагдаа һэн. Гурбанһаа дээшэ үхибүүтэй бүлэнүүд нэгэ авто-унаагай транспортна татабариһаа сүлөөлэгдөө, «Буряад Уласай эрхим ТОС» конкурсын шангай жаса ехэ болоо, аймагуудта «Минии олзын хэрэг» түбэй таһагууд нээгдээ. Тэрээнһээ гадуур үшөө олон дурадхалнууд дэмжэгдэһэн байна.