Буряад уласай типографида «Судьба» гэһэн сонин түлөөһэгүйгөөр хэблэгдэхэ

Эсэгэ ороноо хамгаалагшадай жэлдэ, Агууехэ Эсэгын дайнай Илалтын 80 жэлэй ойн баярта уласай типографида «Хуби заяан» гэһэн сонин түлөөһэгүйгөөр хэблэгдэхэ. Һаяхана сониной түрүүшын хэһэг нара хараба. Байгша ондо сэрэгэй тусхай үйлэ хэрэгүүдтэ хабаадагшадай гэр бүлэнүүдые , ветерануудые дэмжэлгын хэмжээндэ сониндо нэмэлтэ туһаламажа үзүүлэгдэхэ. Саашадаа  «Хуби заяан» сонин «Буряад Үнэн» гэжэ Хэблэлэй байшанай дэмжэлгээр гарадаг болохо. Энээн тухай Буряад Уласай Толгойлогшын ба Засагай газарай Захиргаанай Хүтэлбэрилэгшын мэдээсэлэй политикаар, олониитэтэй холбоогоор ба олониитын түсэлнүүдээр орлогшо Ирина Доржиева мэдээсэбэ.

- «Хуби заяан» гэжэ сонин дэмжэхэдээ, түүхэеэ хадагалха, нацизмтай тэмсэхэ хэрэгтэ шухала хубитаяа оруулнабди. Ахамад эрхилэгшэ Леонид Кирилловичай үүсхэлээр сэрэгэй тусхай үйлэ хэрэгүүдтэ хабаадагшадай гэр бүлэнүүдые, ветерануудые дэмжэлгын арганууд, «Эсэгэ ороноо хамгаалагшад» гэжэ гүрэнэй жасын ажаябуулга тухай сониной нюурнуудта хөөрэгдэхэ, - гэжэ уласай типографиин захиралнуудай зүблэлэй түрүүлэгшэ, «Буряад Үнэн» гэжэ Хэблэлэй байшанай адаглалгын зүблэлэй түрүүлэгшэ Ирина Доржиева хэлэбэ.

«Хуби заяан» сонин дэмжэхэ тухай даабари Буряад Уласай Толгойлогшо Алексей  Цыденов үгэһэн байна. 1993 оной мартын 15-да байгуулагдаһан сонин бага наһандаа  фашизмын шорондо һуугшадай дэлхэй дээрэ ори ганса хэблэл болоно. 30 шахуу жэлэй туршада сонин Буряад Уласта хэблэгдэнэ, бүхы Росси дотор, СНГ-н гүрэнүүдээр, Балтида, Болгарида, Израильда тараагдана. Бүхы дэлхэйгээр сониной 200 гаран олониитын корпункт бии. «Хуби заяан» сониной зарим дугаарнууд үндэһэтэнэй Катастрофын мемориалда (Холокост), Иерусалимай Яд ва-Шем мемориалда хадагалагдажа байдаг. Буряад Уласай Үндэһэтэнэй архивта найман жэлэй саана сониной тусхай жаса байгуулагдаһан юм. Тэндэ нацизмын шорондо һуугшадай 30000 гаран бэшэг, мэдээсэлнүүд суглуулагданхай.

- Фашизмын шорондо һууһан үхибүүдэй уласхоорондын нэгэдэлэй байгуулагдаһан сагһаа хойшо Буряад Уласай сэдхүүлшэдэй нэгэдэлэй дэмжэлгээр манай сонин хэблэгдэнэ. Дэлхэйн 2-дохи дайнай үедэ хүүгэд наһандаа концлагерьта һууһан, тэндэһээ амиды гаража шадаһан зоной хуби заяан тухай бидэ 30 шахуу жэлэй туршада хөөрэнэбди,- гэжэ сониной ахамад эрхилэгшэ Леонид Синегрибов хөөрэбэ.

- Уласай типографи Агууехэ Илалтын 80 жэлэй ойн баяртай дашарамдуулан, «Хуби заяан» сонин түлөөһэгүйгөөр хэблэхэ болоһондонь бидэ ехэ баяртайбди. Эсэгын дайн тухай дурасхаал хадагалха хэрэгтэ редакциин оруулһан хубита аргагүй ехэ. Саашадаа үшөө олон жэлэй туршада «Хуби заяан» сонин уншагшадаа баярлуулжа байха бэзэ, найданабди, -гэжэ Ирина Доржиева тэмдэглэбэ.